جاڭا زاڭ ءتۇسىندىرىلدى

دەپۋتاتتار ساپار بارىسىندا قالا­نىڭ الەۋمەتتىك-ەكونوميكالىق جاع­دايىمەن تانىسىپ, بىرقاتار وندىرىستىك جانە الەۋمەتتىك نىسانداردى ارالادى. سەناتورلار ەڭبەك ۇجىمدارىمەن جۇز­دەسۋلەردە پارلامەنت قابىل­داعان زاڭداردىڭ مازمۇنىن, رۋحاني جاڭعىرۋ جانە ۇلتتىق قۇن­دى­لىقتاردى ساقتاۋ ماسەلەلەرىن تالقىلادى.

بەكتاس بەكنازاروۆ «پەداگوگ مار­تە­بە­سى تۋرالى» زاڭى مەن باس­قا دا زاڭنا­ماداعى وزگەرىس­تەر­دى كەڭىنەن ءتۇسىندىرۋ ماقسات­ىندا قالاداعى ءبىلىم بەرۋ سا­لا­سى­نىڭ قىزمەتكەرلەرىمەن كەز­دەستى. جوعارعى پالاتا توراعا­سىنىڭ ورىنباسارى جاڭا زاڭدا­عى ارتىقشىلىقتارعا توقتا­لىپ, مۇعالىمدەردىڭ كاسىبي قىز­مەت­ىندەگى قۇقىقتارى مەن مىندەت­تەرىنە ەگجەي-تەگجەيلى توقتالدى.

«وتكەن جىلى سەنات پەن ءماجىلىس حالىقتىڭ تۇرمىس ساپاسىن جاقسارتۋعا جول اشاتىن 83 زاڭدى قابىلدادى. قوس پالاتا دەپۋتاتتارى زاڭ شىعارۋ جۇ­مىسىندا تۇڭعىش پرەزيدەنت – ەل­باسىنىڭ الەۋمەتتىك ستراتەگيالىق باستامالارى مەن پرەزيدەنتتىڭ حالىقتى قولداۋعا ارنالعان تاپسىرمالارىن نەگىزگە الدى. ەڭ باستىسى قابىلدانعان بار­لىق قۇجات ازاماتتاردى قولداۋعا جانە قورعاۋعا ارنالدى», – دەپ اتاپ ءوتتى سەنات توراعاسىنىڭ ورىنباسارى.

شىمكەنت قالاسىنىڭ اكىمى ەرلان ايتاحانوۆ جۇمىس با­بىنداعى كەزدەسۋ اياسىندا دە­پۋتاتتاردى شاھاردىڭ 2019 جىلعى الەۋمەتتىك-ەكونومي­كالىق دامۋىنداعى نەگىزگى قورىتىندىلارمەن تانىستىردى. سونىمەن قاتار قالا باسشىسى ونەركاسىپ پەن ءبىلىم بەرۋ, دەن­ساۋلىق ساقتاۋ جانە مادەنيەت سالالارىندا اتقارىلعان جۇمىستار جايى مەن مەگاپوليستى دامىتۋ باعىتىنداعى بيىلعى جىلعى جوسپارلارمەن ءبولىستى.

سەناتورلار 3 مىڭنان استام حا­لىق تۇراتىن «بادام» تۇرعىن ءۇي الا­بىن­داعى ينجەنەرلىك ينفراقۇرىلىم جاعدايىمەن تانىستى. تۇرعىن الابىن ەلەكتر قۋاتىمەن جانە تابيعي گاز, اۋىز سۋمەن قامتۋ, سونىمەن بىرگە جول ماسەلەسىن شەشۋ ءۇشىن مەملەكەتتىك بيۋدجەتتەن ءتيىستى قارجى بولىنگەن بولاتىن. جىل سوڭىنا دەيىن «بادام» تۇرعىن ءۇي الابىنىڭ كوممۋنالدىق پروبلەماسى تولىعىمەن شەشىلەدى دەپ جوسپارلانۋدا.

ب.بەكنازاروۆ ءاربىر دەپۋتات ءوڭىردىڭ دامۋى تەجەلىپ جاتسا, بيۋد­جەت­تىڭ قارجىسى ءوز ماقساتىنا جۇمسالماعان جاعدايدا, دەپۋتاتتىق ساۋال جولدانۋى ءتيىس ەكەنىن اتاپ ءوتتى.