وتكەن جىلى الماتى وبلىسىندا ەڭبەكاقى تولەۋگە قاتىستى زاڭ تالابىن بۇزۋ مەن جالاقى قارىزى بويىنشا قۇزىرلى ورگاندارعا جۇگىنگەن ادامداردىڭ سانى ارتقان.
ونىڭ ىشىندە پروكۋراتۋرانىڭ ارالاسۋىمەن عانا مىڭنان استام جۇمىسشىنىڭ ەڭبەك داۋى شەشىمىن تاۋىپتى. ال ەڭبەكاقى قارىزىنا قاتىستى وتەلگەن قارجى كولەمى 150 ملن تەڭگەنى قۇرادى. بۇل دەرەكتەر پروكۋراتۋرانىڭ 2019 جىلدى قورىتىندىلاعان القا ماجىلىسىندە جاريا بولدى. وبلىس پروكۋرورى ازامات جىلقىباەۆتىڭ ايتۋىنشا, وتكەن جىلى ايماقتاعى قىلمىس جاعدايى تۇراقتى دەڭگەيدە بولعان. جالپى, قۇقىق بۇزۋشىلىق سيپاتى 22,2 پروتسەنتكە ازايىپ, جىل باسىنان بەرى 21 528 وقيعا تىركەلگەن.
- ادام قۇقىعى مەن زاڭنىڭ ساقتالۋىن قاداعالاۋ ماقساتىندا جۇرگىزىلگەن ىستەر ادىلەتتىڭ ورناۋى مەن قۇقىق بۇزۋشىلىقتىڭ الدىن الۋدا ءوز جەمىسىن بەرىپ كەلەدى. ماسەلەن, وتكەن جىلى پروكۋرورلاردىڭ ارالاسۋىمەن 72 ادامعا قاتىستى شىعارىلعان سوت شەشىمى قايتا قارالىپ, زاڭ مارتەبەسى ۇستەمدىك قۇردى. ناتيجەسىندە 34 ادامنىڭ قۇقىعى قورعالدى. قاداعالاۋدىڭ ارقاسىندا وبلىس كولەمىندە ۋاقىتشا ۇستالعان 30 ادامعا قاتىستى ءىس توقتاتىلىپ, زاڭسىز قامالعان 40 ادام اقتالدى, - دەيدى وبلىس پروكۋرورى ازامات جىلقىباەۆ.
جالپى, پروكۋراتۋرانىڭ ەسەپكە الۋ-تىركەۋ ءتارتىبى بويىنشا جۇرگىزىلگەن تەكسەرۋىنىڭ ناتيجەسىندە 64 قىلمىستىق قۇقىق بۇزۋشىلىق ەسەپكە الىنعان ەكەن. اسىرەسە, قاداعالاۋ اكتىسى نەگىزىندە تۇرعىنداردى اۋىز سۋمەن, تابيعي گازبەن, ەلەكتر ەنەرگياسىمەن جانە جىلۋ ەنەرگياسىمەن قامتاماسىز ەتۋ بويىنشا ۋاقىتشا وتەمدىك تاريفتەر ەنگىزىلىپ, 306 مىڭ ادامنىڭ قۇقىعى قورعالعان. سونداي-اق قاداعالاۋشى ورگاننىڭ تەكسەرۋىنەن كەيىن جالپى اۋماعى 48,1 مىڭ گەكتار بولاتىن پايدالانىلماعان جەر تەلىمى انىقتالىپ, مەملەكەتكە قايتارىلدى. اتقارۋ ءوندىرىسى بويىنشا دا بەرەشەك تۇلعالاردان 920,3 ملن تەڭگە قارىز وندىرىلگەن. وبلىستىق پروكۋراتۋرانىڭ ىقپال ەتۋىنەن كەيىن زاڭ بۇزعان 2 مىڭنان استام ادام ءار ءتۇرلى جاۋاپكەرشىلىككە تارتىلىپ, مەملەكەت پايداسىنا وندىرىلگەن اقشالاي كىرىستىڭ جالپى كولەمى 1 ملرد تەڭگەگە جەتكەن ەكەن.