مەملەكەت باسشىسىنىڭ تاپسىرماسىمەن جاساقتالعان پرەزيدەنتتىڭ كادرلىق رەزەرۆىندەگى جاس مامانداردىڭ العاشقى لەگى جاڭا قىزمەتتەرىنە كىرىسىپ ۇلگەردى. بەرىسى قالالىق اكىمدىككە شاقىرتۋ السا, ءارىسى كورپوراتسيا باسشىلارىنىڭ كەڭەسشىلەرى بولىپ تاعايىندالدى.
Nur Otan پارتياسى Jas Otan جاستار قاناتىنىڭ كەشەگى توراعاسى داۋلەت كارىبەك بۇگىندە «نۇر-سۇلتان قالاسى جاستار ساياساتى ماسەلەلەرى باسقارماسى» مم باسشىسى كادرلىق رەزەرۆتەگى العاشقى قادامىن وڭىرلەردەن باستاماق بولعانىن ايتتى.
جامبىل وبلىسى سارىسۋ اۋدانىنىڭ تۋماسى ماتەماتيكا سىنىبىندا وقىسا دا, تاريح پەن ادەبيەتكە قىزىعىپ وسكەن. جاستار ساياساتىنا كەلۋى دە وسىمەن بايلانىستى بولسا كەرەك. «تەلەديداردان كورىپ وسكەن ەلورداعا ارمان قۋىپ كەلدىم. «تۇران» ۋنيۆەرسيتەتىندە ساياساتتانۋ ماماندىعىن ءتامامدادىم. ەلورداعا كەلگەلى رەسپۋبليكانىڭ تۇكپىر-تۇكپىرىنەن جينالعان جاستارمەن ارالاسا باستادىم. ەلوردا ەلىمىزدىڭ باتىسى مەن شىعىسىنان, وڭتۇستىگى مەن سولتۇستىگىنەن كەلگەن جاستاردىڭ باس قوسىپ, دوستاسۋىنا جاعداي جاسايدى. ءسويتىپ, سولتۇستىكتىڭ قىزىمەن وتباسىن قۇردىم. مەملەكەت استاناسى جالىندى جاستاردىڭ ءوزىن كورسەتۋگە, ماقساتىنا جەتۋگە جول اشادى. پرەزيدەنتتىڭ كادرلىق رەزەرۆى دە جاستار ءۇشىن ۇلكەن مۇمكىندىكتەردىڭ ءبىرى دەپ بىلەمىن. ويتكەنى باعدارلاماعا مەملەكەتتىك قىزمەتتە جۇمىس ىستەگەندەردەن بولەك, مەملەكەتتىك قىزمەتكە قاتىستى وزىندىك كوزقاراسى قالىپتاسقان, يدەيالارى بار ءتۇرلى ماماندىق يەلەرى قاتىسا الادى. باق سىناۋشىلار قاتارىندا جەكە كاسىپكەرلەر, ءتىپتى تەحنيكالىق ماماندىق يەلەرى دە بولدى. ال بۇل ولارعا وزدەرىن مەملەكەتتىك قىزمەت سالاسىندا سىناپ كورۋگە, ەسكى جۇيەگە جاڭا لەپ بەرۋگە جول اشادى», دەيدى جاس مامان.
داۋلەت قازىرگى مۇمكىندىك پەن اشىقتىقتىڭ زامانىندا بىرەۋدىڭ كومەگىنە سەنۋ, قولداۋ كۇتۋدى نامىس كورەتىنىن دە جاسىرمادى: «جوبانىڭ بارلىق كەزەڭدەرىنەن ەشكىمنىڭ كومەگىنسىز ءوزىم ءوتتىم. مەنىڭ اتا-انام 40 جىل مۇعالىم بولىپ قىزمەت ەتكەن, قازىر زەينەت دەمالىسىندا. بارلىعى اشىق ءارى ءادىل بولدى دەپ سەنىممەن ايتا الامىن. ونلاين تاپسىرعاندىقتان بيۋروكراتيا دەيتىن تەجەۋىشتەر دە بولمادى. قازىر بىرەۋدىڭ كومەگىنە جۇگىنۋدى نامىس سانايمىن».
