جامبىل وبلىسىنىڭ اكىمى اسقار مىرزاحمەتوۆ تاراز قالاسىن ارالاپ, بىرقاتار ماسەلەنى شەشۋدى تاپسىردى.
اكىم اۋەلى «تاراز سۋ» مەملەكەتتىك كوممۋنالدىق كاسىپورنىندا بولىپ, مەكەمەنىڭ الداعى جوسپارلارىمەن تانىستى. كەزدەسۋ بارىسىندا اتالعان كاسىپورىن ديرەكتورى مارات سمايلوۆ اسقار مىرزاحمەتوۆكە بىرقاتار ماسەلەنىڭ بار ەكەنىن ايتتى. بۇل ورايدا اكىم بۇگىنگى كۇننىڭ تالابى – قالانىڭ سۋ-كارىز جۇيەلەرىن جاماپ-جاسقاۋ ەمەس ەكەندىگىن ايتا كەلىپ, سالاعا تالداۋ جۇمىستارىن جۇرگىزۋ ارقىلى ءبىر جۇيەگە كەلتىرۋ قاجەتتىگىن جەتكىزدى.
بۇل باعىتتا ءبىرىنشى كەزەكتە تاراز قالالىق تۇرعىن ءۇي-كوممۋنالدىق شارۋاشىلىق ءبولىمىنىڭ اتالعان سالاعا قاتىستى جوسپارىن بەكىتىپ, ماسەلەلەردىڭ شەشىمىن تابۋ كەرەكتىگىن باسا ايتتى. بۇل جوسپاردى ارنايى جيىندا قارايتىندىعىن دا مالىمدەدى. سونداي-اق اسقار مىرزاحمەتوۆ وبلىس ەلدى مەكەندەرىندەگى اۋىزسۋ ماسەلەسىن شەشۋ ماقساتىندا جاڭادان قۇرىلعان بىرىڭعاي وپەراتوردىڭ دا ءىسىن جۇيەگە كەلتىرۋدى تاپسىردى. بۇدان وزگە سالا ماماندارىنا مەكەمەنىڭ اۋداندارداعى بولىمشە قىزمەتكەرلەرىنىڭ بىلىكتىلىگىن سارالاپ, كادر ماسەلەسىن دە ءتيىمدى شەشۋ قاجەتتىگى ايتىلدى.
سونىمەن قاتار اسقار مىرزاحمەتوۆ ا.اققوزيەۆ كوشەسىندە ورنالاسقان «ساڭىراۋلاردىڭ قازاق قوعامى» قوعامدىق بىرلەستىگىنىڭ «تاراز وقۋ-وندىرىستىك كاسىپورنى» مەكەمەسىندە دە بولىپ, جۇمىسىمەن تانىستى. بۇگىندە توسەك جابدىقتارى مەن ارنايى جۇمىسشىلارعا ارنالعان كيىمدەر تىگۋمەن اينالىساتىن كاسىپورىننىڭ شەشىلمەي تۇرعان ماسەلەسى – وندىرىلەتىن ونىمدەرگە تاپسىرىس الۋ ەكەن. كوتەرىلگەن ماسەلە بويىنشا اكىم جاۋاپتى تۇلعالارعا وڭىردەگى مەكەمەلەردىڭ مەملەكەتتىك تاپسىرىسىن جۇيەگە كەلتىرۋدى تاپسىردى.
بۇدان كەيىن اسقار مىرزاحمەتوۆ «اسار» جامبىل وبلىسى مۇگەدەكتەر ۇيىمدارىنىڭ وداعى» زاڭدى تۇلعالار بىرلەستىگىنە دە باردى. بىرلەستىك جەتەكشىلەرىنىڭ ماسەلەسىن بىلگەن اكىم تاراز قالاسىنداعى «مامىر» ساياباعىنىڭ اۋماعىندا ورنالاسقان عيماراتتاردىڭ جاقىن ارادا جوندەلەتىنىن جەتكىزدى. ءوز سوزىندە اكىم بىرلەستىك باسشىلارىنا جوسپارلارىن دايىنداۋ كەرەكتىگىن ايتتى. سونداي-اق قالانىڭ اۆتوبەكەت اۋماعىنداعى تالاس وزەنىنىڭ بويىندا ورنالاسقان كوپىرگە تەحنيكالىق تەكسەرىس جۇمىستارىن دا كوردى. كەيىننەن اسقار مىرزاحمەتوۆ جاۋاپتى تۇلعالارعا اتالعان جۇمىستىڭ ساپالى جانە ۋاقىتىندا ورىندالۋى بويىنشا ءتيىستى تاپسىرمالار بەردى.
جامبىل وبلىسى