جاقسى باستامانىڭ ماقساتتى جالعاسى

ۆولونتەرلىك قوزعالىس وكىلدەرى ءۇشىن ۇيىمداستىرىلعان مۇنداي ارنايى القالى جيىننىڭ ناق اقتوبەدە وتكىزىلۋىنىڭ دە وزىندىك ءمانى مەن ءمانىسى جوق ەمەس. ويتكەنى وڭىردە سوڭعى كەزدە ۆولونتەرلەر قوزعالىسى تۇراقتى سيپات الىپ كەلەدى. وڭىردەگى ۆولونتەرلەر توبىنىڭ سانى مەن ساپالىق قۇرامى دا جىلدان-جىلعا تولىعا تۇسۋدە. 2019 جىلدىڭ قىركۇيەك ايىنان باستاپ اقتوبە ايماعىندا ۆولونتەرلىك قىزمەتتى جانداندىرۋ مەن ىنتالاندىرۋعا بەلسەندى ءمان بەرىلە باس­تادى. بۇل جاعىمدى جايت ەلباسىنىڭ ۆولونتەرلىك قىزمەتپەن بەلسەندى تۇردە اينالىساتىن جوعارى وقۋ ورىندارىنىڭ ستۋدەنتتەرىنە ستيپەنديا مولشەرىن وتىز پايىزعا ارتتىرۋ جونىندەگى تاپسىرماسى اياسىنان تۋىندايدى. وسى ورايدا وڭىردە «الەۋمەتتىك ستۋدەنتتىك كرەديت» جوباسى جۇزەگە اسىرىلىپ جاتىر. اتالعان جوبا اياسىندا وبلىستاعى جوعارى وقۋ ورىندارىندا وقيتىن ۆولونتەر جاستارعا ءتيىستى كۆوتالار ءبولۋ قاراستىرىلعان.

ەندىگى كەزەكتە ۆولونتەرلەر قىزمەتىنىڭ باستى وكىلدەرى مەن قاتىسۋشىلارى كىمدەر بولۋى كەرەك دەگەن ساۋالعا جاۋاپ ىزدەپ كورگەندى ءجون كوردىك. بۇل ارادا ءبىر نارسە ايقىن. ەڭ الدىمەن ۆولونتەرلەردىڭ قاتارى جاس ازاماتتاردىڭ, سونىڭ ىشىندە ستۋدەنتتەر مەن وقۋشىلاردىڭ قاتارىنان تولىعا تۇسسە, مۇنىڭ ءوزى كىم كىمگە دە سۇيىسپەنشىلىك سەزىمىن تۋعىزباق. وسى ارقىلى ولاردىڭ بويىندا بەلسەندى ومىرلىك ۇستانىمدارعا قاتىستى داعدىلار قالىپتاساتىنىنا شەك كەلتىرۋگە بولمايدى. بۇگىنگى تاڭدا ءدال وسى باعىتتى ۇستانا ءبىلۋ ءارى پارىز, ءارى مىندەت. سوڭعى كەزدە تىلدىك قورىمىزعا ەمىن-ەركىن ەنىپ, قۇلاققا ءسىڭىستى بولىپ بارا جاتقان ۆولون­تەر­لىك ۇعىمى حالقىمىزدىڭ ەجەلگى ۇعىم-تۇسىنىگىنە سايعاندا, قىسىلعانعا قولۇشىن بەرۋ, جابىققاندى جۇباتۋ, جەسى­رىن قاڭعىرتپاۋ, جەتىمىن جىلاتپاۋ بولىپ شىقپاي ما؟ اقتوبەدە وتكىزىل­گەن ۆولونتەرلەردىڭ حالىقارالىق جيى­نى كەزىندە وسىنداي ىزگىلىك پەن مەيى­رىم­دىلىك جولىندا جۇرگەن جانداردىڭ باسى قوسىلىپ, ورتاق ماسەلەلەردى بىرگە تالقىلاعانى ەجەلگى سالت-ءداستۇرىمىزدىڭ ساباقتاستىعى مەن ونىڭ قايتادان جاڭ­عى­رۋىن­داي اسەر قالدىردى.