Nur Otan پارتياسىندا دا وڭىرلەردى دامىتۋ جۇمىستارىمەن اينالىسقاندىقتان جوباداعى سۇراقتار داۋلەتكە جەڭىل بولعان. «سۇراقتار, شىنى كەرەك, مەن ءۇشىن قيىن بولعان جوق. ناتيجەسىن بىلگەننەن كەيىن بىزدەرگە تاڭداۋ مۇمكىندىگى بەرىلدى. ءارتۇرلى قۇرىلىمداردان حابارلاستى. مەن وڭىرلىك باعىتىن تاڭدادىم. سەگىز بالانىڭ جەتىنشىسى بولعاننان با ماعان الەۋمەتتىك ساياسات, وڭىردەگى ماسەلەلەر قاشان دا قىزىق. نۇر-سۇلتان قالالىق اكىمدىگى ۇسىنىسىن بىلدىرگەندە قۋانا قابىل الدىم. مەملەكەتتىك قىزمەتتى جاستار ساياساتىنان باستاۋ دا مەن ءۇشىن ەرەكشە مارتەبە. سوندىقتان جاستار ساياساتىنان باستاۋدى ءجون كوردىم», دەيدى د.كارىبەك.
«مەن ءۇشىن بۇگىنگى ەڭ باستى ماسەلە جاستارعا مەملەكەت تاراپىنان قولداۋ بار ەكەنىن سەزىندىرۋ. كوپتەگەن جاقسى جوبا ىسكە اسىرىلىپ جاتىر, رەسۋرستىق ورتالىقتار بار, قانشا مەملەكەتتىك باعدارلاما بولسا دا, جاستاردىڭ بۇدان حابارى از. بۇل, البەتتە وزدىگىنەن ىزدەنبەيتىن جاستاردىڭ, اقپاراتتى دۇرىس جەتكىزبەيتىن مامانداردىڭ سالدارىنان تۋىپ وتىر. سونىمەن بىرگە ءتۇرلى جوبالاردى قولعا الىپ ءبىلىم الۋعا, ەڭبەك ەتۋگە ق ۇلىقسىز جاستاردىڭ سانىن ازايتۋ دا بۇگىنگى كۇننىڭ ماڭىزدى ماسەلەلەرىنىڭ ءبىرى. جاڭا جوبالار ارقىلى ولاردىڭ الەۋمەتتەنۋىنە جاعداي جاساۋ جوسپاردا بار. جاستاردى ايتقاندا ستۋدەنتتەردى ەسكەرمەۋ مۇمكىن ەمەس. ويتكەنى ەلوردا جاستارىنىڭ جارتىسى – ستۋدەنتتەر. سوندىقتان ولاردىڭ بوس ۋاقىتتارىنا, قوعامدىق ومىرىنە, الەۋمەتتىك جاعدايىنا بەي-جاي قاراماۋىمىز كەرەك. وتباسى ماسەلەلەرى دە ءبىزدىڭ نازارىمىزدا. اجىراسۋدى ازايتۋدى دا نەگىزگى ماقساتتىڭ ءبىرى رەتىندە كورىپ وتىرمىز. ويتكەنى وتباسى باقىتتى بولعان كەزدە وتانىمىز دا بەرەكەلى بولماق. وسى تۇرعىزدا اجىراسۋ سەبەبىن ىزدەپ, بۇل سۇراقتى شەشۋگە ارنالعان قولداۋدى كۇشەيتپەكپىز», دەدى جاستار ساياساتى ماسەلەلەرى باسقارماسىنىڭ باسشىسى.
نۇر-سۇلتان قالاسى اكىمدىگىندە جوعارى قىزمەتكە ۇسىنىلعان جاستاردىڭ ءبىرى – لاۋرا دەمەسىنوۆا. ول «Astana» الەۋمەتتىك-كاسىپكەرلىك كورپوراتسياسى» ۇلتتىق كومپانياسى» اق باسقارما توراعاسىنىڭ كەڭەسشىسى قىزمەتىنە تاعايىندالدى.
