جيددا قالاسىنداعى يسلام ىنتىماقتاستىعى ۇيىمىنىڭ (يىۇ) شتاب-پاتەرىندە حالىقارالىق عىلىمي قاۋىمداستىق وكىلدەرىن توعىستىرعان كەزدەسۋ ءوتتى. باسقوسۋدا ارىپتەستىكتى دامىتۋ, ءبىلىم بەرۋ, عىلىم جانە تەحنولوگيا سالالارىندا قازاقستاننىڭ باستامالارىن جۇزەگە اسىرۋ ماسەلەلەرى تالقىلاندى.
ءىس-شاراعا قازاقستاننىڭ ساۋد ارابياسى كورولدىگىندەگى ەلشىسى بەرىك ارىن, ءال-فارابي اتىنداعى قازۇۋ رەكتورى عالىم مۇتانوۆ جانە قازۇاۋ رەكتورى تىلەكتەس ەسپولوۆ, يىۇ باس حاتشىسىنىڭ ورىنباسارى احمەد سەنومو, عىلىم جانە تەحنولوگيالار دەپارتامەنتىنىڭ باس ديرەكتورى يرفان شاۋكات باستاعان عالىمدار قاتىستى.
يىۇ-نىڭ عىلىم جانە تەحنولوگيالار جونىندەگى تۇڭعىش ءسامميتى 2017 جىلى ەلوردا تورىندە شىمىلدىعىن ءتۇردى. سامميتتە تۇڭعىش پرەزيدەنت – ەلباسى نۇرسۇلتان نازارباەۆ يىۇ-15 ديالوگ پلاتفورماسىن قۇرۋ يدەياسىن ۇسىنعان بولاتىن. وسى ورتاق الاڭ عىلىمي-تەحنيكالىق پروگرەستى جاڭعىرتۋ جانە ودان ءارى دامىتۋ, يسلام الەمىندەگى ماڭىزدى ەكونوميكالىق ماسەلەلەردى شەشۋ ماقساتىندا 15 جەتەكشى مۇسىلمان ەلىن بىرىكتىرەدى.
قازاقستاندىق دەلەگاتسيانى قۇرمەتپەن قارسى العان ا.سەنومو يسلام الەمىنىڭ جەتەكشى ۋنيۆەرسيتەتى قازۇۋ بىلتىر الماتىدا وتكەن ماڭىزدى وقيعا – ەلباسى ن. نازارباەۆتىڭ «يىۇ-15 ديالوگ پلاتفورماسى» باستاماسىن ىسكە اسىرۋ جونىندەگى العاشقى وتىرىسىنىڭ بىرلەسكەن ۇيىمداستىرۋشىلارىنىڭ ءبىرى بولعانىن اتاپ ءوتتى. باس حاتشىنىڭ ورىنباسارى يىۇ-دىڭ عىلىم مەن تەحنولوگيالاردى دامىتۋ بويىنشا سەرىكتەس جانە بازالىق ۋنيۆەرسيتەت سانالاتىن قازۇۋ مۇسىلمان ەلدەرىندە عىلىمدى, تەحنيكا مەن يننوۆاتسيالاردى دامىتۋعا كەدەرگى كەلتىرەتىن ماسەلەلەردى ەڭسەرۋ جولدارىن ىزدەستىرۋ, سونداي-اق عىلىمي ينتەگراتسيالىق ماسەلەلەردى شەشۋگە باعىتتالعان باستامالاردى ىلگەرىلەتۋ بويىنشا ءوز ميسسياسىن ءتيىمدى جۇزەگە اسىرىپ وتىرعانىن جەتكىزدى.
يىۇ وكىلدەرى جاڭا بۋىن جوو ۇلگىسى ءال-ءفارابيدىڭ قايىرىمدى قوعام ازاماتتارىن قالىپتاستىرۋ يدەيالارى نەگىزىندە قازۇۋ-دا ازىرلەنىپ, بۇۇ شتاب-پاتەرىندە تانىستىرىلعان «ۋنيۆەرسيتەت 4.0» مودەلىنە ۇلكەن قىزىعۋشىلىق تانىتتى. كەزدەسۋ بارىسىندا عىلىم جانە يننوۆاتسيا سالالارىندا ىنتىماقتاستىقتى كەڭەيتۋ مۇمكىندىكتەرى, سونىڭ ىشىندە قازۇۋ-دا «جىبەك جولى ۋنيۆەرسيتەتتەرىنىڭ اليانسى» حالىقارالىق IT-كلاستەرى مەن الەم ۋنيۆەرسيتەتتەرىنىڭ جاڭا تەحنولوگيالار سالاسىنداعى پلاتفورماسى بولاتىن زاماناۋي ءال-فارابي عىلىمي-تەحنولوگيالىق القابىن قۇرۋ ماسەلەلەرى تالقىلاندى.
