كليم لي – پورترەت جازۋدىڭ حاس شەبەرى. ونىڭ قالامىنان تامعان تۋىندىلار گرافيكالىق تەحنيكالارى مەن ماتەريالدارىنىڭ تۇرلىشە كومپوزيتسيالىق الۋاندىعىمەن ەرەكشەلەنەدى. اسىرەسە تۋىندىگەردىڭ شىعارماشىلىعىنان كورىكتى ايەلدەردىڭ بەينەسىن ءجيى كەزدەستىرەسىز. رەسەي كوركەمسۋرەت اكادەمياسىنىڭ اكادەميگى ءارى ورىس بەينەلەۋ ونەرىنىڭ بەلدى وكىلى سانالاتىن ايتۋلى شەبەردىڭ «اينالار پارادوكسى» اتتى تاڭعاجايىپ كورمەسى ءا.قاستەەۆ اتىنداعى ونەر مۋزەيىنە كەلدى.
الماتىعا ايگىلى قىلقالام شەبەرىنىڭ شىعارمالارى عانا ەمەس, ءوزى دە كەلدى. الاتاۋدىڭ اسقاق شىڭدارىنان, تاۋ باۋرايىنداعى ارۋ قالانىڭ اسەم كوركىنەن رۋحاني قۋات الاتىنىن تىلگە تيەك ەتكەن لي جۋرناليستەرمەن شىعارماشىلىعىنداعى تىڭ جاڭالىقتارمەن ءبولىستى. پايىمداعانىمىزداي, ول ءۇشىن بۇكىل دۇنيەنىڭ بولمىسى بۋىرقانعان بوياۋلاردان تۇرادى.
سۋرەتشى بەينەلەۋ ونەرىنىڭ ءتۇرلى جانرىندا تۇپنۇسقا جانە باسپا گرافيكاسىنان بىرنەشە ءجۇز تۋىندى جازدى. كىتاپ يلليۋستراتورى رەتىندە دە كوپشىلىككە جاقسى تانىمال. ءتىپتى, ونىڭ بۇل باعىتتاعى جۇمىستارىنىڭ كەيبىرى كىتاپ گرافيكاسى تاريحىنا كىرىپ ۇلگەرگەن. اسىرەسە پۋشكيننىڭ, موپاسساننىڭ, نابوكوۆتىڭ شىعارمالارىنا جاسالعان يلليۋستراتسيالارى تالانت يەسىن شىعارماشىلىق بيىككە كوتەردى. بۇل تۇرعىدا ونىڭ رەسەي تاريحىن پايىمداۋعا جەتەلەيتىن بىرقاتار ەڭبەگىن دە ەرەكشە اتاي كەتكەن ءجون. الماتىلىق كورەرمەننىڭ نازارىنا شەبەردىڭ ەڭ ۇزدىك كارتينالارى ۇسىنىلدى.
– كليم ءليدىڭ قوندىرعىلى كومپوزيتسيالارى مەن كىتاپ يلليۋستراتسيالارى جوعارى شەبەرلىگىمەن, سىزىقتارىنىڭ دالدىگىمەن جانە جەڭىلدىگىمەن دارالانادى. ىشكى شيەلەنىس, رۋحاني كۇش, ىقشامدىق – ونىڭ قولتاڭباسىنىڭ باستى ارتىقشىلىعى. ناقتى كوركەمدىك تاسىلدەر وزىنە ەرىكسىز باۋراپ الادى. كليم ءليدىڭ قازىر پەتەربۋرگتىك ەڭ جوعارى كاسىبي گرافيك-سۋرەتشىلەردىڭ ءبىرى ەكەنىن ەشبىر قينالماي ايتا الامىز. زاماناۋي اكادەميالىق كوركەمدىك ءبىلىم ارىپتەستەرىنىڭ جانە ونىڭ ەسىمىمەن دە تىعىز بايلانىستى. ول وزبەكستاننىڭ تۋماسى, ۇلتى – كورەي, ورىس ونەرى داستۇرلەرىنىڭ مۇراگەرى. ونەر يەسىنىڭ بويىنا ءتۇرلى مادەنيەتتىڭ داستۇرلەرى گەنەتيكالىق مۇرا بولىپ سىڭگەن. دەگەنمەن, ول ءوزىن پەتەربۋرگ كوركەمسۋرەت مەكتەبىنىڭ ءداستۇرىن ۇستانۋشى رەتىندە ەسەپتەپ, تەك ورىس مادەنيەتىمەن عانا سالىستىرادى. ونىڭ بويىندا پەتەربۋرگ كوركەمدىك داستۇرلەرىنىڭ نەگىزىندە قالىپتاسقان سىزىقتاردىڭ شىعىستىق جوعارى گرافيكالىق مادەنيەتى, كەڭىستىك پەن ۋاقىتتى شىعىسشا ۇعىنۋ, فورمانى باتىسشا سەزىنۋ ءوزارا ۇيلەسىم تاپقان, – دەيدى ونەرتانۋشى سۆەتلانا گراچەۆا.
ي.ە.رەپين اتىنداعى سانكت-پەتەربۋرگ مەملەكەتتىك اكادەميالىق كەسكىندەمە, ءمۇسىن جانە ساۋلەت ينستيتۋتىنىڭ گرافيكا فاكۋلتەتىن ون جىلدان استام باسقارعان سۋرەتشى قازىر وسى جوعارى وقۋ ورنىندا ءوزىنىڭ جەكە شەبەرحاناسىنا جەتەكشىلىك ەتەدى.
الماتى