قازاقستاننىڭ پورتۋگاليا رەسپۋبليكاسىنداعى ەلشىسى داۋلەت باتىراشەۆ پورتۋگاليانىڭ وڭتۇستىك ءوڭىرى الگارۆەگە جۇمىس ساپارىمەن باردى. بۇل تۋرالى سىرتقى ىستەر مينيسترلىگىنىڭ ءباسپاسوز قىزمەتى حابارلادى.
ساپار اياسىندا فارو قالاسىنىڭ اكىمشىلىك ورتالىعىنىڭ, الگارۆەنىڭ ۇيلەستىرۋ جانە دامۋ كوميسسياسىنىڭ باسشىلىعىمەن, سونداي-اق وڭىرلىك ىسكەرلىك توپتاردىڭ وكىلدەرىمەن كەزدەسۋلەر ءوتتى.
الگارۆە ءوڭىرىنىڭ ۇيلەستىرۋ جانە دامۋ كوميسسياسىنىڭ توراعاسى فرانسيشكۋ سەررامەن سۇحبات بارىسىندا ساۋدا-ەكونوميكالىق سالاسىنداعى ىنتىماقتاستىق, وتاندىق تاۋارلار ەكسپورتىن ىلگەرىلەتۋ جانە تۋريستىك سالادا ارەكەتتەسۋدى نىعايتۋ ماسەلەلەرى تالقىلاندى.
ەلشىنىڭ فارۋ قالاسىنىڭ اكىمى روجەريو باكالياۋمەن كەزدەسۋى الگارۆەمەن ىنتىماقتاستىقتىڭ الەۋەتتى باعىتتارىنا ارنالدى. سۇحباتتاسۋشىلار قازاقستان-پورتۋگالدىق ىنتىماقتاستىعىنىڭ مۇمكىندىكتەرىن جوعارى باعالاپ, وڭىرلىك دەڭگەيدە تىعىز ءارى ناتيجەلى بايلانىستاردى ورناتۋدىڭ جەتكىلىكتى العىشارتتارى بار ەكەنىنە كەلىستى.
پورتۋگالدىق ساياساتكەر اقتاۋ قالاسىمەن باۋىرلاس قارىم-قاتىناس ورناتۋعا قىزىعۋشىلىق پەن دايىندىعىن ءبىلدىردى. سونىمەن قاتار بيىل الگارۆەدە قازاقستاننىڭ قۇرمەتتى كونسۋلدىعىن اشۋعا ۋاعدالاستىققا قول جەتكىزىلدى.
ءوڭىردىڭ كومپانيالارىمەن بايلانىستار ورناتۋ ماقساتىندا, الگارۆە كاسىپكەرلەر قاۋىمداستىعىنىڭ پرەزيدەنتى ۆيتور نەتۋ جانە ساۋدا جانە قىزمەت كورسەتۋ قاۋىمداستىعىنىڭ اتقارۋشى ديرەكتورى انا فەرناندەشپەن كەلىسسوزدەر وتكىزىلدى.
كەلىسسوزدەر شەڭبەرىندە كاسىپكەرلەر قوعامداستىعىنىڭ الدىندا تۇرعان مىندەتتەر, قازاقستان ەكونوميكاسىنا ينۆەستيتسيالار تارتۋ بويىنشا ناقتى جوبالاردى ىسكە اسىرۋ جانە پورتۋگال بيزنەس-دەلەگاتسيالارىنىڭ ساپارلارىن ۇيىمداستىرۋ ماسەلەلەرى تالقىلاندى.
قازاقستاندىق ديپلومات ەلىمىزدە شەتەلدىك ينۆەستورلاردى قورعاۋ جونىندەگى ءىس-شارالار جانە قازاقستاندا بيزنەس جۇرگىزۋدىڭ تاجىريبەلىك اسپەكتىلەرى جونىندە اقپارات بەردى. ءبىرىنشى كەزەكتە تۋريزم, جوعارى تەحنولوگيالار جانە اۋىل شارۋاشىلىعى سالاسىنداعى ءوزارا ءتيىمدى ىنتىماقتاستىققا ەرەكشە نازار اۋدارىلدى. سونىمەن قاتار ىسكەر توپتار قازاقستاننىڭ گەوگرافيالىق ورنالاسۋى مەن ترانزيتتىك-كولىكتىك الەۋەتى مەن مۇمكىندىكتەرىن ەسكەرە وتىرىپ, لوگيستيكا جانە جۇكتەردى تاسىمالداۋ سالاسىندا سەرىكتەستىك قۇرۋعا نازارىن اۋدارىپ, قىزىعۋشىلىعىن تانىتتى.
كەزدەسۋلەر قورىتىندىسى بويىنشا, وتاندىق بيزنەس قۇرىلىمدارىمەن بايلانىستار ورناتۋ ءۇشىن الگارۆە كومپانيالارىنىڭ قازاقستانعا ەكونوميكالىق ميسسيالارىن ۇيىمداستىرۋىنا قىزىعۋشىلىعى راستالدى.
ايتا كەتەيىك, الگارۆە - پورتۋگاليانىڭ وڭتۇستىگىندە ورنالاسقان ايماق. اۋماعى - 4995 شارشى كم. حالقى - 451 006 ادام. اكىمشىلىك ورتالىعى - فارو قالاسى. ايماق ەكونوميكاسىنىڭ نەگىزىن تۋريزم قۇرايدى. قىزمەت كورسەتۋ سالاسى جۇمىس ورىندارىنىڭ كوپ بولىگىن قامتاماسىز ەتەدى جانە وبلىستىڭ ىشكى جالپى ءونىمىنىڭ قوماقتى بولىگى بولىپ تابىلادى. ايماقتىڭ ءداستۇرلى سالالارى - بالىق اۋلاۋ جانە اۋىل شارۋاشىلىعى. سوڭعى جىلدارى بالىق فەرمالارى مەن اكۆامادەنيەتى مىقتى پوزيتسياعا يە بولدى. سوندىقتان پورتۋگاليادا وندىرىلەتىن تەڭىز تاعامدارمەن ۋستريتسالاردىڭ 90%-ى قازىرگى ۋاقىتتا الگارۆادا وندىرىلەدى.