ەلوردادا Jas Otan جاستار قاناتىنىڭ 2025 جىلعا دەيىنگى «Jastar – Otanǵa!» باعدارلاماسىنىڭ جوباسىن ازىرلەۋ جونىندەگى جۇمىس توبىنىڭ العاشقى وتىرىسى ءوتتى.
جۇمىس توبىنىڭ قىزمەتى Jas Otan-نىڭ 2025 جىلعا دەيىن جوسپارلانعان باعدارلاماسىنا يدەيالار مەن ۇسىنىستاردى بىرلەسىپ دايىنداۋعا باعىتتالعان. باعدارلامانىڭ نەگىزگى ماقساتى - جاستار قاناتىنىڭ دامۋ ۆەكتورىن ايقىنداۋ, جاستاردى الەۋمەتتەندىرۋ ءۇشىن ناقتى تەتىكتەر مەن مەحانيزمدەردى دايىنداۋ, اۋىل جاستارىنا ارنالعان الەۋمەتتىك ءليفتتى دامىتۋ, جاستاردىڭ رۋحاني-ادامگەرشىلىك, پاتريوتتىق تاربيەسىن كۇشەيتۋ, جاس سپورتشىلارعا, شىعارماشىل, عىلىم-بىلىممەن اينالىساتىن جاستارعا جان-جاقتى قولداۋ كورسەتۋ, جەرگىلىكتى سايلاۋ ورگاندارىندا جاستاردىڭ ۇلەسىن ارتتىرۋ جانە وتباسى ينستيتۋتىن نىعايتۋ.
Jas Otan جاستار قاناتىنىڭ توراعاسى داۋلەت كارىبەك جوسپاردىڭ ماڭىزدىلىعىن اتاپ ءوتتى.
«بىزگە 2020 جىلى وسى قۇجاتتاردى قابىلداۋ قاجەت دەپ تاپسىرما بەرىلگەن بولسا, ءبىز بۇگىننەن باستاپ جاتىرمىز. سونىمەن قاتار جاستار قاناتىنىڭ 17 ايماقتاعى فيليالدارى دا ءاربىر جۇمىسشى جاستارمەن, ءوندىرىس ورنىنداعى ستۋدەنت, ودان بولەك بازارلارداعى ءوزىمىزدىڭ جاستارىمىزدى تارتۋ ءۇشىن ءتۇرلى فورماتتا كەزدەسۋلەر وتكىزىپ, ۇسىنىستار جيناقتايتىن بولادى», دەدى د. كارىبەك.
جۇمىس توبىنىڭ قۇرامىنا پارلامەنت ءماجىلىسىنىڭ دەپۋتاتتارى, پارتيا باسشىلىعى, ۋاكىلەتتى ورگان وكىلدەرى, قوعام قايراتكەرلەرى, ۇكىمەتتىك ەمەس ۇيىم وكىلدەرى, جاستار ۇيىمدارىنىڭ وكىلدەرى, ەڭبەك ەتىپ جۇرگەن, شىعارماشىل, سپورتشى جاستار مەن جاس كاسىپكەرلەر كىردى.
باعدارلامانى دايىنداۋ اياسىندا 12 كەزدەسۋ وتەدى دەپ كۇتىلۋدە. سونداي-اق جاستار ماسەلەلەرىن مۇقيات زەرتتەۋ جانە باعدارلاما بويىنشا شەشىمدەر مەن ۇسىنىستاردى ازىرلەۋ ءۇشىن, شاقىرىلعان ساراپشىلار مەن مۇشەلەر ء«بىلىم», «ەڭبەك جانە كاسىپتىلىك», «باقىتتى وتباسى», «پاتريوتيزم جانە بوس ۋاقىت» سياقتى سالالىق توپتار بويىنشا جۇمىس ىستەيتىن بولادى.
وتىرىس بارىسىندا جۇمىس توبىنىڭ بىرنەشە مۇشەلەرى ءوز ۇسىنىستارىن ايتتى.
- مەنىڭ ۇسىنىستارىمنىڭ ءبىرى شاكىرتاقى ايلىق ەسەپتىك كورسەتكىشكە بايلانسا, دەمەك اەك وسكەن جاعدايدا ستۋدەنتتەردىڭ الاتىن شاكىرتاقىسى وسەدى. ەكىنشىدەن مەكتەپ تۇلەكتەرىمەن كاسىپتىك باعدار بەرۋ بويىنشا جۇمىس سالعىرت نەمەسە ءتىپتى وتكىزىلمەيدى. ەكەۋ اراسىندا, ياعني مەكتەپ پەن جوو اراسىندا بايلانىس جوق. اقپاراتتاندىرۋ جۇمىستارىن جوعارى دەڭگەيدە وتكىزۋ كەرەك,- دەيدى «قازاقستان ستۋدەنتتەر اليانسى» كوشباسشىسى ءىلياس تۇستىكباەۆ.
باعدارلامانى دايىنداۋ كەزىندە جاستار تاراپىنان كەلىپ تۇسەتىن يدەيالار مەن ۇسىنىستار الەۋمەتتىك جەلىلەر, مەسسەندجەر جانە باق ارقىلى جينالاتىن بولادى. سونىمەن قاتار ەۋروپا مەن امەريكا ەلدەرى جاستار ۇيىمدارىنىڭ تاجىريبەسى زەرتتەلىپ, جاستار كوپ شوعىرلانعان كەزدەسۋلەردە, جۇمىس ورىنداردا, ستۋدەنتتىك كەزدەسۋلەردە, تاقىرىپتىق الاڭدار مەن سەسسيالاردا تالقىلاناتىن بولادى.
قورىتىندى قۇجات 2020 جىلى «Jas Otan» جق سەزىندە قابىلدانادى.