بيىل «قازاقستان» جانە «تولقىن» سپورت كەشەندەرىنە اۋقىمدى رەكونسترۋكتسيا جۇرگىزۋ جوسپارلانعان. بۇل تۋرالى قالا اكىمدىگىنىڭ رەسمي سايتى حابارلادى.
«مەملەكەت باسشىسىنىڭ تاپسىرماسىمەن وسى جىلى «قازاقستان» جانە «تولقىن» سپورت كەشەندەرىنە رەكونسترۋكتسيا جۇرگىزىلمەك. «قازاقستان» سپورت كەشەنى قازىرگى تاڭدا حوككەي اۋەسقويلارىنىڭ ورتالىعىنا اينالدى. ونىڭ ىشىندە 1000 شاقتى ەرەسەك ادام كىرەتىن 32 كوماندا, سونداي-اق 440 بالادان تۇراتىن 24 كوماندا بار. كەشەندە تۇراقتى تۇردە تۋرنيرلەر ءوتىپ تۇرادى, بىلتىر 450 تۋرنير وتكەن», - دەدى الماتى اۋدانىنىڭ اكىمى ادىلبەك سارسەمباەۆ تۇرعىندارمەن ەسەپ بەرۋ كەزدەسۋىندە.
اۋدان اكىمىنىڭ ايتۋىنشا, بۇقارالىق سپورتتى دامىتۋ جوسپارىن جۇزەگە اسىرۋ اياسىندا بىلتىر اۋداندا ترياتلوننان قىسقى چەمپيونات, «ياركوكروسس», «كوڭىلدى ستارت», وتباسىلىق ەستافەتالار سەكىلدى 95 سپورتتىق ءىس-شارا ۇيىمداستىرىلدى. وعان اۋداننىڭ 3 مىڭنان اسا تۇرعىنى قاتىسقان.
«وتكەن جىلى ءبىز 4 «workout» زونا مەن 6 فۋتبول الاڭىن سالدىق. سونىمەن قاتار 41 سپورت الاڭقايىنا جوندەۋ جۇرگىزدىك. بۇدان بولەك, اۋداننىڭ 5 سپورت كەشەنىنەن تۇراتىن سپورتتىق ينفراقۇرىلىمىن كوپبەيىندى تەننيس ورتالىعى تولىقتىردى. ونىڭ ىشىندە 14 كورت پەن 2 جاتتىعۋ زالى بار. ورتالىقتىڭ اشىلۋ سالتاناتىنا تانىمال تەننيسشىلەر رافاەل نادال مەن نوۆاك دجوكوۆيچ قاتىستى», - دەدى ول.