ۇلى وتان سوعىسىنداعى جەڭىستىڭ 75 جىلدىعى قارساڭىندا قاراعاندىلىق ارداگەرلەرگە 1 ميلليون تەڭگەدەن بەرىلەتىن بولدى. بۇل تۋرالى قاراعاندى قالالىق ىشكى ساياسات ءبولىمىنىڭ باسشىسى دارحان جيەنباەۆ اپپارات كەڭەسىندە حابارلادى.
– ۇلى جەڭىستىڭ 75 جىلدىعىنا بايلانىستى ءىس-شارالار جوسپارىنىڭ جوباسى دايىندالدى. ءداستۇر بويىنشا 9 مامىر كۇنى «ماڭگىلىك الاۋ» اسكەري داڭق مەموريالىندا ەسكە الۋ ميتينگىسى وتەدى. جەڭىس ساياباعىندا مەرەكەلىك باعدارلاما ۇيىمداستىرىلادى. ۇلى وتان سوعىسىنا قاتىسۋشىلار 1 ميلليون تەڭگە كولەمىندە ءبىر جولعى تولەم الادى, دەدى ول.
سونىمەن قاتار «ارداعىم – ارداگەرىم» اكتسياسى اياسىندا ەرىكتى جاستار تازالاۋ نەمەسە جوندەۋ جۇمىستارىن جۇرگىزۋ, تۇرمىستىق ماسەلەلەردى شەشۋگە كومەكتەسۋ ماقساتىندا قارت ادامداردىڭ ۇيلەرىنە بارادى.
اقپان ايىندا سوۆەت اسكەرلەرىنىڭ اۋعانستاننان شىعارىلعانىنا 31 جىل تولادى. ءبولىم باسشىسىنىڭ ايتۋىنشا, جاۋىنگەر-ينتەرناتسيوناليستەرگە 100 مىڭ تەڭگەدەن ماتەريالدىق كومەك كورسەتىلمەكشى.
قازىرگى تاڭدا قاراعاندىدا ۇلى وتان سوعىسىنىڭ 38 قاتىسۋشىسى مەن مۇگەدەگى بار. سونىمەن قاتار, وبلىس ورتالىعىندا اۋعانستاندا اسكەري بورىشىن وتەگەن 698 ارداگەر تۇرادى.