ۇلى تۇلعالاردىڭ ۇلاعاتتى ويلارى ءبىر-بىرىمەن اسەم ۇيلەسىپ, ادەمى ۇندەسىپ جاتادى. سونىڭ كەرەمەت, كەرميىق, كوركەم ءبىر كورىنىسى – ەلباسى نۇرسۇلتان ءابىش ۇلى نازارباەۆ « ۇلى دالانىڭ جەتى قىرى» مەن پرەزيدەنت قاسىم-جومارت كەمەل ۇلى توقاەۆتىڭ «اباي جانە ءححى عاسىرداعى قازاقستان» اتتى ماقالاسى. وسى ايتۋلى ەكى ەڭبەكتىڭ اتى ماقالا بولعانىمەن زاتى سول اتاۋعا سىيمايتىن ارقايسىسى اسا سالماقتى جۇك كوتەرىپ, ساليقالى, اسقان پاراساتتى وي ايتقان وتە اۋقىمدى ەڭبەك, بولاشاققا جول سىلتەگەن باعدارشام, اداستىرماس اق جۇلدىز.
مەملەكەت باسشىسى قاسىم-جومارت توقاەۆ ەل گازەتى «Egemen Qazaqstanda» جاريالاعان كەزەكتى, اسا ەلەۋلى ەڭبەگىندە وزىنە ءتان كەمەڭگەرلىكپەن تىڭ باعىت, سونى يدەيالار ايتا وتىرىپ, ورالىمدى, وردالى ويلار ايتقان «اباي جانە ءححى عاسىردىڭ» ۇناعانى سونشالىق ءۇن قوسۋ لەبىمىزدە تىلگە تيەك ەتەر ءۇزىندى كەلتىرۋ جەڭىل بولمادى. سەبەبى ءار ابزاتس قانا ەمەس, ءار سويلەم تۇنىپ تۇرعان تۇپ-تۇنىق وي, توگىلىپ تۇرعان جىر مەن سىر. ءسوزىمىز جالاڭ بولماس ءۇشىن ءبىر مىسال كەلتىرەلىك. ء«ار قازاقتىڭ تورىندە دومبىرا تۇرسىن دەگەن ۇعىم قالىپتاسقانىن جاقسى بىلەمىز. سول سياقتى ءار شاڭىراقتا ابايدىڭ كىتابى مەن مۇحتار اۋەزوۆتىڭ «اباي جولى» رومانى تۇرۋى كەرەك دەپ سانايمىن». ء«بىز ابايدىڭ 125 جىلدىق مەرەيتويىن قوعامدىق سانانى جاڭعىرتىپ, ءبىر ەل, تۇتاس ۇلت بولىپ دامۋىمىزعا سەرپىن بەرەتىن ءىس-شارا رەتىندە زور ءمان بەرىپ وتىرمىز». «بۇل تويدىڭ ۇستىندەگى باستى ماقساتىمىز بۇكىل حالىقتىڭ ۇلت ۇستازى الدىنداعى وزىندىك ءبىر ەسەپ بەرۋى ىسپەتتەس بولۋى ءتيىس دەپ بىلەمىن. «اباي سىنى – اۋىر سىن». «جالپى ءومىردىڭ قاي سالاسىندا دا ابايدىڭ اقىلىن الساق, ايتقانىن ىستەسەك, ەل رەتىندە ەڭسەلىمىز, مەملەكەت رەتىندە مۇراتقا جەتەمىز». مىنە, وسى ءارى قىسقا, ءارى نۇسقا ءۇش قانا ۇزىك ۇزىندىدەن-اق «اباي جانە ءححى عاسىر» اتتى ماقالانىڭ اسا ماڭىزدىلىعىن انىق تانىپ, جۇرەر جولىمىزدى ايقىن كورىپ وتىرمىز.
مەملەكەت باسشىسىنىڭ «سەمەي قالاسىن تاريحي ورتالىق رەتىندە بەلگىلەۋ», «رەسەيدەگى, فرانتسياداعى, ۇلىبريتانياداعى جانە باسقا دا مەملەكەتتەگى ەلشىلىكتەر جانىنان «اباي ورتالىقتارىن قۇرۋ» يدەياسى قورعاسىن قۇيىلىپ الشى تۇسەر اسىقتاي كوكەيگە قونا كەتتى.
توقسان اۋىز ءسوزدىڭ توبىقتاي ءتۇيىنى «ادامزات باردا اباي بار. اباي – دۇنيە تۇرعانشا تۇراتىن تۇلعا!
مەملەكەت باسشىسى قاسىم-جومارت توقاەۆتىڭ «اباي جانە ءححى عاسىرداعى قازاقستان» اتتى ماقالاسى وندا ايتىلعان وردالى, وزىق ويلارىمەن, جاھاندىق ءمانى بار ۇسىنىس, يدەيالارىمەن اسا قۇنارلى, اسا قۇندى ەڭبەك, كۇندەلىكتى ءومىرىمىزدىڭ باعىتىن ايقىنداپ تۇرعان باعدارشام, اداستىرماس اق جۇلدىز.
ءيا, ادامزات باردا – اباي بار. اباي – دۇنيە تۇرعانشا تۇراتىن تۇلعا!
ءسابيت دوسانوۆ,
جازۋشى, مەملەكەتتىك سىيلىقتىڭ لاۋرەاتى
الماتى