فورۋم كەزىندە ۇلتتىق ۆولونتەرلەر جەلىسىنىڭ ءتورايىمى ۆەرا كيم 2020 جىلى باستالاتىن ۆولونتەر جىلى – جومارت جۇرەكتى جاندار ءۇشىن جاڭا مۇمكىندىكتەر كەزەڭى بولا الاتىنى جونىندە ورامدى وي ساباقتادى. ۇلتتىق ۆولونتەرلەر جەلىسى جەتەكشىسىنىڭ ايتۋىنشا, قازىرگى كەزدە ەلىمىزدى ۆولونتەرلىك قوزعالىس 80 ۇيىمنىڭ باسىن بىرىكتىرەدى. ۆولونتەرلەردىڭ اقتوبەدەگى فورۋمعا تىكەلەي ۆولونتەرلىك قوزعالىستىڭ باستى جوباسىن جاساقتاعان جاڭاشىلداردىڭ قاتىسۋى دا ونىڭ مارتە­بە­سىن كوتەرە تۇس­كەنى كامىل. سونداي-اق مۇن­داعى كوتە­رىلگەن ماسەلەلەر جانە ايتىل­عان وي-پىكىرلەر مەن ۇسىنىستار نەگى­زىنەن 2016 جىلدىڭ جەلتوقسان ايىندا قا­بىل­دان­عان «قازاقستان رەسپۋب­لي­كا­سى­نىڭ ۆو­لون­تەر­لىك قىزمەتى تۋرالى» زاڭى شەڭ­بەرىندە شەگەندەلگەنى دە اتاپ ايتۋعا تۇرارلىق.

ءبىر سوزبەن ايتقاندا, بۇگىندە ۆولون­تەر­لىك ىستەر مەن قادامدار قۇر بوس ءجۇرىس ەمەس, قابىرعالى قۇجاتتار اياسىنان تامىر تارتۋدا. ۆولونتەرلەردىڭ رەسمي مارتەبەسى جانە قۇقىقتارى مەن ناقتى اتقاراتىن مىندەتتەرىنىڭ بەلگىلەنۋى ورىستەرىن وسىرە تۇسپەك. تاعى دا جەلى جەتەكشىسىنىڭ سوزىمەن تۇيىندەگەندە, ۆولونتەرلەر جۇرەگىنىڭ قالاۋى بويىنشا وزگەلەرگە تيگىزەتىن كومەگى مەن قامقورلىعى ءۇشىن اقى مەن سىي دامەتپەيدى. ءارى مۇقتاج جاندارعا ءوز شاپاعاتىن تيگىزۋدىڭ اينىماس پارىزى دەپ سانايدى.

