قازاقستان رەسپۋبليكاسى ۇكىمەتىنىڭ 2019 جىلعى 30 جەلتوقسانداعى № 1028 قاۋلىسىمەن ءۇندىستان رەسپۋبليكاسى مەن قىتاي حالىق رەسپۋبليكاسىنىڭ ازاماتتارى ءۇشىن بۇرىن ەنگىزىلگەن قازاقستان رەسپۋبليكاسىنا كەلۋدىڭ, بولۋدىڭ جانە كەتۋدىڭ قولدانىستاعى ۆيزاسىز جەتپىس ەكى ساعاتتىق رەجيمى 2020 جىلدىڭ 31 جەلتوقسانىنا دەيىن ۇزارتىلدى. بۇل تۋرالى مادەنيەت جانە سپورت مينيسترلىگىنىڭ ءباسپاسوز قىزمەتى حابارلادى.
سونىمەن قاتار, «پيلوتتىق» رەجيمدى ۇزارتۋدان باسقا قابىلدانعان قاۋلى شەڭبەرىندە 2020 جىلدىڭ 1 قاڭتارىنان باستاپ ەنگىزىلگەن باسقا دا بىرقاتار جاڭالىقتار بار.
اتاپ ايتقاندا, «اتامەكەن» قر ۇكپ مەن ءتيىستى اۋەجايلاردىڭ باسقارۋشى كومپانيالارىنىڭ بىرنەشە وتىنىشتەرىنە ساي, سونداي-اق قحر مەن ءۇندىستاننىڭ بىرقاتار تۋريستىك كومپانيالارىنىڭ « ۇلى جىبەك جولى» بويىندا ورنالاسقان قالالارعا ارنايى تۋريستىك باعدارلاماعا جوعارى قىزىعۋشىلىق تانىتۋىنا بايلانىستى, اتالعان ترانزيتتىك رەجيم شەڭبەرىندە جۇمىس ىستەيتىن حالىقارالىق اۋەجايلاردىڭ ءتىزىمى 4 قالانىڭ اۋەجايلارىمەن تولىقتىرىلعان. ولار – شىمكەنت, اقتاۋ, قاراعاندى جانە تاراز قالالارى.
بۇدان باسقا, وسى ۆيزاسىز رەجيم شەڭبەرىندە قىزمەتتى جۇزەگە اسىرۋ جانە ءتيىستى ترانزيتتىك تاسىمالداردى جاساۋ قۇقىعى مەملەكەت يەلىگىنە قاراماستان قازاقستاندىق جانە شەتەلدىك بارلىق اۋەكومپانيالارىنا بەرىلەدى.
سونىمەن قاتار, وسى رەجيم شەڭبەرىندە كەلەتىن ءۇندىستان مەن قحر ازاماتتارىنا كوشى-قون كارتوچكالارىن بەرۋ قاجەتتىلىگى الىنىپ تاستالدى. ونىڭ ورنىنا, 2020 جىلدىڭ 1 قاڭتارىنان باستاپ وتكىزۋ بەكەتتەرىندە قازاقستان رەسپۋبليكاسىنىڭ مەملەكەتتىك شەكاراسىن كەسىپ ءوتۋ ۋاقىتى كورسەتىلە وتىرىپ, ءۇندىستان مەن قحر ترانزيتتىك ازاماتتارىنىڭ پاسپورتتارىنا ءمورتاباندار قويىلادى.
وسى شارالاردىڭ بارلىعى ترانزيتتىك جولاۋشىلارعا ىشكى ءتۋريزمدى دامىتۋ جانە جىلجىتۋدا ءوز قىزمەتىن جۇزەگە اسىراتىن قازاقستاندىق تۋروپەراتورلاردان قوسىمشا تۋرپاكەتتەر ساتىپ الۋعا مۇمكىندىك بەرەدى. بۇل ءوز كەزەگىندە قازاقستان ەكونوميكاسىنا شەتەل ۆاليۋتاسىنىڭ قوسىمشا اعىمىن قامتاماسىز ەتەدى.