رەسەيدىڭ ماسكەۋ قالاسىندا وتكەن «روجدەستۆەنسكيە زۆەزدى-2020» حالىقارالىق فەستيۆالىندە اتىراۋلىق وقۋشىلار جەڭىس تۇعىرىنان كورىندى. بۇل تۋرالى اتىراۋ وبلىسىنىڭ وڭىرلىك كوممۋنيكاتسيالار قىزمەتى حابارلادى.
جىل سايىن ءۇش مىڭنان استام ونەرپاز باق سىنايتىن بايقاۋدا ن.تىلەنديەۆ اتىنداعى كىشى ونەر اكادەمياسىنىڭ شاكىرتتەرى ەل نامىسىن قورعادى. ولار 3 اتالىم بويىنشا ونەر كورسەتتى.
«سۋرەت جانە مايلى بوياۋ» ماماندىعىنىڭ وقۋشىسى زەرە ساياسات – باس جۇلدە يەلەنسە, قۇرمانباي ىڭكار ءى دارەجەلى ديپلوممەن ماراپاتتالدى. سونىمەن بىرگە اكادەميانىڭ «قازىنا» بي ءانسامبلى ءوز اتالىمىندا ءى ورىندى يەلەندى.
– «روجدەستۆەنسكيە زۆەزدى» حالىقارالىق بايقاۋى بيىل 20-شى رەت ۇيىمداستىرىلدى. وعان الەمنىڭ 8 ەلى مەن رەسەي فەدەراتسياسىنا قاراستى 6 رەسپۋبليكانىڭ ونەرپازدارى قاتىستى. وقۋشىلار ءۇشىن مۇنداي جارىستا جەڭىمپاز اتانۋدىڭ ماڭىزى زور, – دەيدى اكادەميا ديرەكتورى دولورەس تاسكارينا.
ايتا كەتەيىك, وسىدان از ۋاقىت بۇرىن ن.تىلەنديەۆ اتىنداعى كىشى ونەر اكادەمياسىنىڭ «اكتەرلىك شەبەرلىك» ماماندىعىنىڭ وقۋشىلارى چەحيا استاناسى پراگادا وتكەن حالىقارالىق جارىستان باس جۇلدەمەن ورالعان ەدى. ولار شەكسپيردىڭ «رومەو ي دجۋلەتتا» پەساسىن ساحنالاعان بولاتىن.