الماتى قالاسىنىڭ اكىمى باقىتجان ساعىنتاەۆ تۇركسىب اۋدانى اكىمىنىڭ تۇرعىندار الدىنداعى ەسەپ بەرۋ كەزدەسۋىنە قاتىستى. بۇل تۋرالى قالا اكىمدىگىنىڭ ءباسپاسوز قىزمەتى حابارلادى.
اۋداننىڭ نەگىزگى الەۋمەتتىك-ەكونوميكالىق كورسەتكىشتەرىنىڭ وسكەنىن تىلگە تيەك ەتكەن اۋدان اكىمى باقىتجان اقجاروۆ بۇعان دەيىنگى كەزدەسۋلەردە ايتىلعان جانە الەۋمەتتىك جەلىلەردە جاريالانعان ماسەلەلەر مەن وتىنىشتەردىڭ قالاي جۇزەگە اسىرىلىپ جاتقانىن بايانداپ بەردى.
ەڭ وزەكتى ماسەلەلەردىڭ ءبىرى – كوممۋنالدىق ينفراقۇرىلىم. مىسالى, 25 مىڭ جەكە ءۇيدىڭ 24 مىڭعا جۋىعى گازبەن قامتاماسىز ەتىلدى. قالعان 929 ۇيگە ماگيسترالدى جەلىلەر تارتىلدى. بۇگىندە 625 ۇيگە ىشكى جۇيەلەردى قوسۋ جانە مونتاجداۋ جۇمىستارى جۇرگىزىلۋدە. ورتالىق سۋمەن جابدىقتاۋ جانە كارىز جۇيەسىنە قوسىلۋ ماسەلەسى دە وزەكتىلىگىن جويماي تۇر. 20 مىڭعا جۋىق ءۇيدىڭ سۋ بۇرۋ جۇيەسى بولماسا, 3 مىڭنان استام ءۇي سۋ جۇيەسىنە قوسىلماعان. وسى ماسەلەنى شەشۋ ءۇشىن «قايرات» پەن «المەرەك» ىقشاماۋداندارىندا ينجەنەرلىك جەلىلەردىڭ قۇرىلىسى اياقتالۋعا جاقىن. ال «نۇرشاشقاندا» جالعاسىپ جاتىر. بۇل جۇمىستار اۋداننىڭ 10 مىڭعا جۋىق تۇرعىنىن قامتىعان 2400 ۇيدى ورتالىق كوممۋنيكاتسيامەن قامتاماسىز ەتۋگە مۇمكىندىك بەرەدى. قالعان ۇيلەر بويىنشا قۇجاتتار دايىندالىپ جاتىر.
اۋداننىڭ تىنىس-تىرشىلىگىن قامتاماسىز ەتۋدەگى ماڭىزدى ماسەلەلەردىڭ ءبىرى – ۇزدىكسىز ەلەكترمەن جابدىقتاۋ. «المەرەك», «قايرات», «نۇرشاشقان» ىقشاماۋداندارى مەن «اۆياتور» باۋ-باقشا قوعامىنىڭ تۇرعىندارى جارىقتىڭ ءتاريفى قىمباتتاعانىن ايتىپ, ونىڭ ءجيى وشەتىنىنە شاعىمداندى. قالا اكىمىنىڭ تاپسىرماسى بويىنشا يەسىز جاتقان جەلىلەردى «اجك» اق-نىڭ بالانسىنا بەرۋ جۇمىستارى جۇرگىزىلۋدە. جۇمىستار 2020 جىلدىڭ شىلدە ايىندا اياقتالادى. سونىمەن قاتار جىل سوڭىنا دەيىن ۇزىندىعى 134 شاقىرىم بولاتىن 254 كوشەنىڭ سىرتقى جارىقتاندىرۋ جەلىلەرى جۇرگىزىلەدى. بۇدان وزگە مايلين, ب. حمەلنيتسكي كوشەسى, ءسۇيىنباي مەن رىسقۇلوۆ, سەيفۋللين داڭعىلدارىنىڭ بويىندا جاڭعىرتۋ جۇمىستارى جۇرگىزىلىپ, 2 مىڭنان استام ۇنەمدى جاڭا جارىق نۇكتەلەرى ورناتىلدى. اعىمداعى جىلى قاپشاعاي كوپىرى مەن جانسۇگىروۆ كوشەسىندەگى شامداردى جاڭعىرتۋ جوسپارلانعان. اۋدان اۋماعىندا 569 اۋلا بار, ونىڭ 400 اۋلاسى جاڭعىرتىلدى. 2020 جىلى تاعى 103 اۋلانى اباتتاندىرۋ جوسپارلانۋدا. قالعان 66 اۋلا جوندەۋگە جارامسىز. سەبەبى 26-سى جاڭا ىقشاماۋداندار بولسا, 40-ى «ەسكى تۇرعىن ءۇي» ساناتىنا جاتقىزىلعان. اۋدان اكىمى ب.اقجاروۆتىڭ مالىمەتىنشە, اعىمداعى جىلى 36 كوشەدە (27 كم استام) جولداردى ورتاشا جوندەۋ جانە 17 كوشەدە (12 كم) تروتۋارلار سالۋ جوسپارلانعان. بۇعان دەيىن ۇزىندىعى 5,5 شاقىرىمنان استام 15 كوشەگە ورتاشا جوندەۋ جۇمىستارى جۇرگىزىلدى. كەزدەسۋدە شاھار باسشىسى باقىتجان ساعىنتاەۆ مەكتەپتەر, ۇيلەر جانە الەۋمەتتىك نىسانداردىڭ جانىندا جاياۋ جۇرگىنشىلەر جولىنىڭ بولماۋىنا شاعىمدانعان تۇرعىنداردىڭ بارلىق ۇسىنىستارىن جيناقتاۋدى تاپسىردى.
«اۋدانداردا باعدارشامداردى ورناتۋ, جاياۋ جۇرگىنشىلەر وتكەلدەرىن رەتكە كەلتىرۋ, سپورت الاڭدارى مەن تروتۋارلار سالۋ بويىنشا جۇرگىزىلىپ جاتقان بارلىق جۇمىستاردى تۇرعىنداردىڭ تىلەكتەرىن ەسكەرە وتىرىپ تۇزەتۋ قاجەت. تۇرعىندار ولار ءۇشىن نەنىڭ جاقسى جانە نەنىڭ قاجەت ەكەنىن جاقسى بىلەدى», – دەپ اتاپ ءوتتى باقىتجان ساعىنتاەۆ.