العاشقى جاساندى ينتەللەكت ۋنيۆەرسيتەتى اشىلادى

ءبىلىم ورداسى جۇمىسىن باس­تاپ ۇلگەرمەسە دە, بۇگىنگە دەيىن 3 مىڭنان استام تالاپكەر ءوز وتى­نىشتەرىن بەرىپ ۇلگەر­گەن. Interesting Engineering پورتالى­نىڭ حابارلاۋىنشا, نيەتتىلەر­دىڭ باسىم كوپشىلىگى ساۋد ارا­بيا­سى, ءباا, مىسىر, ءۇندىستان, قىتاي, الجير ازاماتتارى. جوعارى وقۋ ورنى 6 ماگيسترلىك, 3 دوكتور­لىق باعدارلاما ۇسىنادى دەپ جوسپارلانعان. 2020 جىل­دىڭ قىركۇيەگىندە ەسىك اشاتىن ءبىلىم ورداسى ءۇش نەگىزگى باعىت بويىنشا ءبىلىم بەرمەك. ولار: باعدارلامامەن قامتاماسىز ەتۋ, جاساندى ينتەللەكتىگە قاجەتتى باعدارلامالار جازۋ جانە وڭدەۋ. الەمنىڭ تۇكپىر-تۇكپىرىنەن جينالاتىن ستۋدەنتتەردىڭ اي سايىن شاكىرتاقى الۋعا دا مۇمكىندىگى بولادى. وعان قوسا زامان تالابىنا ساي جابدىقتالعان جاتاقحانا, مەديتسينالىق ساقتاندىرۋ, عىلى­مي زەرتتەۋلەرمەن اينا­لىسۋعا بارلىق جاعداي جاسالادى.

ۋنيۆەرسيتەت كەڭەسىنە وكس­فورد, بەيجىڭدەگى تسينحۋا, ماس­سا­چۋسەتس, ميچيگان ۋنيۆەر­سي­تەت­تەرىنىڭ الدىڭعى قاتارلى پرو­فەسسورلارى شاقىرتىلعان. ساراپشىلار بۇل ۋنيۆەرسيتەتتىڭ كوپ ۇزاماي ۇلكەن سۇرانىسقا يە بولارىن, سونىمەن قوسا الدىڭعى قاتارلى وقۋ ورىندارىنىڭ تىزىمىنە ەنەتىنىن بولجاپ وتىر. بۇل وي دا نەگىزسىز ەمەس. ويتكەنى 2 جىلدا جاساندى ينتەللەكتىنىڭ دۇنيەجۇزىلىك نارىقتاعى كولەمى 4 ترلن اقش دوللارىنا جەتسە, 10 جىلدان كەيىن الەم ەكونوميكاسىنا 16 ترلن اقش دوللارى كولەمىندە پايدا اكەلەرى بۇعان دەيىن دە ايتىلىپ كەلگەن. ءباا مەملەكەتتىك ءمينيسترى ءارى ۋنيۆەرسيتەت كەڭەسىنىڭ توراعاسى سۇلتان ءال-جابەر جاڭا ۋنيۆەرسيتەت جاڭا داۋىرگە جول اشاتىنىن ايتادى. «وقۋ باعدارلاماسى تولىقتاي جاساندى ينتەللەكتكە نەگىزدەلگەن. بۇل سالاداعى العاشقى مامانداردى دايىندايتىن بولعاندىقتان ۇلكەن جۇمىستار جۇرگىزىلدى, كوپ زەرتتەۋلەر جاسالدى. جاڭا داۋىر­گە باستايتىن ماماندارى­مىز­عا ۇلكەن مىندەت ارتىلادى, ءبىز ءوز كەزەگىمىزدە سوعان ساي ءبىلىم مەن داڭعىل جول سالۋعا دايىنبىز», دەدى كەڭەس توراعاسى. سونىمەن قاتار ءال-جابەر جاساندى ينتەللەكتىنىڭ بۇگىنگى الەمدى وزگەرتىپ جاتقانىن دا تىلگە تيەك ەتتى. «ادامنىڭ شەكسىز ويىن جاساندى ينتەللەكتتى ۇيرەنۋگە, تۇسىنۋگە, تانۋعا باعىتتاساق, بۇ­دان دا ۇلكەن ناتيجەگە قول جەت­كىزە الامىز. ءبىر كەزدەرى ەلەكتر جا­رىعى, تەمىر جول مەن سمارتفوندار ءومىرىمىزدى وزگەرتكەندەي, جاساندى ينتەللەكت تە الەۋمەت پەن ەكونوميكا سالاسىنا ەلەۋلى وزگەرىستەر الىپ كەلەرى ءسوزسىز», دەدى.