ۋنيۆەرسيتەتتىڭ رەكتورى, اكادەميك عالىم مۇتانوۆ حالىقارالىق كولەمدە جوسپارلانىپ وتىرعان وركەنيەتتىڭ ۇلى ويشىلى ءابۋ ناسىر ءال-ءفارابيدىڭ 1150 جىلدىعىنا ارنالعان اۋقىمدى ءىس-شارالار تۋرالى بايانداپ, يىۇ باسشىلىعىن وتكىزىلەتىن مەرەيتويلىق شارالارعا قاتىسۋعا شاقىردى.
ءوز كەزەگىندە اكادەميك تىلەكتەس ەسپولوۆ قازۇاۋ قىزمەتى مەن جەتىستىكتەرى, اۋىل شارۋاشىلىعى سالاسىنداعى زەرتتەۋلەرى, ازىق-ت ۇلىك قاۋىپسىزدىگى مەن سۋ رەسۋرستارىنىڭ تاپشىلىعى تۋرالى ەگجەي-تەگجەيلى بايانداپ بەردى. ول ازىق-ت ۇلىك قاۋىپسىزدىگى جونىندەگى يسلام ۇيىمىنىڭ قىزمەتى اياسىندا يىۇ-مەن ىنتىماقتاستىققا دايىن ەكەنىن جەتكىزدى.
عىلىم جانە تەحنولوگيالار دەپارتامەنتىنىڭ باس ديرەكتورى يرفان شاۋكات كونسترۋكتيۆتى ۇسىنىستار ءۇشىن العىسىن ءبىلدىرىپ, ءبىلىم وردالارىنىڭ عىلىمي-زەرتتەۋ جانە يننوۆاتسيالىق الەۋەتىنىڭ جوعارى دەڭگەيىن اتاپ ءوتتى. قازۇۋ-دىڭ وزىق تاجىريبەسىن ەسكەرە وتىرىپ, يسلام الەمىنىڭ جوعارى وقۋ ورىندارىن حالىقارالىق رەيتينگتەردە ىلگەرىلەتۋدى بىرلەسىپ ۇيلەستىرۋگە ەرەكشە قىزىعۋشىلىق ءبىلدىردى. ول قازۇۋ-عا يىۇ قامقورولىعىنداعى يسلام الەمى ۋنيۆەرسيتەتتەرىنىڭ عىلىمي-ءبىلىم بەرۋ ىنتىماقتاستىعى جەلىسىنە باسشىلىق ەتۋدى ۇسىندى.
كونسترۋكتيۆتى ديالوگ كورول ابداللا اتىنداعى عىلىمي-تەحنولوگيالىق ۋنيۆەرسيتەتىندە دە (عتۋ) جالعاسىن تاپتى. ۋنيۆەرسيتەت رەكتورى دوكتور توني چان قىزمەت باعىتتارى مەن جۇرگىزىلىپ جاتقان زەرتتەۋلەرگە تولىعىراق توقتالىپ, قازاقستاندىق قوناقتاردى زاماناۋي جابدىقتالعان الەمدەگى ۇزدىك جوو-نىڭ ءبىرى بولىپ تابىلاتىن ۋنيۆەرسيتەتتىڭ وقۋ بازاسىمەن تانىستىردى.
كەزدەسۋ بارىسىندا تاراپتار ءبىلىم, عىلىم جانە يننوۆاتسيا سالالارىنداعى ەكى جاقتى ءوزارا ءتيىمدى سەرىكتەستىكتى دامىتۋعا ءازىر ەكەندىكتەرىن ءبىلدىردى. رەكتور ت.چان اتاپ وتكەندەي, كورول ابداللا اتىنداعى عتۋ قازاقستاندىق جەتەكشى جوو-مەن ىنتىماقتاستىق ورناتۋعا, عىلىم مەن جاڭا تەحنولوگيالاردىڭ باسىم باعىتتارى بويىنشا بىرلەسكەن زەرتتەۋ جۇمىستارىن جۇزەگە اسىرىپ, اكادەميالىق ۇتقىرلىق پەن قوس ديپلومدى ءبىلىم باعدارلامالارىن دامىتۋعا مۇددەلى.
عتۋ-عا ساپارى بارىسىندا قازاقستاندىق دەلەگاتسيا اتالعان ۋنيۆەرسيتەتتە ءبىلىم الىپ جاتقان ەلىمىزدىڭ ستۋدەنتتەرىمەن دە كەزدەستى. قازىرگى تاڭدا بۇل جوعارى وقۋ ورنىندا ماگيستراتۋرا, دوكتورانتۋرا جانە پوستدوكتورانتۋرا ساتىسىندا قازاقستاننان كەلگەن جالپى 40-قا جۋىق ءبىلىم الۋشى بار.