كەشە سىرتقى ىستەر مينيسترلىگىندە اتالعان ۆەدومستۆونىڭ ءباسپاسوز حاتشىسى ءىلياس وماروۆتىڭ قاتىسۋىمەن جۋرناليستەرگە ارنالعان ءباسپاسوز ءماسليحاتى بولىپ ءوتتى. ءى.وماروۆتىڭ سوزىنە قاراعاندا, قازاقستان پرەزيدەنتى نۇرسۇلتان نازارباەۆتىڭ ارنايى شاقىرۋىمەن 29-31 ناۋرىز ارالىعىندا سلوۆاكيا رەسپۋبليكاسىنىڭ پرەزيدەنتى يۆان گاشپاروۆيچ ەلىمىزدە مەملەكەتتىك ساپارمەن بولماق. بۇل مەملەكەتتىك ساپار كەزىندە قوس تاراپ حالىقارالىق ۇيىم شەڭبەرىندەگى ءوزارا ەكىجاقتى ىنتىماقتاستىق ماسەلەلەرىن تالقىلايتىن بولادى. “بۇل ساپار بارىسىندا, سونداي-اق, ەكى ەلدىڭ ىسكەرلىك توپ وكىلدەرىنىڭ قاتىسۋىمەن بيزنەس-فورۋم ۇيىمداستىرىلىپ, بىرقاتار ماڭىزدى قۇجاتتارعا قول قويىلماق”, دەدى ءى. وماروۆ.
قازاقستان مەن سلوۆاكيا اراسىنداعى ديپلوماتيالىق بايلانىس جولعا قويىلعاننان كەيىن ەكى ەلدىڭ جوعارى دەڭگەيدە ساياسي ۇنقاتىسۋىنا دا مەيلىنشە جول اشىلعان. ماسەلەن, مەملەكەت باسشىسى ن. نازارباەۆتىڭ 2007 جىلدىڭ قاراشا ايىندا سلوۆاكياعا جاساعان مەملەكەتتىك ساپارى وسىنىڭ ايعاعى دەر ەدىك. بۇل ساپار قوس مەملەكەتتىڭ ساياسي ىنتىماقتاستىق تەتىكتەرىنىڭ نىعايۋىنا سەپ بولعان ەدى. قازىرگى تاڭدا قازاقستان مەن سلوۆاكيانىڭ ۇكىمەتارالىق جانە ۆەدومستۆوارالىق بايلانىستارى جاندانىپ كەلەدى. ەكى ەلدىڭ پارلامەنتىندە ارىپتەستىك ۇدەرىستەرىن نىعايتاتىن پارلامەنتارالىق توپتىڭ جۇمىسى جولعا قويىلعان.
ءباسپاسوز ءماسليحاتى بارىسىندا مەملەكەتتىك حاتشى – سىرتقى ىستەر ءمينيسترى قانات ساۋداباەۆتىڭ شىعىس ەۋروپانىڭ بىرقاتار ەلدەرىنە جاسايتىن رەسمي ساپارى دا اتاپ ءوتىلدى. “30 ناۋرىز بەن 1 ءساۋىر ارالىعىندا ەقىۇ-نىڭ ءىس باسىنداعى توراعاسى, مەملەكەتتىك حاتشى – سىرتقى ىستەر ءمينيسترى قانات ساۋداباەۆ مينسك, كيەۆ جانە كيشينەۆ قالالارىندا بولىپ, كەزدەسۋلەر وتكىزەدى. بۇل ساپار بارىسىندا قانات ساۋداباەۆ بەلارۋس, ۋكراينا جانە مولدوۆا ەلدەرىنىڭ پارلامەنت جانە سىرتقى ساياسات ۆەدومستۆولارى باسشىلارىمەن, سونداي-اق, ساياسي پارتيالار جەتەكشىلەرىمەن بەدەلدى ۇيىم توڭىرەگىندەگى ماڭىزدى ماسەلەلەردى كەڭىنەن تالقىلايتىن بولادى”, دەدى ءباسپاسوز حاتشىسى.