ال بىرەگەي ۋنيۆەرسيتەتتىڭ پرەزيدەنتى لاۋازىمى وكسفورد ۋنيەرسيتەتىنىڭ پروفەسسورى مايكل برەديگە بۇيىردى. ونىڭ ايتۋىنشا, جاساندى ينتەللەكتى مەڭگەرۋ كەلەشەكتە قاي سالادا بولسا دا ۇلكەن مۇمكىندىكتەر مەن جەتىستىكتەرگە جول اشادى. جالپى, بىرىككەن اراب امىرلىكتەرى – جاساندى ينتەللەكتتىڭ ەكونومي­كاداعى مۇمكىندىكتەرىن بايقاپ, ونى ءىس جۇزىندە قولدانا باستاعان العاشقى مەملەكەتتەردىڭ ءبىرى. 2017 جىلى ەل ۇكىمەتى ء«باا 2021» دەپ اتالاتىن جوسپار بە­كىتتى. جوسپاردا باسقارۋ مۇم­كىن­دىكتەرىن جاقسارتۋ ءۇشىن جاڭا تەحنولوگيا قولدانىلاتىن سە­گىز سالا كورسەتىلگەن. ولاردىڭ قاتارىندا عارىش, جاڭعىرمالى ەنەرگيا, سۋ رەسۋرستارى مەن ءبىلىم بەرۋ بار.

ۋنيۆەرسيتەتپەن قوسا ءباا-دە الەمدەگى العاشقى جاساندى ينتەللەكت ماسەلەلەرى بويىنشا مي­نيستر تاعايىندالدى. بۇل لاۋازىم­عا ومار ءال-ولاما بەكىتىلدى. Oxford Insights اقپا­راتىنا سۇيەنسەك, جاساندى ين­تەللەكتى مەملەكەت­تىك باسقارۋعا قولدانۋ مۇمكىن­دىگى بويىنشا باە الەم ەلدەرى اراسىندا 19-ورىنعا يە. بۇل يندەكسكە 194 مەملەكەت كىرگەن. رەيتينگ كوشىن سينگاپۋر باستاپ تۇر. جاساندى ينتەللەكتىنىڭ وتا­نى سانالاتىن سيليكون القا­بى ورنالاسقان اقش 4-ورىندا بولسا, قىتاي تىزىمدە 20-ورىندى الىپ تۇر.

جوعارىدا ايتىپ وتكەنىمىز­دەي, ۋنيۆەرسيتەتكە جاساندى ينتەللەكت سالاسىنا قىزىققان كەز كەلگەن جاس وقۋعا تۇسە الادى. ەلىمىزدە جاڭا تەحنولوگيالار مەن جاساندى ينتەللەكتكە قىزىعۋشىلىعى بار جاستاردىڭ سانى كۇن ساناپ ارتىپ كەلە جات­قانىن ەسكەرسەك, 2020 جىلى بىرە­گەي ۋنيۆەرسيتەت­تىڭ العاشقى ستۋ­دەنت­تەرىنىڭ قاتا­رىندا وتانداس­تارى­مىزدى دا كورۋىمىز عاجاپ ەمەس.