قازاقستاندا جۇزدەن اسا جول كومپانياسى جول قۇرىلىسى, جولداردى جوندەۋ جانە كۇتىپ ۇستاۋ سالاسىنداعى سوڭعى جەتىستىكتەردى ۇسىنىپ وتىر. ەلوردادا حالىقارالىق «قازاۆتوجول - Kaztraffic-2019» كورمەسى جۇمىس ىستەۋدە. بۇل تۋرالى يندۋستريا جانە ينفراقۇرىلىمدىق دامۋ مينيسترلىگىنىڭ ءباسپاسوز قىزمەتى حابارلادى.
كورمەنى يندۋستريا جانە ينفراقۇرىلىمدىق دامۋ ۆيتسە-ءمينيسترى بەرىك كاماليەۆ اشتى. ول «قازاۆتوجول - Kaztraffic-2019» كورمەسىنىڭ قاتىسۋشىلارى مەن قوناقتارىن قارسى الا وتىرىپ, قازاقستاننىڭ اۆتوموبيل جولدارى جەلىسىن دامىتۋ مەن جەتىلدىرۋ يندۋستريا جانە ينفراقۇرىلىمدىق دامۋ مينيسترلىگىنىڭ الدىنا قويىلعان باستى مەملەكەتتىك مىندەتتەردىڭ ءبىرى ەكەندىگىن اتاپ ءوتتى.
«قازاقستان اۆتوموبيل جولدارى سالاسىنىڭ دامۋىنا ەرەكشە كوڭىل بولەدى. بۇگىنگى تاڭدا ءبىزدىڭ جولداردىڭ شامامەن 600 شاقىرىمى اقىلى. ءبىز جاڭا جۇيەلەر مەن جول كيىمى قۇرىلىمدارىن, اسفالت-بەتوندى قوسپالاردى دايىنداۋدىڭ جاڭا تەحنولوگيالارىن ەنگىزىپ جاتىرمىز. بۇگىن قازاقستاندىق جانە شەتەلدىك كومپانيالار كەلۋشىلەر نازارىنا جاڭا تەحنولوگيالاردى, جاڭا يدەيالاردى ۇسىندى», دەدى بەرىك قاماليەۆ.
ەكسپوزيتسياعا جىل سايىنعى داستۇرگە سايكەس قازاقستان رەسپۋبليكاسى, بەلارۋس, ۋكراينا, رەسەي, اقش, گەرمانيا, تۇركيا, قىتاي ەلدەرىنىڭ جۇزدەن اسا جەتەكشى كومپانيالارىنىڭ قازىرگى زامانعا ساي عىلىمي جانە تەحنيكالىق زەرتتەمەلەرى مەن ونىمدەرى قويىلدى. وسىلايشا كورمەدە جول زەرتحانالارىن, جۇك تيەگىشتەردى, قار كۇرەگىش جابدىق پەن باسقا دا تەحنيكانى كورۋگە بولادى.
«تمد ەلدەرى جولشىلارىنىڭ ۇكىمەتارالىق كەڭەسىنىڭ باستى مىندەتتەرىنىڭ ءبىرى – اۆتوموبيل جولدارى سالاسىنا جاڭا ماتەريالداردى, تەحنولوگيالاردى, زەرتحانالاردى ەنگىزۋ. بۇل رەتتە بىزگە «قازاۆتوجول – Kaztraffic» كورمەسى ۇلكەن قولداۋ كورسەتەدى. مۇنداعى الاڭدا سالا ماماندارى جىل سايىن ءتۇرلى پروبلەمالىق ماسەلەلەردى, ولاردى شەشۋ جولدارىن تالقىلايدى», دەپ اتاپ ءوتتى تمد ەلدەرى جولشىلارىنىڭ ۇكىمەتارالىق كەڭەسى حاتشىلىعىنىڭ باسشىسى بۋري كاريموۆ.
شارا اياسىندا سونداي-اق, «جول قۇرىلىسىنداعى يننوۆاتسيالىق تاسىلدەمەلەر: پەرسپەكتيۆالار مەن دامۋ» اتتى حالىقارالىق عىلىمي-تاجىريبەلىك كونفەرەنتسيا ۇيىمداستىرىلدى. مۇندا اۆتوموبيل جولدارى سالاسىنداعى يننوۆاتسيالار, جولداردىڭ ساپاسىنا, قاۋىپسىزدىگىنە, اۆتوموبيل جولدارىن كۇتىپ ۇستاۋ جانە دامىتۋعا قاتىستى كەڭ اۋقىمدى ماسەلەلەر قاراستىرىلۋدا. تىڭداۋشىلار الدىندا اقش, گەرمانيا, فرانتسيا, رەسەي جانە قازاقستانداعى تانىمال كومپانيالاردىڭ وكىلدەرى بايانداما جاسايدى. ماسەلەن, قازاقستاندىق تاراپ بيىل 60 جىلدىق مەرەيتويى اتالىپ وتكەن وتاندىق قازجولعزي جاڭا جەتىستىكتەرىن, 2019 جىلى قۇرىلعان ۇلتتىق جول اكتيۆتەرى ساپاسى ورتالىعىنىڭ جۇمىسىن كورسەتتى. بۇدان بولەك, «QazAvtoJol» ۇك» اق ساراپشىلارى اۆتوموبيل جولدارىن جوبالاۋ, سالۋ, جوندەۋ جانە كۇتىپ ۇستاۋ ماسەلەلەرىن كوتەرەتىن بولادى.
«قازاۆتوجول - Kaztraffic-2019» كورمەسى ەلوردادا 16-شى رەت وتكىزىلىپ وتىر. ول قازاقستاننىڭ عانا ەمەس, باسقا دا ەلدەردىڭ جول سالاسى ماماندارى ءۇشىن تابىستى ديالوگتىق الاڭعا اينالدى.