تاۋەلسىزدىك كۇنى قارساڭىندا ءبىر توپ باتىسقازاقستاندىق مەملەكەتتىك ناگرادالارعا يە بولدى. كەۋدەسىنە وردەن-مەدال تاعىلعان جانداردىڭ اراسىندا تانىمال ونەر جۇلدىزدارى دا, قاراپايىم ەڭبەك ادامدارى دا بار.
قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ جارلىعىمەن مەملەكەتتىك جانە قوعامدىق قىزمەتتە سىڭىرگەن ەڭبەگى, ەلدىڭ الەۋمەتتىك-ەكونوميكالىق جانە مادەني دامۋىنا, حالىقتار اراسىنداعى دوستىق پەن ىنتىماقتاستىقتى نىعايتۋعا قوسقان ۇلەسى ءۇشىن ۇسىنىلعان مەملەكەتتىك ماراپاتتى باتىس قازاقستان وبلىسىنىڭ اكىمى عالي ەسقاليەۆ سالتاناتتى جاعدايدا يەلەرىنە تابىس ەتتى.
- تاۋەلسىزدىكتىڭ ارقاسىندا تاريحى بىتە قايناسقان, تاعدىرى ورتاق ءبىرتۇتاس حالىققا اينالدىق. تىرلىگى جاراسقان, بىرلىگى باعىن اشقان ەلمىز. قازاق حالقىندا «ىنتىماقتى ەلدىڭ ىرىسى مول» دەگەن دانالىق ءسوز بار. بىرلىگىمىزدىڭ ارقاسىندا قازاق ەلى كۇللى الەمگە تانىلىپ, كوك بايراعى بيىككە جەلبىرەدى. تاۋەلسىزدىكتىڭ ارقاسىندا جولىمىزدى تاۋىپ, رۋحاني, مادەني بايلىعىمىزدى تۇگەندەدىك. ەلباسىنىڭ «قازاق دالاسىنىڭ بىرىنەن-ءبىرى ارتىق-كەمى جوق» دەگەن ادەمى ءسوزى بار. وتانىمىزدىڭ دامۋىنا قازاقستاننىڭ بارلىق وبلىسى ءوز ۇلەسىن قوستى. سونىڭ ىشىندە باتىس قازاقستان وبلىسىنىڭ جۇرتشىلىعى دا تاۋەلسىزدىك جولىندا ەرەن ەڭبەك ەتتى. سوناۋ 1991 جىلدان بەرى وبلىسىمىز وركەندەدى, ەكونوميكامىز بىرتىندەپ دامىپ, حالىقتىڭ ءال-اۋقاتى ارتتى. مادەني-رۋحاني جەتىستىكتەرگە قول جەتكىزدىك, ۇمىت قالعان مۇرامىز قايتا جاڭعىردى. وسىنىڭ بارلىعى ەل بىرلىگىنىڭ, ەل ازاماتتارىنىڭ ەڭبەكقورلىعىنىڭ, وتانداستارىمىزدىڭ بولاشاققا دەگەن نىق سەنىمىنىڭ ارقاسى دەپ بىلەمىن, - دەدى ءوڭىر باسشىسى.
سونىمەن, مەملەكەتتىك ماراپاتقا يە بولعان باتىسقازاقستاندىقتاردىڭ اراسىندا حاديشا بوكەەۆا اتىنداعى باتىس قازاقستان وبلىستىق قازاق دراما تەاترىنىڭ ءارتىسى سەردەش قاجىمۇراتوۆ – «پاراسات» وردەنىمەن, «اسان-اۋىل» جشس ديرەكتورى بەيبىت باتنيازوۆ, «جايىق ەت» جشس ديرەكتورى تەمىرعالي ەسكەندىروۆ جانە باتىس قازاقستان وبلىستىق سايلاۋ كوميسسياسىنىڭ مۇشەسى مارات تاجىمۇقانوۆ – «قۇرمەت» وردەنىمەن, قازتالوۆ اۋدانىنداعى «دوررەمسەرۆيس» جشس-نىڭ تراكتورشى-ءماشينيسى احات مۇحانبەتكەرەەۆ, جاڭاقالا اۋدانىنداعى «بىرلىك مال زاۋىت» جشس-نىڭ اعا شوپانى قويشىباي ساپاروۆ, تەرەكتى اۋدانىنداعى «پروگرەسس» شارۋا قوجالىعىنىڭ كومباينشىسى الەكساندر چەليك – ءىىى دارەجەلى «ەڭبەك داڭقى» وردەنىمەن ماراپاتتالدى. سونداي-اق بىرقاتار ازامات «ەرەن ەڭبەگى ءۇشىن», «شاپاعات» مەدالدەرىنە, قازاقستان رەسپۋبليكاسىنىڭ قۇرمەت گراموتاسىنا, قر پرەزيدەنتىنىڭ جانە قازاقستان حالقى اسسامبلەياسىنىڭ العىس حاتىنا يە بولدى. ولاردىڭ اراسىندا «ەرەن ەڭبەگى ءۇشىن» مەدالىنە يە بولعان ورالدىق ەڭبەك ارداگەرى, بەلگىلى دومبىراشى ەدىگە نابيەۆ, «شاپاعات» مەدالىمەن ماراپاتتالعان جاڭاقالا اۋدانىنداعى اۋدانارالىق ساۋىقتىرۋ اۋرۋحاناسى وڭالتۋ ورتالىعىنىڭ دارىگەرى زاۋرەش عۇماروۆا دا بار.
باتىس قازاقستان