اتا-جۇرتىنان الىستا جۇرگەن باۋىرلارىمىزدىڭ ۇل-قىزدارىن تاۋەلسىز مەملەكەتىمىزدىڭ بۇگىنگى جەتىستىكتەرىمەن تانىستىرىپ, كەمەلدى بولاشاعىن كورسەتۋ ماقساتىندا, سونىمەن قاتار جاستاردىڭ اتا-بابالارى ءبىر زاماندارى ءومىر سۇرگەن مەكەنىن تانىستىرۋ نيەتىندە وسىدان جەتى جىل بۇرىن “قازاقستان – اتا جۇرتىم, قاسيەتىم – انا ءتىلىم” اتتى حالىقارالىق وليمپيادا جەتى جىلدان بەرى ۇزدىكسىز وتكىزىلىپ كەلەدى. بۇل شارا ەلباسى نۇرسۇلتان نازارباەۆتىڭ شەتەلدەردەگى قانداستاردى قولداۋ جونىندەگى 1998 جىلعى وكىمىنە بايلانىستى جۇزەگە اسىرىلىپ كەلە جاتىر. بيىلعى وليمپيادا كيەلى جايىق وڭىرىندەگى ورال قالاسىندا كەشە ءوز جۇمىسىن باستادى. وبلىستىق دراما تەاترىنىڭ عيماراتىندا وتكەن العاشقى ديدارلاسۋ كەزىندە جەر انا كەلبەتىندەگى انا – قازاقتىڭ ارعى-بەرگى تاريحىن جىر ءتىلىندە ايتا كەلىپ, ساحنا تورىنە كۇلتەگىن, تونىكوك, تۇمار حانىم, سىرىم باتىر سەكىلدى الىپتاردى شىعارىپ, اتالى سوزدەرىن ايتقىزدى.
بۇدان كەيىن تورتكۇل دۇنيەنىڭ بۇرىش-بۇرىشىنان كەلگەن ۇل-قىزداردى, ناقتىلاي تۇسسەك قىتاي, فرانتسيا, مونعوليا, رەسەي, وزبەكستان, قىرعىزستان ت.ب. مەملەكەتتەردەن كەلگەن وقۋشىلاردى وبلىس اكىمىنىڭ ورىنباسارى نۇرلان نوعاەۆ قۇتتىقتاپ, ەلىم, جەرىم دەپ كەلگەن جاس ۇرپاقتىڭ وسى اتا-جۇرتىم دەگەن ءىلتيپاتىنىڭ استارىندا ۇلكەن جەڭىستىڭ جاتقانىن تىلگە تيەك ەتتى. ال ءبىلىم جانە عىلىم مينيسترلىگىنە قاراستى “دارىن” ورتالىعىنىڭ ديرەكتورى ت.بيتۋوۆا جەتى جىل ىشىندە جۇزدەگەن جاستاردىڭ وتانىنا كەلىپ جوعارعى وقۋ ورىندارىنا تۇسكەنىن, ولاردىڭ الدى قازىر قىزمەت ەتىپ جۇرگەنىن جەتكىزسە قازىلار القاسىنىڭ ءتوراعاسى, اكادەميك ومىرزاق ايتباەۆ يگىلىكتى شاراعا ۇيتقى بولعان وبلىستىڭ ازاماتتارىنا شىن نيەتتەن العىسىن ءبىلدىردى .
سالتاناتتى ءراسىم ۇستىندە قالاداعى مەكتەپ وقۋشىلارى ءازىرلەگەن ءان-كۇي الما-كەزەك ساحنا تورىنەن كورىنىس تاۋىپ, جيىلعان جۇرتتىڭ ەرەكشە ءىلتيپاتىنا يە بولدى. ەندىگى جەردە شەتەلدەن كەلگەن الپىستان اسا وقۋشىلاردىڭ جۇزدەن جۇيرىك شىققاندارعا ءبىلىم جانە عىلىم مينيسترلىگىنىڭ ارنايى گرانتى تاپسىرىلاتىن بولادى.
تەمىر قۇسايىن.