كەشە تاڭەرتەڭ ماسكەۋ مەتروسىنىڭ “سوكولنيچي” جەلىسىندەگى “لۋبيانكا” جانە “مادەنيەت پاركى” ايالدامالارىندا اراسىنا 47 ءمينوت سالىپ ەكى جارىلىس بولدى. الدىڭعىسى تاڭعى 07.52 ساعاتتا, سوڭعىسى 08.39 ساعاتتا جاسالدى. جارىلىس سالدارىنان بارلىعى 37 ادام قازا تاۋىپ, 65 ادام جارالاندى.جارىلىستى جاساعان جانكەشتى-ايەلدەر كورىنەدى. وقيعا بولعان جەردەن ولاردىڭ دەنەسىنىڭ بولشەكتەرى مەن “شاحيد بەلبەۋىنىڭ” فراگمەنتتەرى تابىلعان. ءبىر نازار اۋدارارلىعى – ەكى جارىلىس تا ەكىنشى ۆاگوندا جۇزەگە اسىرىلعان. الدىن الا جاسالعان قورىتىندى بويىنشا “لۋبيانكا” ايالداماسىنداعى جارىلىستىڭ كۇشى – 3, سوڭعىسىنىكى 1,5 كگ تروتيلدىك بالاماعا تەڭ. بولعان وقيعالار بويىنشا قىلمىستىق ءىس قوزعالدى.
CNN تەلەارناسىنىڭ ايتۋىنا قاراعاندا, چەشەن جانكەشتىلەرىنىڭ ءبىر سايتىندا جارىلىستىڭ جاۋاپكەرشىلىگىن موينىنا العان حابار جاريالانعان. بىراق سايتتىڭ اتاۋى ايتىلمايدى.
رەسەي فەدەراتسياسىنىڭ پرەزيدەنتى د.مەدۆەدەۆ وسى وقيعاعا بايلانىستى شۇعىل كەڭەس وتكىزىپ, تەراكتىلەردىڭ الدىن الۋ شارالارىنىڭ السىزدىگىن سىنعا الدى. قوعامدا تولقۋعا جول بەرىلمەي, تەرروريزمگە قارسى كۇرەس كۇشەيە ءتۇسۋى كەرەك, دەپ ول الەۋەتتى قۇرىلىمدار باسشىلارىنىڭ الدىنا قاتاڭ تالاپ قويدى.
قازىر قالادا ءىىم مەن تجم بىرلەسە وتىرىپ, توتەنشە شتابتار قۇرعان. ولاردىڭ كۇشىمەن “ۆۋلكان” جوسپارىن ىسكە اسىرۋ قولعا الىنىپ وتىر. بۇل – وسى كۇندەرى ماسكەۋ كوشەلەرىندەگى تەكسەرىستەردىڭ كۇشەيە تۇسەتىنىن ايعاقتايتىن امالدار. پرەزيدەنت ادام قۇقىن اياقاستى ەتۋگە جول بەرىلمەسىن دەسە دە, ماسكەۋ ميليتسياسى بۇل كۇندەرى كۇشەيتىلگەن كەزەكشىلىككە كىرىسىپ كەتتى.
ايتا كەتەتىن ءجايت, ماسكەۋ مەتروسىندا مۇنداي تەررورلىق اكت 2004 جىلدان كەيىن ءبىرىنشى رەت جاسالىپ وتىر. سول جىلعى 6 اقپاندا جانە 31 تامىزدا ءدال وسىنداي جارىلىستار جاسالىپ, الدىڭعىسىندا – 41, سوڭعىسىندا 8 ادام وپات بولعان ەدى.