لاۋرا دەمەسىنوۆا: «اسىعى الشىسىنان تۇسكەن 300-ءدىڭ اراسىندا بولۋ مەن ءۇشىن ماقتانىش. ويتكەنى ىرىكتەلگەندەر تىزىمىنە ەنۋ حالىق ءۇشىن قىزمەت ەتۋىمىزگە, مەملەكەتىمىزدى ودان ءارى دامىتۋعا زور ۇلەس قوسۋعا مۇمكىندىك بەرەدى. ەل بولاشاعى – جاستار دەسەك, كادرلىق رەزەرۆكە ەنۋ وسى جولدا ايانباي تەر توگۋگە ارتىلعان سەنىم», دەيدى.
«الەۋمەتتىك, كورپوراتيۆتىك سالادا بۇعان دەيىن بىرنەشە جىل قىزمەت ەتتىم. سوندىقتان سۇيىكتى قالامداعى الەۋمەتتىك-كاسىپكەرلىك سالاعا ۇلەسىمدى قوسقىم كەلدى. جاڭا قىزمەتىمدە جاستار مەن ايەلدەر كاسىپكەرلىگى مەن يننوۆاتسيانىڭ ىلگەرىلەۋىنە ۇلەس قوسامىن دەپ سەنەمىن. ءتۇرلى الەۋمەتتىك توپتارمەن جۇمىس ىستەپ, «بولاشاق» باعدارلاماسىنىڭ تۇلەكتەرىن بىلگەنىمەن بولىسۋگە, كاسىپكەرلەرگە جاڭا يدەيالار مەن جىگەر بەرۋ ءۇشىن كوبىرەك تارتۋ جوسپاردا بار. ەگەر رەسپۋبليكامىزداعى بارلىق الەۋمەتتىك-كاسىپكەرلىك كورپوراتسيالاردىڭ جۇمىسىنا نازار اۋدارساق, ولار الەۋمەتتىك ماڭىزى زور جوبالاردى جۇزەگە اسىرۋدا. ەلىمىزدىڭ تۇكپىر-تۇكپىرىندەگى اتالعان كورپوراتسيالار كىشىگىرىم كاسىپتى ۇلكەن بيزنەسكە اينالدىرۋعا مۇمكىندىك بەرەدى دەپ بىلەمىن. بۇل سالاداعى ءبىلىمىم مەن تاجىريبەم ەلىمىزدىڭ بيزنەس, يننوۆاتسيا, كاسىپكەرلىك سالاسىنا ۇلەسىمدى قوسۋعا مۇمكىندىك بەرەتىنىنە سەنەمىن», دەيدى لاۋرا دەمەسىنوۆا.
وتكەن اپتادا رەزەرۆشىلەرمەن كەزدەسكەن نۇر-سۇلتان قالاسىنىڭ اكىمى التاي كولگىنوۆ پرەزيدەنتتىك كادرلىق رەزەرۆتىڭ مەريتوكراتيا پرينتسيپىنە سايكەس كەلەتىن جاستارعا ارنالعان الەۋمەتتىك ليفت ەكەنىن ايتىپ وتكەن ەدى. ەلوردا اكىمى قىزمەتىنە كىرىسكەن جاستارعا مەملەكەتتىك اپپاراتتىڭ نەگىزگى مىندەتتەرىنىڭ ءبىرى «حالىق ۇنىنە قۇلاق اساتىن مەملەكەت» تۇجىرىمداماسىن جۇزەگە اسىرۋ, جەدەل جانە ءتيىمدى جۇمىس ىستەۋ, شەشىم قابىلداي ءبىلۋ ەكەنىن دە جەتكىزدى. التاي كولگىنوۆ ء«بىلىم امبيتسيادان جوعارى تۇرۋى كەرەك», دەپ مەملەكەت باسشىسى قاسىم-جومارت توقاەۆتىڭ ءسوزىن تاعى ءبىر ەسكە سالدى.