قاريالار جەرگىلىكتى تۇرعىنداردى ارانداتۋشىلىققا ەرمەۋگە ۇندەدى. ساناۋلى ادامدار اراسىنداعى تۇرمىستىق ماسەلەنى ەل كولەمىندەگى پروبلەما دەڭگەيىنە شىعارىپ, بۇرمالاۋعا بولمايتىنىن ايتتى. سان جىلدار بويى قالىپتاسقان بەيبىت ۇلتارالىق قارىم-قاتىناستى كوزدىڭ قاراشىعىنداي ساقتاۋ تۋرالى ءسوز ەتتى دەپ حابارلايدى 24.kz.
- مىنانداي جۇگەنسىزدىككە بەرىلمەيىك, ءتارتىپ ساقتايىق. حالقىمىز, جاستارىمىز امان بولسىن. ءبارىمىز سوعان اتسالىسايىق. حالقىمىز امان, تىنىش بولسىن, - دەدى قورداي اۋدانىنىڭ تۇرعىنى ءالي قالپاقوۆ.
دۇنگەن مادەني ورتالىقتارى قاۋىمداستىعىنىڭ قۇرمەتتى پرەزيدەنت لۋگمار بۋلاروۆ تا حالىقتى ارانداتۋشىلىققا ەرمەۋگە شاقىردى.
- ءبىز اۋەلدەن تەك بەيبىت ەلدە تۇرىپ كەلدىك. 140 جىل بۇرىن قازاق حالقى تاريحي ەرلىك جاساپ, 400 مىڭنان استام ادامنىڭ ءومىرىن ساقتاپ قالدى. تالاي قيىن-قىستاۋ كەزەڭدى, اشارشىلىق پەن سوعىس جىلدارىن بىرگە وتكەردىك. سوندىقتان ەكى جاقتىڭ جاستارىن سابىر بولۋعا شاقىرامىن. ارانداتۋشىلىققا ەرمەڭىزدەر, - دەدى ول.