جامبىلدىق «داڭقتى سپورتشىلار الاڭى» اشىلدى

الاڭنىڭ اشىلۋ سالتاناتىندا گرەك-ريم كۇرەسىنەن ماسكەۋدە وتكەن وليمپيادا ويىندارىنىڭ جەڭىمپازى, الەم چەمپيونى, قازاق كسر ەڭبەك سىڭىرگەن جاتتىقتىرۋشىسى جاقسىلىق ۇشكەمپىروۆ وبلىس سپورتىنىڭ بۇگىنگە دەيىن جەتكەن جەتىستىكتەرىنىڭ از ەمەس ەكەنىن ايرىقشا اتاپ ءوتىپ, اتالعان نىساننىڭ اشىلۋىمەن كوپشىلىكتى قۇتتىقتادى. سونىمەن قاتار جامبىل وبلىسى اكىمىنىڭ ءبىرىنشى ورىنباسارى بەكبولات ورىنبەكوۆ اتالعان سالانى دامىتۋدا وڭىردە كوپتەگەن جۇمىستاردىڭ اتقارىلىپ جاتقانىن ايتىپ ءوتتى. اعىمداعى جىلدىڭ وزىندە وڭىردە 40 سپورت نىسانى پايدالانۋعا بەرىلگەن. كەلەسى جىلى تاعى 92 نىسان ەل يگىلىگىنە بەرىلەتىن بولادى. سونىمەن قاتار, وبلىستا قازىنا قارجىسى ەسەبىنەن 2 جانە دەمەۋشىلەر ەسەبىنەن 1 سپورت كەشەنى سالىنۋدا. جىل باسىنان بەرى حالىقارالىق دەڭگەيدەگى بايراقتى باسەكەلەردە ەل نامىسىن قورعاعان 14 سپورتشى جۇلدەلى ورىنعا يە بولعان. سونىمەن قاتار, اتالعان جيىندا الاڭعا ەسىمى جازىلعان بىرقاتار سپورتشىلارعا ارنايى كۋالىكتەر تابىستالدى.

اشىلىپ وتىرعان «داڭقتى سپورتشىلار الاڭىنىڭ» ورتاسىندا بيىكتىگى 6,5 مەتردى قۇرايتىن فاكەل ورنالاسقان. ونىڭ ەكى شەتىندە تراۆەرتين جانە گرانيت ماتەريالىنان دايىندالعان, بيىكتىگى 3 مەتر, ۇزىندىعى 9 مەتر بولاتىن 2 قۇرمەت تاقتاسى قويىلعان. قۇرمەت تاقتاسىندا جامبىل وڭىرىنەن شىققان داڭقتى 145 سپورتشىنىڭ جانە 96 ەڭبەگى سىڭگەن جاتتىقتىرۋشىنىڭ ەسىمى جازىلعان. ولاردىڭ ىشىندە جاقسىلىق ۇشكەمپىروۆ, بولات ءجۇمادىلوۆ, ەرماحان ىبىرايىموۆ, باقتيار ارتاەۆ, بەيبىت ىستىباەۆ, اقجۇرەك تاڭاتاروۆ, ەلدوس سمەتوۆ سىندى سپورت ساڭلاقتارى بار.