نۇر-سۇلتان قالاسىندا اباي قۇنانباي ۇلىنىڭ 175 جىلدىعىنا ارنالعان رەسپۋبليكالىق اقىندار ايتىسىنا ەنگىزىلگەن بىرقاتار جاڭا ەرەجە مەن شارانىڭ ءوتۋ بارىسى تالقىلاندى. بۇل تۋرالى قالا اكىمدىگىنىڭ رەسمي سايتى حابارلادى.
ايتىس 8 اقپان كۇنى ساعات 14:00-دە «استانا» كونتسەرت زالىندا وتەدى. ول Nur Otan پارتياسىنىڭ باستاماسىمەن مادەنيەت جانە سپورت مينيسترلىگى مەن نۇر-سۇلتان قالاسى اكىمدىگىنىڭ قولداۋىمەن ۇيىمداستىرىلىپ وتىر.
«2020 جىلى ەلىمىزدە ءارتۇرلى دەڭگەيدەگى 80-گە جۋىق اقىندار ايتىسى وتەدى دەپ جوسپارلانۋدا. ونىڭ 3-ەۋى – حالىقارالىق دەڭگەيدە, 21-ءى رەسپۋبليكالىق دەڭگەيدە بولماق. سونداي-اق 21-ءى ابايدىڭ 175 جىلدىق مەرەيتويىنا, 3-ەۋى ءال-ءفارابيدىڭ 1150 جىلدىعىنا, 5-ەۋى ۇلى جەڭىستىڭ 75 جىلدىعىنا ارنالادى», - دەدى Nur Otan پارتياسى ورتالىق اپپاراتىنىڭ ساياسي جۇمىس دەپارتامەنتىنىڭ ديرەكتورى ەرلان قارابالاەۆ.
حالىقارالىق جىرشى-تەرمەشىلەر جانە ايتىس اقىندارى وداعىنىڭ توراعاسى ءجۇرسىن ەرمان ايتىسقا ەنگىزىلگەن بىرقاتار جاڭا ەرەجەنى ءتۇسىندىرىپ ءوتتى.
«بۇل – ابايدىڭ مەرەيتويىنا وراي وتكىزىلگەلى وتىرعان العاشقى ايتىس. حالىقتىڭ كوڭىلىنەن شىعاتىنداي ادىلەتتى وتۋىنە ۇلكەن ءمان بەرىپ وتىرمىز. بۇرىنىراق ايتىستاعى اقىندار جۇبى الدىن الا انىقتالاتىن. ياعني ءسوز بايگەسىنە تۇسپەي تۇرىپ اقىندار ءوزىنىڭ كىممەن ايتىساتىنىنان حاباردار بولاتىن. بۇل جولى ەرەجەنى ءسال وزگەرتىپ, جۇپتى حالىقتىڭ ءوزى تاڭدايتىنداي ەتتىك. ون التى اقىننىڭ اتى-ءجونى جازىلعان قاعاز شاردىڭ ىشىنە سالىنادى دا, زالدان كەز كەلگەن كورەرمەن شىعىپ, جۇپتاردى تاڭدايدى. سونداي-اق ۇزىن-سونار جاتتاندى ايتىسقا دا جول بەرمەيمىز. اقىندار ءۇش, ءتورت, بەس شۋماقپەن قايىمداسىپ, جاۋاپتاسىپ ايتىسادى», - دەدى ول.
سونداي-اق ءجۇرسىن ەرمان ەرتەڭگى ايتىستا قازىلار القاسى قاتىسۋشىنىڭ ونەرى بالدىق جۇيەمەن باعالانبايتىندىعىن اتاپ ءوتتى. ادىلقازىلار الدىندا قىزىل جانە كوك ءتۇستى ەكى تۇيمەشىك ورناتىلادى. قاي اقىنعا كوك تۇيمەشىكتەر كوبىرەك باسىلسا, سول كەلەسى كەزەڭگە وتەدى. ايتا كەتسەك, ءدۇبىرلى دودادا 16 اقىن باق سىنايدى. ال ايتىستىڭ جالپى جۇلدە قورى 10 400 000 تەڭگەگە تەڭ.