كانادانىڭ كالگاري قالاسىندا فريستايل-موگۋلدان كەزەكتى الەم كۋبوگى اياقتالدى. جارىس قورىتىندىسى بويىنشا قازاقستان قۇراماسىنىڭ سپورتشىلارى ەكى مەدالعا يە بولدى, دەپ حابارلايدى Olympic.kz.
2018 جىلعى قىسقى وليمپيادا ويىندارىنىڭ قولا جۇلدەگەرى يۋليا گالىشەۆا كۇمىس جۇلدەمەن كوزگە ءتۇستى. قازاقستاندىق سپورتشى ءبىرىنشى كەزەڭدە ۇزدىك التىلىققا ەنىپ, فينالعا شىقتى. جارىستىڭ شەشۋشى كەزەڭىندە 2019 جىلعى الەم چەمپيونى 80,69 ۇپاي جينادى. بۇل ونىڭ ەكىنشى ساتىعا كوتەرىلۋىنە سەپ بولدى. اتالعان جارىستا ايەلدەر اراسىندا ءبىرىنشى ورىنعا فرانتسيالىق پەررين لاففون (81,22) يە بولسا, ۇزدىك ۇشتىكتى كانادالىق جيۋستين ديۋفور-لاپاۋنت (79,94) قورىتىندىلادى.
ءوز كەزەگىندە دميتري رەيحارد ءبىرىنشى كەزەڭدە بەسىنشى ورىننان كورىندى. ال فينالدىق كەزەڭدە ناتيجەسىن جاقسارتىپ, ۇزدىك ۇشتىك قاتارىنا ەندى جارىس ناتيجەسى بويىنشا دميتري 84,19 ۇپاي جيناپ, ەل قورجىنىنا قولا جۇلدەنى سالدى. كانادالىق ميكاەل كينگسبەري (89,09) التىننان القا تاقسا, شۆەتسيالىق ۋولتەر ۋولبەرگ (85,10) كۇمىسكە يەلىك ەتتى.