نۇر-سۇلتان قالاسى قازاقستان حالقى اسسامبلەياسىنىڭ قولداۋىمەن ەلوردالىق دوستىق ءۇيى ساحناسىندا اباي قۇنانباي ۇلىنىڭ تۋعانىنا 175 جىل تولۋىنا وراي «اق اجەلەر» ءانسامبلى جەكە شىعارماشىلىق كەشىن وتكىزدى.
«اق اجەلەر» ءانسامبلىنىڭ جەتەكشىسى, قازاقستان رەسپۋبليكاسىنىڭ مادەنيەت قايراتكەرى جالعاس كەڭەسوۆ كورەرمەندەرگە العىسىن ءبىلدىرىپ, ءانسامبلدىڭ قۇرىلۋ تاريحىنا قىسقاشا توقتالا كەتتى.
«قازاقتىڭ ۇلتتىق ونەرىن دارىپتەۋ ماقساتىندا انسامبل 2012 جىلى ەلوردا تورىندە قۇرىلدى. كەزىندە ءبىرى دارىگەر, ءبىرى مۇعالىم بولعان شامامەن 30 شاقتى اجە ونەرلەرىن ورتاعا سالۋدا. بولاشاققا جوسپارلارىمىز وتە كوپ. سولاردىڭ ءبىرى, اقمولا وبلىسى ايماقتارىن ارالاپ, كونتسەرتتىك باعدارلامامىزدى بارشا حالىققا ارناۋ بولماق. ەل تاريحىنا ماڭىزدى جىلى كىشكەنە دە بولسىن ۇلەس قوسۋ باستى مىندەتىمىز ەدى. وسىعان بايلانىستى, «انالار اماناتى» كورمە-زالىندا شىعارماشىلىعىمىزدى ەلوردا تۇرعىندارىنا سىيلاۋعا سەپتىگىن تيگىزگەن نۇر-سۇلتان قالاسى قازاقستان حالقى اسسامبلەياسىنا جانە ۇلتتىق ونەردى باعالاپ كەلگەن ۇلكەن-كىشىگە العىسىمىز شەكسىز», – دەيدى ج.كەڭەسوۆ.
كونتسەرتتە «اق اجەلەر» ءانسامبلى كورەرمەندەرگە كلاسسيكالىق جانە قازاق كومپوزيتورلارىنىڭ اندەرىمەن قاتار, حالىق اندەرىن تارتۋ ەتتى. ال انسامبل مۇشەلەرىنىڭ جەكە ورىنداۋىنداعى ابايدىڭ قارا سوزدەرى مەن دومبىرامەن سۇيەمەلدەنگەن جىر-تەرمەلەر تىڭدارمانداردىڭ قۇلاق قۇرىشىن قاندىردى. ءاربىر شىعارماشىلىق نومىرگە زور قوشەمەتىن اياماعان كورەرمەندەر ادەمى كەشتەن كوتەرىڭكى كوڭىل كۇيدە تارقاستى.