ونى ەنگىزۋ نورماسى وزگەرتىلۋى ءتيىس
ەلباسى نۇرسۇلتان نازارباەۆ ءوزىنىڭ قازاقستان حالقىنا جولداۋىندا ء“ارتاراپتاندىرۋدىڭ باسقا ءبىر ماڭىزدى سەگمەنتى ارگوونەركاسىپتىك كەشەندى دامىتۋ بولىپ تابىلادى. اۋىل شارۋاشىلىعىنداعى ەڭبەك ونىمدىلىگى وتە تومەن جانە جىلىنا ءبىر جۇمىس ىستەۋشىگە 3 مىڭ دوللاردان كەلەدى. ال دامىعان ەلدەردە بۇل كورسەتكىش 50-70 مىڭ دوللاردى قۇرايدى. اۋىل ءۇشىن ءوسۋ پەرسپەكتيۆاسى, مىنە, وسىندا. سوندىقتان ءبىزدىڭ مىندەتىمىز – 2014 جىلعا قاراي اگروونەركاسىپتىك كەشەندە ونىمدىلىكتى كەم دەگەندە ەكى ەسە ارتتىرۋ”, – دەي كەلە, اگروونەركاسىپتىڭ ەكونوميكامىزدا الاتىن ورنى ەرەكشە ەكەندىگىن اتاپ كورسەتتى.
وڭتۇستىك قازاقستان – جەمىس-جيدەك داقىلدارى مەن ءجۇزىمنىڭ كوپجىلدىق ەكپەلەرىن وتىرعىزۋعا جانە وسىرۋگە ەڭ قولايلى ايماقتاردىڭ ءبىرى.
ەل ۇكىمەتىنىڭ 2010 جىلعى 15 اقپانداعى №91 قاۋلىسىمەن بەكىتىلگەن “وبلىستىق بيۋدجەتتەردىڭ, استانا جانە الماتى قالالارى بيۋدجەتتەرىنىڭ جەمىس-جيدەك داقىلدارىنىڭ جانە ءجۇزىمنىڭ كوپ جىلدىق ەكپەلەرىن وتىرعىزۋ مەن ءوسىرۋدى قامتاماسىز ەتۋگە 2010 جىلعى رەسپۋبليكالىق بيۋدجەتتەن ءبولىنەتىن اعىمداعى نىسانالى ترانسفەرتتەردى پايدالانۋ” ەرەجەسىنە سايكەس جەمىس-جيدەك داقىلدارى مەن ءجۇزىمنىڭ كوپجىلدىق ەكپەلەرىن وتىرعىزۋعا جانە وسىرۋگە ارنالعان شىعىنداردىڭ نورمالارى جانە تولەنەتىن سۋبسيديا كولەمى بەكىتىلگەن.
الايدا بۇگىنگى تاڭدا جەمىس-جيدەك داقىلدارى مەن كوپجىلدىق ەكپەلەرىن وتىرعىزۋ وڭتۇستىك قازاقستان وبلىسىنىڭ اگروقۇرىلىمدارىنا (شارۋاشىلىقتارىنا) كوپ قيىنشىلىق تۋعىزۋدا. ويتكەنى, قويىلاتىن تالاپتارعا سايكەس ەگۋ الاڭى كەمىندە 5 گەكتار, ال ونى ءوسىرۋ ءادىسى تامشىلاتىپ سۋارۋ جۇيەسى بولۋى ءتيىس. سونىمەن قاتار, تىرەۋىش باعانالاردى ورناتىپ, جەمىس-جيدەك داقىلدارىنىڭ كوپ جىلدىق ەكپەلەرى الاسا بويلى تەلىتۋشىلەرمەن وتىرعىزىلعان جاعدايدا – ءبىرىنشى وتىرعىزىلعان جىلى, ءجۇزىمنىڭ كوپ جىلدىق ەكپەلەرىن وسىرگەن جاعدايدا – ەكىنشى جىلى وتىرعىزىلۋى قاجەت جانە ت.ب. شەكتەۋلەر قويىلۋدا.
2010 جىلعا جەمىس-جيدەك داقىلدارى مەن ءجۇزىمنىڭ كوپجىلدىق ەكپەلەرىن وتىرعىزۋدى جانە ءوسىرۋدى قامتاماسىز ەتۋگە ارنالعان باعدارلاما بويىنشا رەسپۋبليكالىق بيۋدجەتتەن وڭتۇستىك قازاقستان وبلىسىنا 1 417,8 ملن. تەڭگە قارالعان, بۇل سوما بۇكىل رەسپۋبليكاعا ءبولىنگەن قاراجاتتىڭ 68 پايىزىن قۇرايدى.
بۇگىنگى تاڭدا, بولىنگەن قاراجاتتىڭ يگەرىلمەي قالۋ قاۋپى تۋىپ وتىر. سەبەبى, وڭتۇستىك قازاقستان وبلىسىندا جەمىس-جيدەك داقىلدارىن جانە ءجۇزىمنىڭ كوپ جىلدىق ەكپەلەرىن وتىرعىزۋمەن اينالىساتىن اۋدان اۋماعىنداعى اگروقۇرىلىمداردىڭ 90 پايىزعا جۋىعىنىڭ جەر كولەمى 5 گەكتارعا جەتپەيدى. بۇل اگروقۇرىلىمداردى ءبىر مەزەتتە ىرىلەندىرۋدىڭ مۇمكىندىگى جوق.
سونداي-اق, 1 گەكتار جەرگە جەمىس-جيدەك داقىلدارى مەن كوپجىلدىق ەكپەلەرىن وتىرعىزىپ, العاشقى جەمىسىن العانعا دەيىن كەمىندە ورتا ەسەپپەن 3 442 000 تەڭگە قاجەت, ال 5 گەكتار جەرگە 17 210 000, ياعني 5 ەسە ارتىق قارجى قاجەت, ال مۇنداي قارجى اۋىلداعى كاسىپكەرلەردە جوق, نەسيە الۋ تەتىگى دە قيىندىق تۋعىزۋدا.
ارينە, قازىرگى قارجى داعدارىسىمەن كۇرەس كەزىندە اۋىل شارۋاشىلىعىن جانداندىرۋ ۇلكەن ماسەلە. سوندىقتان ۇكىمەت رەسپۋبليكا بويىنشا وسى اۋىل شارۋاشىلىعى سالاسىنا رەسپۋبليكالىق بيۋدجەتتەن سۋبسيديا قارجىسىنىڭ يگەرىلمەي قالۋ قاۋپىن بولدىرماۋ ماقساتىندا ەرەجەلەردە كورسەتىلگەن شەكتەۋلىكتەردى ازايتۋى, ياعني جەمىس-جيدەك داقىلدارىنىڭ جانە ءجۇزىمنىڭ كوپ جىلدىق ەكپەلەرىن وتىرعىزۋ ءۇشىن كەمىندە 1 گەكتار جەر ءبولۋى جانە ءمىندەتتى تۇردە تامشىلاتىپ سۋارۋ ءتاسىلىن ەنگىزۋ نورماسىن وزگەرتۋى ءتيىس.
بەرىك بەكجانوۆ, ءماجىلىس دەپۋتاتى.