جوعارعى پالاتا دەپۋتاتتارى سەنات وتىرىسىندا اناستاسيا ششەگورتسوۆانى ورتالىق سايلاۋ كوميسسياسىنىڭ مۇشەسى ەتىپ تاعايىندادى. بۇل تۋرالى سەناتتىڭ ءباسپاسوز قىزمەتى حابارلادى.
قازاقستان رەسپۋبليكاسى كونستيتۋتسياسىنىڭ 58-بابى 3-تارماعىنىڭ 7) تارماقشاسىنا سايكەس پارلامەنت سەناتى توراعاسىنىڭ وسك مۇشەسى لاۋازىمىنا تاعايىنداۋ تۋرالى ۇسىنىسى سەنات قاراۋىنا ەنگىزىلگەن بولاتىن. سەناتورلار بۇل ۇسىنىسقا ءبىراۋىزدان قولداۋ ءبىلدىردى.
سونداي-اق قازاقستان رەسپۋبليكاسى مەن ۋكراينا اراسىنداعى ەكستراديتسيالاۋ تۋرالى شارت راتيفيكاتسيالاندى.
باس پروكۋروردىڭ ورىنباسارى مارات احمەتجانوۆ 2018 جىلعى 29 قازاندا نۇر-سۇلتان قالاسىندا جاسالعان كەلىسىم ەكى ەل اراسىندا ىزدەۋدە جۇرگەن ادامداردى قىلمىستىق جاۋاپكەرشىلىككە تارتۋ نەمەسە سوت ۇكىمىن ورىنداۋ ءۇشىن ەكستراديتسيالاۋ ماسەلەلەرىن رەتتەيتىنىن جەتكىزدى. قۇجاتتا ەكستراديتسيالاۋعا دا, ودان باس تارتۋ ءۇشىن دە نەگىزدەر قاراستىرىلعان.
«شارتتى راتيفيكاتسيالاۋ ەكى ەلدىڭ قىلمىسقا قارسى كۇرەستەگى ىنتىماقتاستىقتىڭ تيىمدىلىگىن ارتتىرادى. شارتتىڭ نەگىزگى ماقساتى - قىلمىستىق قۋدالاۋدى جۇزەگە اسىرۋ نەمەسە ۇستاپ بەرۋگە تۋرا كەلەتىن قىلمىستار بويىنشا سوت ۇكىمىن ورىنداۋ ءۇشىن ولاردىڭ اۋماعىنان ىزدەۋ سالىنعان ادامداردى ەكستراديتسيالاۋ سالاسىندا ىنتىماقتاستىقتى جۇزەگە اسىرۋ» دەپ اتاپ ءوتتى سەناتور اندرەي لۋكين.
ءاربىر تاراپ ءوزىنىڭ ۇلتتىق زاڭناماسى نەگىزىندە ءوز ازاماتتارىن بەرۋدەن باس تارتۋعا قۇقىلى.
قازاقستان رەسپۋبليكاسىنىڭ باس پروكۋراتۋراسى - وسى شارت بويىنشا قۇزىرەتتى ورگان.
1994 جىلعى 15 ساۋىردەگى كەدەن ىستەرىندەگى ىنتىماقتاستىق جانە ءوزارا كومەك تۋرالى كەلىسىمگە وزگەرىستەر ەنگىزۋ تۋرالى حاتتاما راتيفيكاتسيالاندى.
زاڭ جوباسىن ەلىمىزدىڭ قارجى ءمينيسترىنىڭ مىندەتىن اتقارۋشى بەرىك شولپانقۇلوۆ تانىستىردى.
كەلىسىمگە قول قويىلعاننان بەرى 20 جىل ءوتتى, سوندىقتان جاڭا ماتىندە بەرە وتىرىپ, حاتتامامەن ءتيىستى وزگەرىستەر ەنگىزۋ ارقىلى كەلىسىمنىڭ ەرەجەلەرىن جەتىلدىرۋ قاجەتتىگى تۋىنداعان بولاتىن.
تاۋەلسىز مەملەكەتتەر دوستاستىعى ۇكىمەت باسشىلارى كەڭەسىنىڭ دۋشانبەدەگى وتىرىسىندا 2018 جىلعى 1 شىلدەدە قول قويىلعان حاتتاما تمد-نىڭ كەدەن سالاسىنداعى نورماتيۆتىك-قۇقىقتىق بازاسىنا تۇگەندەۋ جۇمىستارىن جۇرگىزۋ قورىتىندىسى بويىنشا تمد-عا قاتىسۋشى مەملەكەتتەرمەن بىرلەسە وتىرىپ ازىرلەندى.
حاتتامادا مالىمەتتەردى بەرۋگە, سۇراۋ سالۋدىڭ نىسانى مەن مازمۇنىنا جانە ونىڭ ورىندالۋىنا, الىنعان اقپاراتتى پايدالانۋعا قاتىستى بىرقاتار نەگىزگى باپقا وزگەرىستەر ەنگىزۋ ۇسىنىلادى.
مەملەكەتتەردىڭ ورتالىق كەدەن ورگاندارىنىڭ اراسىندا ءارى مەملەكەتتەردىڭ اۋماقتىق كەدەن ورگاندارى اراسىندا تىكەلەي جۇزەگە اساتىن تاراپتاردىڭ سۇراۋ سالۋلارمەن الماسۋى قۇجاتتاعى جاڭالىقتاردىڭ ءبىرى بولىپ وتىر. بۇل كەدەن زاڭناماسى تالاپتارىنىڭ بۇزىلۋىن كورسەتەتىن دەرەكتەردى نەمەسە ءمان-جايلاردى انىقتاۋ ءۇشىن ءتيىمدى ىنتىماقتاستىققا ىقپال ەتەتىن بولادى.
تالقىلاۋ بارىسىندا سەنات باسشىسى مەملەكەتتىك شەكاراداعى وتكىزۋ بەكەتتەرىن جاڭعىرتۋ جونىندەگى بىرلەسكەن جوسپاردى ازىرلەۋ قاجەتتىگىنە جاۋاپتى مەملەكەتتىك ورگانداردىڭ نازارىن اۋداردى.