ەلوردالىق زيالىلار اباي شىعارماشىلىعىن تالقىلادى

جيىن بارىسىندا ءسوز سويلەگەن قازاقستان حالقى اسسامبلەياسى حاتشىلىعىنىڭ مەڭگەرۋشىسى ءلاززات قۇسايىنوۆا مەملەكەت باسشىسىنىڭ «اباي جانە XXI عاسىرداعى قازاقستان» ماقالاسىنىڭ جۇرتشىلىقتىڭ كوڭىلىنەن شىعىپ, قولداۋعا يە بولعاندىعىن اتاپ ءوتتى.

«2020 جىلى قازاقستان حالقى اسسامبلەياسىنىڭ «قازاقتانۋ» جوباسى اياسىندا ويشىل, رۋحاني ۇستازىمىز ۇلى ابايدىڭ 175 جىلدىعى اتالىپ وتىلەدى. اباي فيلوسوفياسى قازىرگى ۋاقىتقا دەيىن وزەكتىلىگىن جوعالتقان جوق. ءبىزدىڭ قوعام مۇشەلەرىن گۋمانيستىك تاربيەلەۋگە باعىتتادى. «عىلىم جولىنا جەتكەنشە – ماقتانبا» جانە «ەڭ الدىمەن ادام بولىپ قالۋ قاجەت» دەپ ءبىزدىڭ رۋحاني ۇستازىمىز ادامگەرشىلىككە شاقىردى» دەدى ول.

سونداي-اق تاريح عىلىمدارىنىڭ دوكتورى, پروفەسسور مارات ابسەمەتوۆ رۋحاني جاڭعىرۋ, ورلەۋدىڭ نەگىزى اباي شىعارماشىلىعى ەكەنىن تىلگە تيەك ەتتى.

ء«بىز ءۇشىن رۋحتىڭ بيىگى – اباي!  قازىر ەلىمىزدە قاي جاعىنان الساق تا ءوسۋ بار. بىزگە رۋحاني كوتەرىلۋ قاجەت, وعان نەگىز بولاتىن –اباي. 1914 جىلى سەمەيدە اقىننىڭ قايتىس بولۋىنىڭ 10 جىلدىعىنا وراي ادەبي كەش ءوتتى. سوندا مىرجاقىپ دۋلاتوۆ: «ۇنەمى بۇل كۇيدە تۇرماس, حالىق اعارار, ونەر-بىلىمگە قانار, سول كۇندەردە اباي قۇرمەتى كۇننەن- كۇنگە ارتار. ء«بىرىنشى اقىنىمىز» دەپ قابىرىن حالقى ءجيى-ءجيى زيارات ەتەر, حالىق پەن اباي اراسى كۇشتى ماحابباتپەن جالعاسار. ول كۇندەردى ءبىز كورمەسپىز, بىراق ءبىزدىڭ رۋحىمىز سەزەر, قۋانار...» دەپ ايتىپتى. الاش ارداقتىسىنىڭ ءسوزى اينىماي كەلدى...» دەپ پروفەسسور جينالعان جاستاردىڭ بويىنا رۋح سىيلادى.

سونداي-اق شارا بارىسىندا «اباي شىعارمالارىن اۋدارۋداعى ۇندەستىك», اباي شىعارماشىلىعىندا كەزدەسەتىن «ادام» كونتسەپتىسى», «اباي-اۋدارماشى» تاقىرىپتارى قوزعالدى. ودان بولەك,  قحا عىلىمي-ساراپتاما توبىنىڭ توراعاسى حاليل ماسلوۆ, س. سەيفۋللين اتىنداعى قازاق اگروتەحنيكالىق ۋنيۆەرسيتەتى, ف.ع.ك., دوتسەنت مارجان اكوشەۆا, «تۇران» ءبىلىم بەرۋ كورپوراتسياسىنىڭ ۆيتسە-پرەزيدەنتى وراق اليەۆ ۇلى ويشىلدىڭ فيلوسوفيالىق وي-تۇجىرىمدارى مەن شىعارمالارىنداعى پاراساتتى ويلاردى جان-جاقتى سارالاعان بايانداما جاسادى.