9-22 قاڭتار ارالىعىندا شۆەيتساريانىڭ لوزاننا قالاسىندا جاسوسپىرىمدەردىڭ ءۇشىنشى قىسقى وليمپياداسى وتەدى. ءتورت جىلدا ءبىر كەلەتىن دۇنيەجۇزىلىك دوداعا قازاقستان كومانداسىنىڭ سپورتشىلارى دا قاتىسادى. بۇل تۋرالى Olympic.kz حابارلادى.
لوزانناداعى جاسوسپىرىمدەر وليمپياداسىندا الەمنىڭ 70 مەملەكەتىنەن 15-18 جاس ارالىعىنداعى 1880 سپورتشى باق سىنايدى. وليمپيادا ويىندارىندا سپورتتىڭ 16 تۇرىنەن مەدالدار ساراپقا سالىنادى.
اتاپ ايتار بولساق, جاس سپورتشىلار شاڭعى جارىسى, سنوۋبورد, فريستايل, شاڭعى قوسسايىسى, تاۋ شاڭعىسى, شاڭعىمەن تۇعىردان سەكىرۋ, الپينيزم, بياتلون, شايبالى حوككەي, شانامەن سىرعاناۋ, بوبسلەي, سكەلەتون, مانەرلەپ سىرعاناۋ, شورت-ترەك, كونكيمەن جۇگىرۋ جانە كەرلينگتەن سىنعا تۇسەدى.
قازاقستان ۇلتتىق قۇراماسى لوزانناداعى وليمپيادا ويىندارىنا جالپى ەسەبى 26 جولداما جەڭىپ الدى. سالىستىرىپ ايتار بولساق, ۇلتتىق قۇراما 2012 جىلعى ينسبۋركتەگى وليمپياداعا 37 سپورتشى اپارسا, 2016 جىلى ليللەحامەردە وتكەن قىسقى ويىنداردا 20 اتلەت باق سىنادى.
قازاقستاندىق جاس سپورتشىلار جاسوسپىرىمدەردىڭ قىسقى وليمپياداسىنان 8 مەدال جەڭىپ الدى. ازىرگە, التىن جۇلدە جوق.