ەلورداداعى دوستىق ۇيىندە جاستار جىلى جانە «رۋحاني جاڭعىرۋ» باعدارلاماسى اياسىندا نۇر-سۇلتان قالاسى قازاقستان حالقى اسسامبلەياسىنىڭ ۇيىمداستىرۋىمەن ء«تىل – دوستىقتىڭ التىن كوپىرى» بايقاۋى ءوتتى.
بايقاۋدىڭ باستى ماقساتى مەملەكەتتىك ءتىلدى ۇيرەنۋ, سونداي-اق ەتنومادەني بىرلەستىكتەردىڭ وكىلدەرى مەن جاستاردى قازاق مادەنيەتى مەن شىعارماشىلىعىنا ىنتالاندىرۋ, قازاقستاندىق ءپاتريوتيزمدى تاربيەلەۋ جانە مەملەكەتتىك ءتىلدىڭ مارتەبەسى مەن ماڭىزىن ناسيحاتتاۋ بولىپ تابىلادى. ال كەشكە قوعام قايراتكەرلەرى, ەلوردالىق ەتنومادەني بىرلەستىكتەردىڭ جانە قحا جاستارىنىڭ وكىلدەرى قاتىستى.
«جاڭا ءبىر ءتىلدى مەڭگەرۋ – بولمەڭىزگە جاڭا تەرەزە ورناتقانمەن تەڭ. مەملەكەتتىك ءتىلدى مەڭگەرۋ بارشامىزدىڭ مىندەتىمىز. بۇل بايقاۋ ەلوردالىق قحا جاستارىنىڭ قانشالىقتى بەلسەندى ءارى قازاق تىلىنە دەگەن قۇرمەتىنىڭ جوعارى ەكەندىگىن كورسەتەدى», دەپ اتاپ ءوتتى نۇر-سۇلتان قالاسى قازاقستان حالقى اسسامبلەياسى كەڭەسىنىڭ مۇشەسى امانگەلدى سىزدىقوۆ.
بايقاۋعا بىلىكتى قازىلار باعاسىن بەردى. ال بايقاۋعا ەلوردالىق ەتنومادەني بىرلەستىكتەردىڭ جاستارى قاتىستى. ولاردىڭ قاتارىندا نۇر-سۇلتان قالاسى ۇيعىر ەتنومادەني بىرلەستىگى, «جايحۋن» قاراقالپاق ەتنومادەني بىرلەستىگى, «راديما» بەلورۋس مادەني بىرلەستىگى, «وبەرەگ» ۋكراين قوعامى, «Polacy» قوعامدىق بىرلەستىگى, «يۋنچي» دۇنگەن ەتنومادەني بىرلەستىگى جانە نۇر-سۇلتان قالاسى وزبەك ەتنومادەني بىرلەستىگى بولدى.
بارلىق قاتىسۋشى 3 كەزەڭ بويىنشا باقتارىن سىنادى. ءبىرىنشى كەزەڭدە ەتنومادەني بىرلەستىكتەردىڭ وكىلدەرى «مەنىڭ وتانىم – قازاقستان» تاقىرىبىندا اۋىزشا تانىستىرىلىم جاسادى. بىرىنەن ءبىرى اسقان بەينە-كورىنىستەر, بەزەندىرۋلەر قازىلار القاسىنىڭ كوڭىلىنەن شىقتى. تالانتتىڭ ناعىز شىڭدالاتىن ۋاقىتى ەكىنشى كەزەڭدە بايقالدى. بايقاۋعا قاتىسۋشىلار توپتىق جۇمىستارىن, ء«تىل – دوستىقتىڭ التىن كوپىرى» اتتى تەاترلاندىرىلعان قويىلىمدى كورەرمەندەر نازارىنا ۇسىندى. شەشەندىك قابىلەتتەرىن تانىتۋدان, سونداي-اق ساحنادا ءوزىن-ءوزى ۇستاۋ شەبەرلىكتەرى بويىنشا سىنعا ءتۇستى.
نۇر-سۇلتان قالاسى ۇيعىر ەتنومادەني بىرلەستىگىنەن ارۋجان ارزيدۋن, «جايحۋن» قاراقالپاق ەتنومادەني بىرلەستىگىنەن ايسانەم ايمبەتوۆا, «راديما» بەلورۋس مادەني بىرلەستىگىنەن سۆەتلانا تاراسوۆا, «وبەرەگ» ۋكراين قوعامىنان يۋليا لاگۋتكينا, «Polacy» قوعامدىق بىرلەستىگىنەن ماريا جۋليكوۆا, «يۋنچي» دۇنگەن ەتنومادەني بىرلەستىگىنەن زالينا يبراگيموۆا جانە نۇر-سۇلتان قالاسى وزبەك ەتنومادەني بىرلەستىگىنەن ديلدورا ابدۋلحاەۆا شەشۋشى كەزەڭدە قازاق ادەبيەتى كلاسسيكتەرىنىڭ جانە قازىرگى زامان ادەبيەتى اقىندارى مەن جازۋشىلارىنىڭ شىعارمالارىن مانەرلەپ وقىدى.
تارتىستى بايگەدە قازىلار القاسىنىڭ شەشىمەن 1-ورىندى نۇر-سۇلتان قالاسى ۇيعىر ەتنومادەني بىرلەستىگى, 2-ورىندى «Polacy» قوعامدىق بىرلەستىگى, 3-ورىندى «يۋنچي» دۇنگەن ەتنومادەني بىرلەستىگى يەلەندى. بايقاۋ جەڭىمپازدارى مەن بارلىق قاتىسۋشىلارعا ۇيىمداستىرۋشىلار اتىنان باعالى سىيلىقتار مەن العىس حاتتار تابىس ەتىلدى.