اۋدان اكىمى سايران سايفەدەنوۆ وتكەن جىلدىڭ الەۋمەتتىك-ەكونوميكالىق دامۋ قارقىنىن بايانداي كەلىپ, ەڭ الدىمەن, تۇرعىنداردى تولعاندىراتىن ينفراقۇرىلىمدىق ماسەلەلەردى شەشۋ تۋرالى ايتتى. بۇل تۋرالى الماتى قالاسى اكىمدىگىنىڭ ءباسپاسوز قىزمەتى حابارلادى.
تاۋگۇل-3 ىقشام اۋدانىندا ينجەنەرلىك جەلىلەردى دامىتۋ ماقساتىندا 22 كم سۋ قۇبىرلارى جانە 22,7 كم كارىز جۇيەلەرى تارتىلدى.
اۋداندى جارىقتاندىرۋ ءۇشىن بايان-اۋىل, التىن بەسىك ىقشام اۋداندارىندا, التىنسارين, اباي داڭعىلدارىنىڭ, وتەگەن باتىر, سەيىتجانوۆ كوشەلەرىنىڭ بويىنا, №8 ىقشام اۋدانعا ۇزىندىعى 15 كم بولاتىن 469 جارىق كوزدەرى ورناتىلدى. 1137 جارىق نۇكتەلەرى قويىلاتىن دوستىق ىقشام اۋدانىندا جارىقتاندىرۋ قۇرىلىسى اياقتالۋ كەزەڭىندە.
اۋداندا بارلىعى 966 اۋلا بار, بۇلاردى جوندەۋ جۇمىستارى جۇرۋدە. 4 جىلدىڭ ىشىندە 336 اۋلا (38%) جوندەلدى, ونىڭ ىشىندە 96 اۋلا وتكەن جىلى جاڭاردى. 150 اۋلانى جوندەۋ بويىنشا جسق ازىرلەندى.
اۋەزوۆ اۋدانىنىڭ ىقشام ءاۋداندارى «بىر ىقشام اۋدان – ءبىر مەكتەپ – ءبىر بالاباقشا – جاياۋ جۇرگىنشى ايماعى» قاعيداتى بويىنشا جوبالانعان. قازىرگى كەزدە ىقشام اۋداندار ىشىندەگى جاياۋ جۇرگىنشى ايماقتارى قاراۋسىز قالعان, سوندىقتان №8 ىقشام اۋدانداعىداي №10 ىقشام اۋداندا اباتتاندىرۋ جۇمىستارى جۇرگىزىلەتىن بولادى.
اۋدان تۇرعىندارىنىڭ سكۆەرلەر مەن پاركتەردىڭ جەتىسپەيتىنى تۋرالى وتىنىشتەرىنە تۇسىنىك بەرە كەلىپ, الماتى اكىمى بۇل ماسەلەنى «بيۋدجەتكە قاتىسۋ» جوباسى ارقىلى شەشۋگە بولاتىنىن ايتتى.
«اۋەزوۆ اۋدانىنىڭ تۇرعىندارى وسى جوبا بويىنشا بولىنگەن 500 ملن تەڭگەنىڭ جارتىسىنان ازىنا عانا ىسكە اساتىن يدەيالاردى ۇسىندى. وزدەرىڭىزدىڭ تىلەكتەرىڭىزدى ەسكەرە وتىرىپ, قوعامدىق كەڭىستىكتى اباتتاندىرۋ جانە جاسىلداندىرۋ جونىندەگى شەشىمدەردى جۇزەگە اسىرۋعا, بوس ۋاقىتتى دەنساۋلىققا پايدالى وتكىزۋگە بولاتىن ەدى», - دەدى قالا اكىمى باقىتجان ساعىنتاەۆ.
ايتار بولساق, وتكەن جىلى اۋداندا التىن بەسىك ىقشام اۋدانىندا, رايىمبەك, سايىن, اباي داڭعىلدارىنىڭ, التىنسارين, شالياپين, تولە بي, مومىش ۇلى, ياسساۋي كوشەلەرىنىڭ بويىنا 4 مىڭنان استام ءارتۇرلى اعاش وتىرعىزىلدى.