«سامۇرىق-قازىنا» ۇاق» اق مەن قازاقستاننىڭ تۇڭعىش پرەزيدەنتى – ەلباسى ن.نازارباەۆ قورى اراسىندا مەموراندۋمعا قول قويىلدى. وسى قۇجاتتىڭ نەگىزىندە سال اۋرۋىنا شالدىققان بالالارعا ارنالعان 8 وڭالتۋ ورتالىعى مەن 16 قوسىمشا ينكليۋزيۆتى قولداۋ كابينەتىن اشۋ كوزدەلگەن.
«سامۇرىق-قازىنا» ۇاك» اق باسقارما توراعاسى احمەتجان ەسىموۆتىڭ ايتۋىنشا, قور سوڭعى جىلدارى قازاقستانداعى قايىرىمدىلىق باعدارلامالارىنىڭ ەڭ ءىرى دونورىنا اينالدى. اتاپ ايتقاندا, ونىڭ قايىرىمدىلىق ماقساتقا بولگەن قاراجاتىنىڭ كولەمى سوڭعى 5 جىلدا 60 ميلليارد تەڭگەدەن اسىپ, ۇزىن سانى 1 ميلليوننان استام ادامدى قامتىدى.
– مەموراندۋم اياسىندا بىرقاتار الەۋمەتتىك جوبالاردى جۇزەگە اسىرۋ جوسپارلانۋدا. تۇڭعىش پرەزيدەنت – ەلباسىنىڭ باستاماسى «قامقورلىق» باعدارلاماسى ىسكە قوسىلادى. وسىنداي باعدارلامالاردى جۇزەگە اسىرۋ ارقىلى «سامۇرىق-قازىنا» قورى اۋىر جاعدايعا تاپ بولعان ادامداردىڭ ماسەلەلەرىن شەشۋگە ەلەۋلى ۇلەسىن قوساتىنىنا سەنىمدىمىن, – دەدى ا.ەسىموۆ.
ۇلتتىق ءال-اۋقات قورىنىڭ باسشىسى «قامقورلىق» باعدارلاماسى بيزنەستىڭ, مەملەكەتتىڭ جانە ۇكىمەتتىك ەمەس ۇيىمداردىڭ ۇشجاقتى ىنتىماقتاستىعىنىڭ جارقىن ۇلگىسى ەكەنىن ايتتى. بۇل باعدارلاما سال اۋرۋىنا دۋشار بولعان بالالاردى وڭالتۋ, ينكليۋزيۆتى قولداۋ كابينەتتەرى مەن ماتەريالدىق-تەحنيكالىق جابدىقتاۋ باعىتتارى بويىنشا الەۋمەتتىك ماسەلەلەردى شەشۋدى قاراستىرادى.
تۇڭعىش پرەزيدەنت قورى 171 ماماندى وقىتىپ, اتالعان ورتالىقتاردى اشۋ ءۇشىن 49 ارنايى ماماننىڭ بىلىكتىلىگىن ارتتىرماق. جەرگىلىكتى اتقارۋشى ورگاندار ءتيىستى ءۇي-جاي دايىندايدى. جاڭا وڭالتۋ ورتالىقتارى مەن ينكليۋزيۆتى قولداۋ كابينەتتەرى اۋرۋحانالار, ەمحانالار جانە جالپى ءبىلىم بەرەتىن مەكتەپتەر بازاسىندا اشىلادى.
– ءبىزدىڭ جۇمىس توبىمىز بارلىق ايماقتى ارالاپ, وڭالتۋ ورتالىقتارى مەن ينكليۋزيۆتى كابينەتتەر ورنالاساتىن ەلدى مەكەندەردى انىقتادى. ولار 8 وبلىستا جۇمىس ىستەپ تۇرعان اۋرۋحانالار, ەمحانالار جانە جالپى ءبىلىم بەرەتىن مەكتەپتەر بازاسىندا اشىلادى. العاشقى كەزەڭگە قاجەتتى ماماندار, جابدىقتار ءتىزىمى انىقتالدى. مامانداردى دايارلاۋ جانە قايتا دايارلاۋ باعدارلامالارى ازىرلەندى. ەلباسى الدىمىزعا وسى جىلى وڭالتۋ ورتالىقتارىن اشۋ مىندەتىن قويدى. ارينە بۇل ۇلكەن جۇمىس, – دەدى قازاقستاننىڭ تۇڭعىش پرەزيدەنتى – ەلباسى قورىنىڭ اتقارۋشى ديرەكتورى ءا.يسەكەشەۆ.
ءا.يسەكەشەۆ بۇل ىستە قولداۋ بىلدىرگەن «سامۇرىق-قازىنا» كومپانياسىنا العىسىن ءبىلدىرىپ, ەرەكشە قاجەتتىلىكتەرى بار بالالار الداعى ۋاقىتتا دا نازاردان تىس قالمايتىنىن ايتتى.