قازاقستاننىڭ موڭعولياداعى ەلشىسى جالعاس ادىلباەۆ موڭعوليا مەملەكەتتىك ۇلى حۋرال توراعاسى گومبوجاۆىن زاندانشاتاردىڭ قابىلداۋىندا بولدى.
كەزدەسۋ كەشە 6 اقپاندا ءوتتى. كەزدەسۋ بارىسىندا موڭعوليا مەملەكەتتىك ۇلى حۋرال توراعاسى گومبوجاۆىن زاندانشاتار ءوزارا ءىس-قيمىلدىڭ ءتۇرلى سالالارىنداعى قازاقستان-موڭعول قاتىناستارىنىڭ دامۋىنىڭ وڭ ديناميكاسىن, سونداي-اق موڭعوليا قازاقستانمەن ەكىجاقتى قاتىناستاردى ءتۇرلى سالالاردا كەڭەيتۋگە مۇددەلى ەكەنىن اتاپ ءوتتى.
ءوز كەزەگىندە ج.ادىلباەۆ گ.زاندانشاتىر مىرزانى كەلە جاتقان موڭعولدىڭ ۇلتتىق مەرەكەسى «شاعان» مەيرامى جانە پارلامەنتتىڭ كۇزگى سەسسياسىنىڭ ءساتتى اياقتالۋىمەن قۇتتىقتادى.
قازاقستاندىق ديپلومات, 25 جىلدان كەيىن تۇڭعىش رەت جاسالعان موڭعوليانىڭ پرەمەر-ءمينيسترى ۋ.حۇرەلسۇحتىڭ قازاقستانعا رەسمي ساپارى ەكى جاقتى قارىم-قاتىناستار مەن ىنتىماقتاستىقتىڭ ودان ءارى قارقىندى دامۋىنا جاڭا سەرپىنىس بەرگەنىن اتاپ ءوتتى.
تاراپتار اعىمداعى جىلعى زەينەتاقىمەن قامسىزداندىرۋ, ينۆەستيتسيالار, اۋىل شارۋاشىلىعى, كولىك, ءبىلىم جانە عىلىم, دەنساۋلىق ساقتاۋ جانە مادەنيەت سالالارىنداعى ەكىجاقتى ءوزارا ءىس-قيمىلدىڭ پەرسپەكتيۆالارى, سونداي-اق بىرقاتار ۆەدومستۆوارالىق قۇجاتتارعا قول قويۋ ماسەلەلەرىن تالقىلادى.
گ.زاندانشاتار مىرزا ەكى ەل اراسىنداعى پارلامەنتارالىق بايلانىستاردى نىعايتۋعا كوڭىل ءبولۋ, بىرلەسىپ اۋقىمدى جانە ناقتى جوبالاردى ىسكە اسىرۋ قاجەتتىلىگى بويىنشا وي-پىكىرىن جەتكىزدى.
ج.ادىلباەۆ موڭعوليانىڭ زاڭ شىعارۋشى ورگانىنىڭ باسشىسىنا قازاقستانداعى سوڭعى ىشكى ساياسي جانە الەۋمەتتىك-ەكونوميكالىق وزگەرىستەر مەن قازاقستان رەسپۋبليكاسىنىڭ پرەزيدەنتى ق.توقاەۆتىڭ مەملەكەتتىڭ ودان ءارى دامۋىنا قاتىستى ساياساتتىڭ ماقساتتارى مەن مىندەتتەرى جونىندە ماعلۇمات بەردى.
سونداي-اق ەلشى گ.زاندانشاتارعا الداعى جىلدىڭ 5 شىلدەسىندە «قازاقستان رەسپۋبليكاسىنىڭ تۇڭعىش پرەزيدەنتى - ەلباسى: مەملەكەتتىك ستراتەگيا جانە كوشباسشىلىق فەنومەنى» تاقىرىبىندا وتكىزىلەتىن كونفەرەنتسيا جونىندە اقپارات بەرە وتىرىپ, وسى ءىس-شاراعا موڭعول تاراپىنىڭ جوعارى دەڭگەيدە قاتىساتىنىنا سەنىم ءبىلدىردى.
قازاقستاندىق ديپلومات پارلامەنت توراعاسىنا 2020 جىلى اباي قۇنانباي ۇلىنىڭ 175 جىلدىعى, ءابۋناسىر ءال-ءفارابيدىڭ 1150 جىلدىعى, سونداي-اق التىن وردا قۇرىلۋىنىڭ 750 جىلدىعىن تويلاۋعا ارنالىپ وتكىزىلىپ جاتقان ءىس-شارالار تۋرالى مالىمەت بەردى.
سونىمەن قاتار موڭعوليا ۇلى مەملەكەتتىك حۋرالىنىڭ توراعاسى بيىل 24 ماۋسىمدا موڭعول ەلىندە وتەتىن پارلامەنتتىك سايلاۋعا جەكە توقتالىپ, ونىڭ كەلەر جىلدارداعى موڭعوليانىڭ ساياساتىنا اسەر ەتۋ سالدارى بويىنشا جالپىلاما تۇسىنىكتەمە بەردى.
گ.زاندانشاتار موڭعوليادا شوعىرلانعان قانداستارىمىزدىڭ موڭعول قوعامىنىڭ ۇيلەسىمدى قۇرامداس بولىگى ەكەنىن جانە ولاردىڭ الاتىن ەرەكشە ءرولىن اتاپ ءوتتى.
قۋات ۋاتحان,
موڭعوليا