«قاراپايىم زاتتار ەكونوميكاسى» باعدارلاماسىنىڭ جۇزەگە اسىرىلۋى ەلوردا اكىمى التاي كولگىنوۆتىڭ باسشىلىعىمەن IQala الاڭىندا تالقىلاندى. كەڭەسكە تاۋار وندىرۋشىلەردىڭ وزدەرى - جيھاز, توقىما, قۇرىلىس, اعاش وڭدەۋ ونەركاسىبى وتاندىق قاۋىمداستىقتارىنىڭ وكىلدەرى, وكپ جانىنداعى وڭىرلىك كەڭەستىڭ مۇشەلەرى قاتىستى. بۇل تۋرالى نۇر-سۇلتان قالاسى اكىمدىگىنىڭ ءباسپاسوز قىزمەتى حابارلادى.
«ەلباسى نۇرسۇلتان نازارباەۆ حالىققا جولداۋىندا «قاراپايىم زاتتاردىڭ ەكونوميكاسىن دامىتۋ قاجەتتىلىگى تۋرالى» اتاپ ءوتتى.
مەملەكەت باسشىسى قاسىم-جومارت توقاەۆ وتاندىق ءوندىرىس تاۋارلارىنىڭ كولەمىن ارتتىرىپ, ءىرى كومپانيالار مەن مەملەكەتتىك ساتىپ الۋلارداعى جەرگىلىكتى قامتۋدى ارتتىرۋعا ەرەكشە نازار اۋدارۋدى تاپسىردى.
ەلوردا اكىمى التاي كولگىنوۆ «قاراپايىم زاتتار ەكونوميكاسىنىڭ» الەۋەتىن تولىققاندى پايدالانۋ قاجەتتىگىن اتاپ ءوتتى.
ء«بىز بيزنەستى جۇرگىزۋ ءۇشىن جاعداي جاسايمىز, جوبالاردى قولدايمىز. ءونىم/تاۋار وندىرۋگە, ساپاسىن جاقسارتۋعا, باسەكەگە تۇسۋگە, ەكسپورتقا شىعۋعا بارلىق مۇمكىندىكتەر بار. «قاراپايىم زاتتار ەكونوميكاسى» باعدارلاماسىن دامىتۋ اياسىندا جەڭىلدەتىلگەن نەسيە بەرۋ بويىنشا جۇمىس جۇرگىزەمىز», دەدى ا. كولگىنوۆ.
CSI كونسالتينگتىك كومپانياسىنىڭ اعا سەرىكتەسى ولجاس قۇدايبەرگەنوۆ قالا كاسىپورىندارىنىڭ جۇمىسىنا تالداۋ جاساپ, «قاراپايىم زاتتار ەكونوميكاسى» باعدارلاماسىنىڭ باسىم باعىتتارىن, پروبلەمالىق ماسەلەلەردى جانە ولاردى شەشۋ جولدارىن اتاپ ءوتتى.
قازىر «قاراپايىم زاتتار ەكونوميكاسىنىڭ» نەگىزگى باعىتتارى قۇرىلىس يندۋسترياسى, توقىما, جەڭىل جانە جيھاز ونەركاسىبى سالالارى. تاۋار وندىرۋشىلەر جاڭا جۇمىس ورىندارىن اشىپ, حالىقتى جۇمىسپەن قامتىپ جاتىر. قولايلى جۇمىس ءۇشىن iQala قالالىق بىرىڭعاي قىزمەت كورسەتۋ ورتالىعىنىڭ جۇمىسىن جالعاستىرۋ قاجەت, وندا كاسىپكەرلەرگە ء«بىر تەرەزە» قاعيداتى بويىنشا 139 قىزمەت كورسەتىلەدى. بۇگىنگى كۇنى كوميسسيا تاۋار وندىرۋشىلەردىڭ جوبالىق قۇجاتتامانى ازىرلەۋگە جانە ۆەب-پورتالدارعا ورنالاستىرۋعا قاتىسۋى بويىنشا شارالار ازىرلەدى, بۇل دا قوسىمشا قولداۋ», دەدى ولجاس قۇدايبەرگەنوۆ.
سونىمەن قاتار تاۋار وندىرۋشىلەردى قولداۋ ءۇشىن اكىمدىك «اتامەكەن» كاسىپكەرلەر پالاتاسىمەن بىرلەسىپ يندۋستريالىق سەرتيفيكاتتار بەرۋ بويىنشا جۇمىس جۇرگىزۋدە (جيھاز جانە جەڭىل ونەركاسىپ كاسىپورىندارى تەك يندۋستريالدىق سەرتيفيكات بولعان جاعدايدا عانا مەملەكەتتىك ساتىپ الۋعا قاتىسا الادى). بۇگىنگى كۇنى بۇل سەرتيفيكات 29 كاسىپورىنعا بەرىلدى,تاعى 2 ءوتىنىم قاراستىرىلۋدا», دەلىنگەن حابارلامادا.