ءچيليدىڭ سانتياگو قالاسىندا كاراتەدەن 2020 جىلداعى العاشقى رەيتينگىلىك تۋرنير - پرەمەر-ليگا باسەكەسى اياقتالدى. اتالعان سىندا قازاقستاندىق سپورتشىلار ايتارلىقتاي ءساتتى ونەر كورسەتتى. بۇل تۋرالى Olympic.kz حابارلادى.
60 كەلىگە دەيىنگى سالماقتا قازاقستان اتىنان ءۇش سپورتشى سىنعا تۇسكەن بولاتىن. تۋرنير قورىتىندىسى بويىنشا قايسار الپىسباي فينالدا باق سىناپ, الەم چەمپيونى, برازيليلىق بروزانى جەڭدى. بۇل قايساردىڭ پرەمەر-ليگا تۋرنيرىندەگى ەڭ العاشقى جەڭىسى.
دارحان ءاسادىلوۆ پەن ەركىنبەك بايتورەەۆ جارىستىڭ قولا جۇلدەسى ءۇشىن كەزدەسۋى ءتيىس ەدى. الايدا, ەركىنبەك دارحانعا جول بەرىپ, قولا جۇلدە اسادىلوۆكە بۇيىردى. 67 كەلىدەگى ديدار ءامىرالى قولا جۇلدە ءۇشىن وتكەن كەزدەسۋدە ۆەنەسۋەلالىق الەم چەمپيونى مادەرانى ۇتىپ, ۇزدىك ۇشتىككە ەندى. وسى سالماقتاقتاعى تاعى ءبىر قولا جۇلدەنى قازاقستاندىق اسىلبەك مۇراتوۆ يەلەندى.
84 كەلىدەگى يگور چەحمارەۆ پەن +68 كەلىدە سىنعا تۇسكەن سوفيا بەرۋلتسەۆا قۇراما قورجىنىن قولا جۇلدە سالدى. ال ءۇشىنشى ورىنعا تالاسقان 75 كەلىدەگى ەرمەك اينازاروۆ ماروككو سپورتشىسىنان ۇتىلىپ, العاشقى بەستىككە ەندى.
- چيليدەگى تۋرنيردە قازاقستان اتىنان قاتىسقان 12 سپورتشىنىڭ سەگىزى جۇلدەگە تالاستى. مەنىڭشە, بۇل جاقسى كورسەتكىش. الدا ءبىزدى ۇلكەن جارىس كۇتىپ تۇر. بۇل - پاريجدەگى پرەمەر-ليگا باسەكەسى. چيليدەگى جاقسى ناتيجەمىز پاريجدە ەسەلەنە تۇسەدى دەپ ويلايمىز, - دەيدى كوماندا باس باپكەرى جاستالاپ ساناۋوۆ.