اتىراۋ وبلىسىنىڭ جىلىوي اۋدانى اۋماعىنداعى «تەڭىز» كەنىشىندە ەكى جۇمىسشىنىڭ 5 مەتر بيىكتىكتەگى ساتىدان قۇلاعانى بەلگىلى بولدى. بۇل تۋرالى وبلىستىق توتەنشە جاعداي دەپارتامەنتىنىڭ ءباسپاسوز قىزمەتى حابارلادى.
وقىس وقيعا «تەڭىزشەۆرويل» بىرلەسكەن كاسىپورنىنىڭ يگەرۋىندەگى الىپ كەنىشتە 27 شىلدەدە 11 ساعات شاماسىندا ورىن العان. بىرلەسكەن كاسىپورىننىڭ ۇزاق جىلداردان بەرگى تۇراقتى مەردىگەرلەرىنىڭ بىرىنەن سانالاتىن «دەنحولم جولداس» جشس-دە جۇمىس جاسايتىن ەكى جۇمىسشى كتل-2 قوندىرعىسىنداعى قۇرىلىس ساتىلارىن بۇزۋ بارىسىندا 5 مەترلىك بيىكتەن قۇلاعان. ولاردىڭ ءبىرىنىڭ جاسى 36-دا, ەكىنشىسى 47 جاستا ەكەن.
جاراقات العان جۇمىسشىلار الدىمەن «تەڭىزشەۆرويلدىڭ» ەمحاناسىنا, كەيىننەن تىكۇشاقپەن اتىراۋ قالاسىنداعى وبلىستىق اۋرۋحاناعا جەتكىزىلگەن. قازىر جاراقات العان جۇمىسشىنىڭ ءبىرى جان ساقتاۋ بولىمىنە جاتقىزىلدى. ال «جابىق باس سۇيەك-مي جاراقاتى جانە ومىرتقانىڭ زاقىمدانۋى» دياگنوزى قويىلعان ەكىنشى جۇمىسشىعا نەيروحيرۋرگيا بولىمىندە دارىگەرلىك ەم-دوم كورسەتىلۋدە.
جولداسبەك شوپەعۇل,
«ەگەمەن قازاقستان».
اتىراۋ وبلىسى.