ۆولونتەرلىك قوزعالىستىڭ اۋقىمى مەن قۇلاشى وتە كەڭ. ونىڭ ءورىسىن تەك ءبىر عانا جەكەلەگەن ادامدارعا كورسەتىلەتىن قايىرىمدىلىق سيپاتتاعى كومەكتەرمەن شەك­تەي سالۋعا بولمايدى. ۆولونتەرلىك قوعامدىق ءومىردىڭ بارلىق سالاسىنا ارا­لاس­قان جاعدايدا عانا تولىققاندى بولا تۇسپەك. ماسەلەن, اقتوبە ايما­عىن­دا ەكولوگيالىق جانە وندىرىستىك پروب­لە­مالاردىڭ وڭتايلى شەشىلۋىنە جەدەل ءۇن قوسىپ جۇرگەن ۆولونتەرلەر بار. سولاردىڭ ءبىرى ءوزىنىڭ بەلسەندى ازاماتتىق ۇستانىمىن ۇدايى تانىتىپ جۇرگەن جان پەتر مۋراشكەۆيچ دەسەك, قاتەلەسە قويماسپىز. ول بيىل اقتوبە قالاسى ماڭىنداعى وزەن ارنالارىن كەڭەيتەمىز دەگەن ماقساتپەن ونىڭ جاعاسىنداعى ءزاۋلىم اعاشتار مەن ساياسى مول بايتەرەكتەر ورىنسىز وتالعان كەزدە, وعان قارسى ءوز ويى مەن تۇجىرىمىن العا تارتا ءبىلدى. ول كوپشىلىكتى تولعاندىرعان ماسەلەگە قاتىستى تەك قيسىندى ءارى ورىندى وي-پىكىر ايتىپ قويۋمەن شەكتەلمەي, وسى ءىستى اتقارىپ جۇرگەن مەردىگەرلىك كاسىپورىنداردىڭ قىزمەتىنە قوعامدىق تەكسەرۋ جۇرگىزۋدى قولعا الىپ, تابيعاتقا زيانىن تيگىزەتىن ءىس-ارەكەتتەردىڭ توقتاتىلۋىنا سەپتىگىن تيگىزە ءبىلدى.

الەمدىك تاجىريبەگە سۇيەنسەك, وركە­نيەتتى ەلدەردە ۆولونتەرلەردىڭ قاتى­سۋىن­سىز ءبىر دە ءبىر اۋقىمدى شارا وتكىزىلمەيدى. سونىڭ ىشىندە ءوز ەلىمىزدە دە قازىرگى كەزدە ۇلكەندى-كىشىلى دەڭگەيدەگى ءىس-شارالاردىڭ دەنى ۆولونتەرلەردىڭ قاتىسۋىمەن وتكىزىلىپ جۇرگەنى ءمالىم. حالىقارالىق فورۋم كەزىنە قازىر رەسپۋبليكامىزدا قانشا ەرىكتى جاس بار دەگەن ساۋال دا كوتەرىلدى. ۆەرا كيمنىڭ ايتۋىنشا, ولاردىڭ سانىن ءدال ايتۋ قيىنداۋ. دەگەنمەن ونىڭ دەڭگەيلەس سانى قانشا ەكەنىن ءبىلىپ جۇرۋگە جاڭادان قۇرىل­عان ۆولونتەرلەردىڭ بىرىڭعاي پلاتفورماسى كومەكتەسەدى ەكەن. سونداي-اق بۇل جەرگە ءوزىن ۆولونتەر رەتىندە ساناي الاتىن ازامات تىركەلەتىن بولسا, ول ۆولون­تەرلىك قوزعالىس اياسىنداعى سوڭعى جاڭا­لىق­تارمەن تانىسۋعا مۇمكىندىك الادى. سونىمەن قاتار پلاتفورمادا ۆو­لونتەرلەردىڭ كومەگىن قاجەت ەتەتىن جان­دارعا ءوز ءوتىنىش-تىلەكتەرىن قالدىرۋ مۇم­كىن­دىكتەرى قاراستىرىلىپتى.

قايىرىمدىلىعى مەن قايىرىمى مول, ىزگىلىگى مەن مەيىرىمى تەرەڭ قوعام عانا الدىنا قويعان ماقساتىن تولىق ورىنداپ شىعا الارى حاق. بۇل تۇرعىدا ەجەلگى حالىقتىق سالت-ءداستۇر مەن بۇگىنگى ۆولونتەرلىك ءىستى ءبىر بىرىمەن ۇندەستىرىپ ساباقتاستىرا بىلگەن قازاقستاندىق قوعامنىڭ كەلەشەگى جارقىن دەۋگە تولىق نەگىز بار. اقتوبەدە وتكىزىلگەن ۆولونتەرلەردىڭ حالىقارالىق جيىنىندا جاسالعان باستى تۇيىندەردىڭ ءبىرى وسىنداي.

اقتوبە