پارلامەنت سەناتىنىڭ دەپۋتاتى ولگا پەرەپەچينا سولتۇستىك قازاقستان وبلىسىنداعى جۇمىس ساپارى بارىسىندا تايىنشا اۋدانىنداعى تايىنشا قالاسى مەن قاراعاش اۋىلىندا بولدى. كەزدەسۋگە اۋدان اكىمى, «NurOtan» پارتياسىنىڭ مۇشەلەرى, ءماسليحات دەپۋتاتتارى, الەۋمەتتىك سالا قىزمەتكەرلەرى مەن زەينەتكەرلەر قاتىستى. بۇل تۋرالى پارلامەنت سەناتىنىڭ ءباسپاسوز قىزمەتى حابارلادى.
سەناتور كەزدەسۋ بارىسىندا «پەداگوگ مارتەبەسى تۋرالى» جانە «مىندەتتى الەۋمەتتىك ساقتاندىرۋ تۋرالى» زاڭدار مەن اكىمشىلىك كودەكس, ءبىلىم جانە عىلىم, دەنساۋلىق ساقتاۋدى دامىتۋ سالاسىنداعى جاڭا مەملەكەتتىك باعدارلامالار اياسىنداعى 2019 جىلعى پارلامەنتتىڭ جۇمىسى جانە 2020 جىلعى 1 قاڭتاردان باستالاتىن وزگەرىستەر تۋرالى حاباردار ەتتى. دەپۋتات سونداي-اق 2025 جىلعا دەيىنگى وڭىرلەردى دامىتۋدىڭ قولدانىستاعى باعدارلاماسى بويىنشا, اتاپ ايتقاندا «اۋىل-ەل بەسىگى» ارنايى جوباسىندا كوزدەلگەن اۋىل ءومىرىنىڭ ساپاسىن جاقسارتۋ, اۋىلدىق اۋماقتاردىڭ ينفراقۇرىلىمىن جاڭعىرتۋ جانە ولاردى وڭىرلىك ستاندارتتار جۇيەسىنىڭ پارامەترلەرىنە جەتكىزۋ مۇمكىندىكتەرى تۋرالى ايتتى.
كەزدەسۋگە قاتىسۋشىلار جۇزدەسۋ بارىسىندا دەپۋتاتقا وزدەرىن تولعاندىرعان سۇراقتارىن قويدى. اتاپ ايتقاندا, اۋداندىق ماڭىزى بار جولداردى جوندەۋگە قارجى ءبولۋ, تايىنشا قالاسىندا 600 ورىندىق جانە ۆيشنەۆكا اۋىلىندا 125 ورىندىق اپاتتى مەكتەپتەردىڭ ورنىنا مەكتەپ سالۋ قاجەتتىگى, مەملەكەتتىك ورگانداردى ەلەكتروندىق قۇجات اينالىمىنا كوشىرۋ جانە دەرەكتەردىڭ ساقتالۋى مەن قۇپيالىلىعىنا كەپىلدىك بەرۋ, حاكەرلىك بۇزۋلاردان قورعاۋ, ستاندارتتار مەن نورماتيۆتەرگە سايكەس كەلمەگەندىكتەن اۋىلدىق جەرلەردە ءدارىحانالاردى جابۋ, اتاۋلى الەۋمەتتىك كومەكتى بەرۋ, تۇرعىن ۇيمەن قامتاماسىز ەتۋ, جەر قويناۋىن پايدالانۋ مولشەرلەمەسى, اۋىل شارۋاشىلىعى بويىنشا سۋبسيديالارعا ءوتىنىش بەرۋ كەزىندە «قولداۋ» جۇيەسىنىڭ جۇمىسىنداعى ىركىلىستەر, شەتەلدەن مال اكەلۋگە ەلىمىزدىڭ اۋىل شارۋاشىلىعى مينيسترلىگىنەن رۇقسات الۋ جانە ت. ب. ماسەلەلەر تالقىلاندى.
سەناتور سونداي-اق ۆيشنەۆكا اۋىلىنداعى اپاتتىق جاعدايداعى ورتا مەكتەپتە, قاراعاش اۋىلىنداعى مال ءوسىرۋ مەن كوكونىستى تامشىلاتىپ سۋارۋعا ماماندانعان «استىق-ستەم» سەرىكتەستىگىندە بولدى. سەناتور ەڭبەك ۇجىمىمەن كەزدەستى جانە كوكونىس ساقتاۋ قويماسىن, ماتەريالدىق-تەحنيكالىق جابدىقتالۋىن, جاڭا تەحنيكانى, كوكونىستەردى ءوسىرۋ, ساقتاۋ جانە سۇرىپتاۋعا ارنالعان جابدىقتاردى كوردى.
قاراعاش ورتا مەكتەبىندە اۋىل تۇرعىندارىمەن كەزدەسۋ بولدى, وندا 2020 جىلدىڭ 1 قاڭتارىنان باستاپ جۇزەگە اساتىن وزگەرىستەر ءتۇسىندىرىلدى.
سەناتور كەزدەسۋ بارىسىندا قويىلعان بارلىق سۇراقتارعا جاۋاپ بەردى, كەيبىر ماسەلەلەر جەكە باقىلاۋعا الىندى.