الماتىدا ءا. قاستەەۆ اتىنداعى مەملەكەتتىك ونەر مۋزەيىندە كەستە ونەرىنىڭ شەبەرى گۇلميرا سادىقوۆانىڭ «ينەمەن جازىلعان كەسكىندەمە» اتتى جەكە كورمەسى اشىلدى. اۆتوردىڭ قولتاڭباسىنان قازاقتىڭ ۇلتتىق دۇنيەتانىمىنىڭ ءيسى اڭقيدى.
«ينەمەن جازىلعان كەسكىندەمە» – گۇلميرا سادىقوۆانىڭ ءبىرىنشى كورمەسىنىڭ اتاۋى عانا ەمەس, ونىڭ شىعارماشىلىعىنىڭ كونتسەپتسياسىنىڭ ءمانى. اۆتوردىڭ شىعارماشىلىعىندا كەيدەيسوقتىق نەمەسە قالاي بولعان دا باسى ارتىق نارسە كەزدەسپەيدى. اۆتور ەنگىزگەن كەز كەلگەن سيمۆول, تاڭبا, زات, يشارا, اللەگوريا – سانالى ءارى نانىمدى تۇردە قوسىلادى. ەگەر دە كەسكىندەمەشىلەر وزدەرىنىڭ تۋىندىلارىنا كومپوزيتسيا قۇراردا, سۋرەت جوسپارلاپ, كەنەپكە قىلقالامىن جاقىنداتىپ, تۇستىك اكتسەنتتەرىن قوياتىن بولسا, ىسمەر-كەستەشىنىڭ قولىنداعى ينە – قىلقالامنىڭ, ال ماتا – كەنەپتىڭ ءرولىن اتقارادى. ول سۋرەتتى ينەمەن عاجاپ ەتىپ سالادى, سۋرەتشى ءۇشىن ءاربىر ءجىپ ارالىعى كەسكىندەمەنىڭ جاعىندىسىنا تەڭ.
–گۇلميرا سادىقوۆا ايقاس كەستەگە شەبەردىڭ شىعارماشىلىق الەۋەتىن اناعۇرلىم اشا تۇسەتىن باسپا كەستە تەحنيكاسىن ءتاۋىر سانايدى. بۇل تەحنيكا شەبەردىڭ تەمپەرامەنتىمەن جانە ومىرلىك ىرعاعىمەن سايكەسە ۇيلەسەدى. ينەنى شەبەر يگەرگەن گۇلميرا تۇرسىنقىزى قىلقالاممەن جازاتىن اسقان شەبەر ءتارىزدى جۇمىس ىستەيدى. كەيدە جىپتەرى كەنەپ بەتىندە ەركىن جاتقان بوياۋ جاعىندىلارى سياقتى دەستەلەنە قالادى. كەيدە, شوقتالىپ جينالىپ, كىلەم تەحنيكاسىنا ىڭعايلانىپ, پاستوزدىق كەسكىندەمەگە دە ۇقساپ كەتەدى. باسقاشا جاعدايدا – ءتۇرلى ءتۇستى جىپتەردىڭ ورنەگى وتە نازىك لەسسيروۆكانى ەسكە تۇسىرەدى. تۇيمە, پايەتكا, تەڭگە, مونشاق, مايدا مونشا, توقىما, تابيعي ەلەمەنتتەر سياقتى دەكوراتيۆتىك ەلەمەنتتەردى پايدالانىپ, اۆتورلىق كەستە كولەمدى كەسكىندەمەنىڭ بەلگىلەرىنە يە بولادى, دەيدى كورمە جەتەكشىسى وكسانا تانسكايا
كىتاپ – سۋرەتشى شابىتىنىڭ باستى قايناركوزى, ونىڭ وقىپ شىققان قازىرگى سۇيىكتى زاماناۋي جازۋشىلاردىڭ دا, الەمدىك ادەبيەت كلاسسيكتەرىنىڭ دە شىعارمالارىنىڭ ىشىنەن ول اۆتورلىق كەستە سيۋجەتتەرىنە كورىنىس-بەينە تابادى. گۇلميرا تۇرسىنقىزىنىڭ ءاربىر كارتيناسىنىڭ سيۋجەتتەن بولىنبەيتىندەي جەكە شىعۋ تاريحى بار, وسى حيكايامەن جاڭا تانىسقان كورەرمەن شەبەردىڭ يدياسىنىڭ مانىنە بارىنشا تولىقتاي ەنە الادى.
سۋرەتشىنىڭ ينتەراكتيۆتى دەپ اتاۋعا بولاتىن تولىقتاي جاۋاپكەرشىلىگى بار مۇنداي جۇمىستارى كورەرمەننىڭ جۇرەگىنەن ەرەكشە ورىن الدى. مىسالعا, «ماحاببات جاي-كۇيلەرى» تۋىندىسىن تاماشالاۋ كەزىندە, كورەرمەننەن ەرەكشە پسيحولوگيالىق تەستەن ءوتۋىن جانە قويىلعان ءار ءتۇستى ءتورت راۋشان گ ۇلىنىڭ ىشنەن وزىنە كوبىرەك ۇناعانىن تاڭداپ الۋىن ۇسىنادى. جاۋاپ ۇزاق ۋاقىت كۇتتىرمەيدى. بايقاپ كورىڭىز. ال «القىزىل گۇل» اتتى كارتيناسى ءتىپتى ەڭ باعا جەتپەس تىلەگىڭىزدى ورىندايدى. بۇل ومىردە سىننان وتكەن.
«ەسكەرتكىش», «ماريونەتكالار», «تەنتەك تىشقاندار», «بالا مىسىق كيتي», «پاريج كورىنىستەرى» – اۋەلدە گاردەروب بۇيىمى بولىپ, سودان كەيىن ينتەرەر بۇيىمى رەتىندە «ەكىنشى رەت ءومىر ءسۇرىپ جاتقاندار». ولاردىڭ ارقايسىسى ەسكىرگەن سوڭ ءوز قوجايىنىنىڭ گاردەروبىنان شىعىپ قالعان نەمەسە كەستەشىگە ەرەكشە تارتىمدى كورىنىپ, توقىما پرينتىندە ورىندالعان سادىقوۆتاردىڭ جەكە زاتتارى. گۇلميرا سادىقوۆا جۇمىسقا كىرىسەردە العاشقى سۋرەتپەن سالىستىرعاندا اۆتور تانىماستاي ءجيى وزگەرتەتىن تۇستىك پاليترانى ابدەن ويلاستىرادى, سودان كەيىن بارىپ فونىن جاسايدى, كومپوزيتسيانىڭ قوسىمشا بولشەكتەرىن انىقتايدى, اڭگىمەنىڭ جەلىسىن كەڭەيتىپ, تۋىندىنىڭ اياقتالعانىن ءبىلدىرىپ, ناقتى كورنەكىلىك بەرەتىن كارتينانى مىندەتتى تۇردە جاقتاۋدىڭ ىشىنە سالادى.