سەمەي قالاسى بيىلعى اباي قۇنانباي ۇلىنىڭ 175 جىلدىق مەرەيتويىنا جان-جاقتى دايىندالۋدا. بۇل تۋرالى «حابار 24» حابارلادى.
شاھاردى اباتتاندىرىپ, كوشەلەردى كوركەيتۋ جۇمىستارىنا ەلىمىزدىڭ باسقا دا وڭىرلەرى ۇلەس قوسۋعا تىلەك بىلدىرگەن. ازىرگە جالپى قۇنى 9 جارىم ميلليارد تەڭگە بولاتىن بىرنەشە جوبا ماقۇلدانعان. ماسەلەن, الماتى قالاسى مەن تۇركىستان وبلىسى جاڭا مەشىت ماڭايىن اباتتاندىرۋعا كۇش سالماق. ال الماتى وبلىسى اۋەزوۆ داڭعىلىنىڭ بويىنان جاياۋ جۇرگىنشىلەر ءۇشىن «اباي جولى» دەپ اتالاتىن جوبانى جۇزەگە اسىرادى.
باتىس قازاقستان وبلىسى اۋەزوۆ الاڭىن قايتا جاڭعىرتادى. بۇل جۇمىستارعا مەملەكەت قازىناسىنان بولەك كاسىپكەرلەر قارجىسى دا تارتىلادى دەپ كوزدەلگەن.
– ءبىز وڭىرلەرگە ۇسىنىستار ايتىپ وتىرمىز. بىرىنشىدەن, ەڭسەلى جاڭا كوپىردى جارىقتاندىرۋ. نىسان جاڭا كەيىپكە ەنسە, شاھاردىڭ دا شىرايى اشىلا تۇسەدى. ودان كەيىن ەرتىس وزەنىنىڭ جاعالاۋىن اباتتاندىرۋ. قالعانى ساياباقتار مەن كوشەلەردى كوركەيتۋ سياقتى جوبالار, – دەدى قالا اكىمى ەرماك ءسالىموۆ.