ۋرا! وڭتۇستىك قازاقستان وبلىسىندا ميلليوندىق مەجەگە دە قول جەتتى. اڭگىمە ۇستىمىزدەگى جىلى وبلىستىڭ القاپتارىنان جينالىپ الىنعان كوكونىس, كارتوپ جانە باقشا داقىلدارى سەكىلدى اۋىل شارۋاشىلىعى ونىمدەرى تۋرالى بولىپ وتىر. مۇنىڭ جايىن «يۋجنىي كازاحستان» گازەتى حابارلاپ, جۇرتشىلىقتان ءسۇيىنشى سۇرادى.
ۇلتتى ۇيىستىرعان ۇجماقتى ولكەدەگى وسىناۋ وراسان زور ەگىنشىلىك تابىسىنا سارىاعاش اۋدانى ديقاندارىنىڭ قوسقان ۇلەستەرى بارىنەن دە كوپ بولدى. مۇندا قازىرگە دەيىن 140 مىڭ توننادان استام ءونىم جينالىپ وتىر. ال قاۋىن مەن قاربىزدى كوبىرەك وندىرگەن وڭىرلەردىڭ كوشىن ماقتاعا باي ماقتاارال اۋدانىنىڭ باقشاشىلارى باستادى. مۇندا 266 مىڭ توننا اتالمىش ءونىم ساتۋعا جونەلتىلدى. بۇلاردىڭ سوڭىن 143 مىڭ توننالىق كورسەتكىشپەن شاردارا اۋدانى الىپ كەلەدى.
وبلىستىڭ اۋىل شارۋاشىلىعى باسقارماسىنداعىلار اۋىل شارۋاشىلىعى داقىلدارىنان الىناتىن ءونىمنىڭ الداعى ۋاقىتتاردا بۇدان دا ارتا تۇسەتىنىن جەتكىزىپ وتىر.
سۇلتان بوزايعىر.