قىزىلوردا وبلىستىق قازاقستان حالقى اسسامبلەياسىنىڭ ۇيىمداستىرۋىمەن ەكى كۇنگە جوسپارلانعان «رۋحاني جاڭعىرۋ» باعدارلاماسى اياسىنداعى كەشەندى شارالار سىرداريا اۋدانىندا جالعاسىن تاپتى.
«قازاقتانۋ» رەسپۋبليكالىق عىلىمي-اعارتۋشىلىق جوباسى اياسىنداعى العاشقى لەكتسيانى «سىر ديدارى» گازەتىنىڭ باس رەداكتورى, وبلىستىق قحا جانىنداعى عىلىمي ساراپتامالىق توپ مۇشەسى ساكەن الداشباەۆ باستادى. ول لەكتسيا بارىسىندا «رۋحاني قازىنانى جاستاردىڭ بويىنا دارىتۋ» – قازاق حالقىنىڭ رۋحاني قۇندىلىقتارى, ەل تاريحىندا بولعان ەلەۋلى وقيعالار مەن جەتىستىككە جەتكەن تۇلعالار تۋرالى, ولاردىڭ وڭ تاجىريبەسى مەن جاستاردى تاربيەلەۋدەگى امالدارى جايىندا ايتىپ ءوتتى.
كەلەسى باياندامانى «ورلەۋ» پەداگوگيكالىق قىزمەتكەرلەردىڭ بىلىكتىلىگىن ارتتىرۋ ينستيتۋتىنىڭ ءبولىم باسشىسى, فيلوسوفيا عىلىمدارىنىڭ دوكتورى, پروفەسسور, وبلىستىق قحا جانىنداعى عىلىمي ساراپتامالىق توپ مۇشەسى بايمىرزا قوجامبەرليەۆ وقىدى. ول رۋحاني قۇندىلىقتاردىڭ قوعامدىق ومىردەگى قاتىناستارعا اسەرى – قازاق حالقىنىڭ قۇرىلۋى, مادەني جانە تاريحي قۇندىلىقتارى مەن قوعام رەتىندە دامۋ ساتىلارى تۋرالى, جاستارعا تاربيە بەرۋ, ۇرپاقتار ساباقتاستىعىن جالعاستىرۋ جايلى ءسوز قوزعادى.
سەميناردا كەلەلى ويلار ايتىلىپ, اۋدان تۇرعىندارى تاراپىنان سۇراقتار قويىلىپ, تۇشىمدى جاۋاپتار بەرىلدى.
باقىتتى وتباسى بولۋدىڭ قاعيداتتارى ايتىلدى
انالار كەڭەسىنىڭ مۇشەلەرى سىرداريا اۋدانىنىڭ ايەلدەرىنە ارناپ سەمينار وتكىزدى. وبلىستىق ىشكى ساياسات باسقارماسىنىڭ «تىلدەردى وقىتۋ ورتالىعى» كمم ديرەكتورى, وبلىستىق قحا جانىنداعى انالار كەڭەسىنىڭ ءتورايىمى نۇرساۋلە مۇساەۆا, «قىزىلوردا وبلىسى اكىمى اپپاراتىنىڭ «قوعامدىق كەلىسىم» كمم-ءنىڭ قىزمەتكەرى راحيما احمەتوۆا باقىتتى وتباسى بولۋدىڭ قاعيداتتارى, اجىراسۋدىڭ الدىن الۋ, وتباسىنداعى ۇرپاق تاربيەسى, جاسوسپىرىمدەر اراسىنداعى قىلمىس پەن قۇقىقبۇزۋشىلىق سىندى ماسەلەلەر توڭىرەگىندە اڭگىمە قوزعادى.
سونىمەن بىرگە جاستاردىڭ قوعام تىرلىگى ءۇشىن ماتەريالدىق ءوندىرىس سالاسىندا ەڭبەك ەتۋگە دايار بولۋىن, بىلىمگە, ونەرگە ىنتاسىن ۇنەمى جەتىلدىرۋگە جۇمىس ىستەۋى, قوعامداعى ومىرشەڭ وزگەرىستەرگە, يدەيالىق-ساياسي, الەۋمەتتىك-مادەني جۇمىستارعا ارالاسۋى تۋرالى ايتىپ ءوتتى. بۇل ماسەلەلەردى انالار كەڭەسىنىڭ مۇمكىندىكتەرىمەن ۇيلەستىرۋ تابىستى تاربيەنىڭ تاعى ءبىر نەگىزى ەكەندىگىنە توقتالا كەتتى.
انالار تاراپىنان ۇتىمدى ۇسىنىس-پىكىرلەر ايتىلىپ, ومىرلىك تاجىريبەلەر ورتاعا سالىندى.
ءتيىمدى ترەنينگ
سىرداريادا وتكەن جاستار ترەنينگىنە 30 اۋىل جاسى بەلسەندى تۇردە قاتىستى. ترەنينگتى قىزىلوردا وبلىسى اكىمى اپپاراتى قوعامدىق كەلىسىم» كمم-ءنىڭ قىزمەتكەرى قانات بوتجانوۆ جۇرگىزدى.
جاستار ورتاسىندا جاعىمدى پسيحولوگيالىق كليماتتى قالىپتاستىرۋ, ءتيىمدى ءوزارا قارىم-قاتىناس قۇرۋ جولدارىن باعامدادى. ۇيىمشىلدىق ارقىلى بيىك شىڭدار مەن جەڭىستەرگە جەتۋ جولدارىن زەردەلەدى. الداعى ماقساتتارىن ايقىنداي وتىرىپ, ۇجىمدىق جۇمىستىڭ ەرەكشەلىگىمەن تانىستى.
قىزىقتى ءارى پايدالى ترەنينگتەن جاستار كوتەرىڭكى كوڭىل كۇيمەن قايتتى.
كەشەندى شارا ەتنومادەني بىرلەستىكتەر جانىنداعى شىعارماشىلىق ۇجىمداردىڭ كونتسەرتىمەن قورىتىندىلاندى. اۋىل تۇرعىندارىنا ارنالعان كونتسەرتتىك باعدارلامادا اسەم ءان دە, ادەمى بي دە ورىندالدى. شىعارماشىلىق ۇجىمنىڭ ونەرىنە كورەرمەندەردىڭ قوشەمەتى تولاسسىز بولدى.