جامبىل وبلىسىنىڭ اكىمى اسقار مىرزاحمەتوۆ تاراز قالاسىنداعى بىرقاتار نىساندى ارالادى. بۇل تۋرالى وبلىس اكىمدىگىنىڭ ءباسپاسوز قىزمەتى حابارلادى.
ايماق باسشىسى الدىمەن «جامبىل سۋ» مەملەكەتتىك كوممۋنالدىق كاسىپورنىندا بولىپ, الداعى جوسپارلارىمەن تانىستى. مەكەمەنىڭ تىنىس-تىرشىلىگىمەن تانىستىرعان كاسىپورىن ديرەكتورى مارات سمايلوۆ بىرقاتار ماسەلەنىڭ بارىن جەتكىزدى. ءوز كەزەگىندە ايماق باسشىسى بۇگىنگى كۇننىڭ تالابى قالانىڭ سۋ-كارىز جۇيەلەرىن جاماپ-جاسقاۋ ەمەس ەكەندىگىن العا تارتىپ, سالاعا تالداۋ جۇمىستارىن جۇرگىزۋ ارقىلى ءبىر جۇيەگە كەلتىرۋ قاجەتتىگىن جەتكىزدى. بۇل باعىتتا ءبىرىنشى كەزەكتە قالالىق تۇرعىن ءۇي-كوممۋنالدىق شارۋاشىلىق ءبولىمىنىڭ اتالعان سالاعا قاتىستى جوسپارىن بەكىتىپ, جۇمىستى شەگەلەپ شەشىپ تاستاۋ كەرەكتىگىن باسا ايتتى. بۇل جوسپاردى ارنايى جيىندا قارايتىندىعىن دا تىلگە تيەك ەتتى. سونداي-اق ءوڭىر باسشىسى وبلىس ەلدى مەكەندەرىندەگى اۋىز سۋ ماسەلەسىن شەشۋ ماقساتىندا جاڭادان قۇرىلعان بىرىڭعاي وپەراتوردىڭ دا ءىسىن جۇيەگە كەلتىرۋدى تاپسىردى. بۇدان وزگە سالا ماماندارى مەكەمەنىڭ اۋداندارداعى بولىمشە قىزمەتكەرلەرىنىڭ بىلىكتىلىگىن سارالاپ, كادر ماسەلەسىن دە ءتيىمدى شەشۋ قاجەت.
سونىمەن قاتار وبلىس اكىمى ا.اققوزيەۆ كوشەسىندە ورنالاسقان «ساڭىراۋلاردىڭ قازاق قوعامى» قوعامدىق بىرلەستىگىنىڭ «تاراز وقۋ-وندىرىستىك كاسىپورنى» مەكەمەسىندە دە بولىپ, جۇمىسىمەن تانىستى. بۇگىندە توسەك جابدىقتارى مەن ارنايى جۇمىسشىلارعا ارنالعان كيىمدەر تىگۋمەن اينالىساتىن كاسىپورىننىڭ شەشىلمەي تۇرعان ماسەلەسى وندىرىلەتىن ونىمدەرگە تاپسىرىس الۋ ەكەن. كوتەرىلگەن ماسەلە بويىنشا ايماق باسشىسى جاۋاپتى تۇلعالارعا وڭىردەگى مەكەمەلەردىڭ مەملەكەتتىك تاپسىرىسىن جۇيەگە كەلتىرۋدى تاپسىردى.
كەلەسى كەزەكتە ايماق باسشىسى «اسار» جامبىل وبلىسى مۇگەدەكتەر ۇيىمدارىنىڭ وداعى» زاڭدى تۇلعالار بىرلەستىگىنە باردى. بىرلەستىك جەتەكشىلەرىنىڭ پروبلەماسىنا قۇلاق اسقان ايماق باسشىسى «مامىر» ساياباعىنىڭ اۋماعىندا ورنالاسقان عيماراتتارىنا جاقىن ارادا جوندەلەتىنىن جەتكىزدى. ول جونىندە بىرلەستىك باسشىلارىنا جوسپارلارىن دايىنداۋ كەرەك دەدى. سونداي-اق اۆتوبەكەت اۋماعىنداعى تالاس وزەنىنىڭ بويىندا ورنالاسقان كوپىرگە تەحنيكالىق تەكسەرىس جۇمىستارىنا قانىقتى. ءوز كەزەگىندە وبلىس اكىمى جاۋاپتى تۇلعالارعا اتالعان جۇمىستىڭ ساپالى جانە ۋاقىتىندا اياقتالۋى بويىنشا ءتيىستى تاپسىرمالار بەردى.