باس پروكۋراتۋراعا قاراستى قۇقىقتىق ستاتيستيكا جانە ارنايى ەسەپكە الۋ كوميتەتى الماتى وبلىسى بويىنشا باسقارماسىنىڭ دەرەكتەرى بويىنشا, وتكەن جىلدىڭ 9 ايىندا تۇرعىندارعا تيىسىنشە قىزمەت كورسەتۋ ەرەجەسىن بۇزعان 24 اكىمدىك مامانىنا قاتىستى قۇقىقتىق حاتتاما تولتىرىلعان. ال 40 مەملەكەتتىك قىزمەتشى تارتىپتىك جاۋاپكەرشىلىككە تارتىلعان ەكەن.
تۇرعىنداردىڭ مەملەكەتتىك قىزمەت الۋعا قاتىستى قۇقىعى باسپانا كەزەگى مەن جەر تەلىمىنە قاتىستى ءجيى بۇزىلىپ وتىر. وتكەن جىل ىشىندە وبلىس تۇرعىندارىنان ارناۋلى قىزمەت الۋعا قاتىستى 70 مىڭنان استام ءوتىنىش تۇسسە, ونىڭ ىشىنەن 174 ءوتىنىشتىڭ قارالۋ مەرزىمى مەن ورىندالۋىنا قاتىستى شەشىم شىعارىلۋى قاساقانا شەگەرىلىپ, ۋاقىتىن سوزۋ دەرەگى انىقتالىپتى. جالپى, 2019 جىلى الماتى وبلىسىنداعى مەملەكەتتىك قىزمەتشىلەر تاراپىنان زاڭ بۇزۋشىلىق ءجيى ورىن العانىن سىبايلاس جەمقورلىققا قارسى كۇرەس اگەنتتىگىنىڭ الماتى وبلىسى بويىنشا دەپارتامەنتىنىڭ وكىلدەرى دە مالىمدەۋدە. ناقتى ايتقاندا, بىلتىر الماتى وبلىسىنىڭ سىبايلاس جەمقورلىققا قارسى كۇرەس قىزمەتى 141 قىلمىسقا قاتىسى بار دەرەك تىركەگەن ەكەن. ونىڭ ىشىندە 101 ءىس جەمقورلىققا قاتىستى قوزعالعان. ياعني, سىبايلاس جەمقورلىققا قاتىستى كۇدىككە ءىلىنۋ دەرەگى بارلىق قىلمىستىق ىستەردىڭ 71,6 پايىزىن قۇراپ وتىر. اتاپ ايتقاندا, جىل باسىنان بەرى 81 پارا الۋ وقيعاسى اشكەرەلەنىپ, قىزمەت بابىن اسىرا پايدالانۋدىڭ 11 دەرەگى انىقتالعان. ناتيجەسىندە, جەكەلەگەن تۇلعاعا قاتىستى 63 قىلمىستىق ءىس اشىلىپ, 43 ادام سوتتالعان. جاۋاپقا تارتىلعان قىزمەتكەرلەر اراسىندا 6 وبلىستىق دەڭگەيدەگى باسشى, 5 ورتا ساناتتاعى لاۋازىمدى تۇلعا بار. بۇگىنگە دەيىن 87 ءىس سوتقا جىبەرىلىپتى.
سونداي-اق شەنەۋنىكتەر تاراپىنان شاعىن جانە ورتا بيزنەس نىساندارىنا قىسىم جاساۋ ازايماي وتىرعان كورىنەدى. ءدال وسىنداي مازمۇنداعى 17 شاعىم قابىلدانىپ, 13 لاۋازىم يەسى جاۋاپكەرشىلىككە تارتىلعان. 35 كاسىپكەردىڭ قۇقى قورعالدى.
ايتپاقشى, وبلىستاعى سىبايلاس جەمقورلىق دەرەكتەرى ءجيى بايقالاتىن قىزمەتتەردىڭ كوشىن اكىمدىك قىزمەتكەرلەرى باستاپ تۇرعانى وكىنىشتى. وتكەن جىلدىڭ 11 ايىندا شەنەۋنىكتەردىڭ پارا الۋىنا قاتىستى 26 وقيعا انىقتالعان. جەر قاتىناستارى ءبولىمىنىڭ قىزمەتكەرلەرى دە اكىمدىك وكىلدەرىنەن قالىسپاپتى, ولارعا قاتىستى 2019 جىلدىڭ جەلتوقسان ايىنا دەيىن 12 دەرەك تىركەلگەن. بىلتىر ىشكى ىستەر ورگاندارى مەن قۇرىلىس سالاسىندا دا پارا الۋدىڭ ونداعان مىسالى بايقالسا, الەۋمەتتىك قورعاۋ قىزمەتىنىڭ 8 وكىلى جەمقورلىققا قاتىستى ايىپتالعان ەكەن.
الماتى وبلىسى