رەسەيدىڭ بەيبىتشىلىك جانە كەلىسىم فەدەراتسياسىنىڭ, ماسكەۋدەگى “قازاق ءتىلى” قوعامىنىڭ جانە رەسەي جازۋشىلار وداعىنىڭ ۇيىمداستىرۋىمەن وتكەن ادەبي كەش جازۋشى, قازاقستاننىڭ ەڭبەك سىڭىرگەن قايراتكەرى, م. شولوحوۆ جانە پ.پيكۋل اتىنداعى حالىقارالىق سىيلىقتاردىڭ لاۋرەاتى, رەسەي ادەبيەت اكادەمياسىنىڭ اكادەميگى ءسابيت دوسانوۆتىڭ جەتپىس جاسقا تولعان مەرەيتويىنا ارنالدى. كەشتى ورىستىڭ كورنەكتى اقىنى, كوپتەگەن ادەبي سىيلىقتاردىڭ لاۋرەاتى ليۋدميلا ششيپاحينا جۇرگىزىپ وتىردى.
قازاقستان رەسپۋبليكاسىنىڭ رەسەي فەدەراتسياسىنداعى توتەنشە جانە وكىلەتتى ەلشىسى زاۋىتبەك تۇرىسبەكوۆ بۇل ادەبي كەشتىڭ تاعدىرلاس كورشى ەكى ەل پرەزيدەنتتەرى ن.ءا. نازارباەۆ پەن د.ا. مەدۆەدەۆ ءجۇرگىزىپ وتىرعان سارابدال ساياساتتىڭ ءماۋەلى جەمىستەرىنىڭ ءبىرى, دوستىق قارىم-قاتىناستىڭ سالتاناتى ەكەنىن اتاپ ايتتى. ال, رەسەي مەملەكەتتىك سىيلىعىنىڭ لاۋرەاتى جۇمابەك جەلقوباەۆ كەشتىڭ ءتاربيەلىك مانىنە توقتادى. ونان كەيىن ءسوز العان كورنەكتى سىنشى فەليكس كۋزنەتسوۆ, م.شولوحوۆ اتىنداعى حالىقارالىق سىيلىقتىڭ لاۋرەاتى ۆالەنتين سوروكين, اكادەميك-تاريحشى ۆالەنتين وسيپوۆ, رەسەي ادەبيەت اكادەمياسىنىڭ پرەزيدەنتى ۆلاديمير ميرنەۆ, تاتار ادەبيەتىنىڭ كورنەكتى وكىلى ياميل مۋستاۆين جانە باسقالار “اق ارۋانا” پوۆەسى مەن “ەكىنشى ءومىر”, “تاۋ جولى” روماندارىنىڭ, “جيىرماسىنشى عاسىر” ەپوپەياسىنىڭ اۆتورى ءسابيت دوسانوۆتىڭ رەسەيدە عانا ەمەس, ەۋروپا ەلدەرىنە دە كەڭىنەن تانىمال, كەڭ قۇلاشتى, كەمەل ويلى سۋرەتكەر ەكەندىگىن ناقتى فاكتىلەر ارقىلى سۇيسىنە اڭگىمەلەدى. ارميان اقىنى گلان ونيانيان, ورىس اقىنى ليۋدميلا ششيپاحينا, ت.ب. مەرەيتوي يەسىنە ارنالعان ولەڭدەرىن وقىدى. كەش بارىسىندا ءسوز العان گەنەرال-لەيتەنات ەرلان مىرزابەكوۆ كورنەكتى مەملەكەت قايراتكەرى, مەملەكەتتىك دۋمانىڭ دەپۋتاتى گەننادي زيۋگانوۆتىڭ مەرەيتوي يەسىنە دەگەن ىستىق ىقىلاستى قۇتتىقتاۋى مەن سىي-سياپاتىن جەتكىزسە, راۋشان قاناپيانوۆا مەملەكەتتىك دۋمانىڭ ەسكەرتكىش مەدالىن تاپسىردى.
كەشكە رەسەي مادەنيەتى مەن ادەبيەتىنىڭ, عىلىمى مەن ونەرىنىڭ كورنەكتى وكىلدەرى, قوعام قايراتكەرلەرى, ماسكەۋلىك قازاقتار, ستۋدەنت جانە جۇمىسشى جاستار قاتىستى.
“ەگەمەن-اقپارات”.