كەشە پارلامەنت ءماجىلىسىنىڭ توراعاسى ورال مۇحامەدجانوۆ رەسەي فەدەرالدىق جينالىسى مەملەكەتتىك دۋماسى مەن قازاقستان رەسپۋبليكاسى پارلامەنتىنىڭ ءماجىلىسى اراسىنداعى ىنتىماقتاستىق تۋرالى پالاتاارالىق پارلامەنتتىك كوميسسيانىڭ مۇشەلەرىمەن كەزدەستى.
ءماجىلىس توراعاسى قازاقستان مەن رەسەي اراسىنداعى ىنتاماقتاستىق بايلانىستىڭ تەرەڭدە جاتقانىن, بۇگىنگى تاڭدا تاۋەلسىز ەلدەر رەتىندە جاڭا تۇرعىدا قارىم-قاتىناس ورناپ, ءوزارا ءتۇسىنىستىك جانە دوستىق نيەتتە كوپتەگەن كەلىسىمدەرگە قول قويىلعانىن ايتىپ ءوتتى. ارقاشان كەلىسىم جاساسقاندا ەكى مەملەكەتتىڭ دە مۇددەسى بىردەي قاراستىرىلاتىنىن جەتكىزدى. “قازاقستان مەن رەسەيدىڭ پرەزيدەنتتەرى مەن ۇكىمەت باسشىلارى, پارلامەنت پالاتالارىنىڭ توراعالارى اراسىندا جوعارى دەڭگەيدە كەزدەسۋلەر ءوتىپ كەلەدى. ونىڭ ءبارى ەكى ەل اراسىنداعى بايلانىستى ارتتىرۋعا ىقپال ەتەتىنى ءسوزسىز”, – دەدى ءماجىلىس توراعاسى. سپيكەر قازاقستاننىڭ ەقىۇ-عا توراعالىق ەتۋى ەلدىڭ ومىرىندە ۇلكەن ماڭىزعا يە ەكەنىن ايتىپ ءوتتى. ال قاڭتاردىڭ 29-ى كۇنى پارلامەنت پالاتالارىنىڭ بىرلەسكەن وتىرىسىندا قازاقستان پرەزيدەنتى نۇرسۇلتان نازارباەۆ جاريا ەتكەن جولداۋىندا ەل الدىنا ۇلكەن ءمىندەتتەر جۇكتەپ وتىرعانىن باياندادى.
مەملەكەتتىك دۋما مەن ءماجىلىس اراسىنداعى ىنتىماقتاستىق تۋرالى پالاتاارالىق پارلامەنتتىك كوميسسيانىڭ تەڭ توراعاسى ولەگ ساۆچەنكو ءارىپتەستەرى اتىنان قازاقستانعا دەگەن يگى نيەتتەستىگىن جەتكىزدى.
“ەگەمەن-اقپارات”.