«قازاقاۆتودور» جشس رەسپۋبليكالىق ماڭىزى بار جولداردى 2019-2020 جىلعى قىسقى كەزەڭگە دايىنداۋ اياسىندا كولىكتىڭ قاۋىپسىز جانە كەدەرگىسىز قوزعالۋىنا ىقپال ەتەتىن قاجەتتى جۇمىستاردى جۇرگىزۋدە. بۇل تۋرالى يندۋستريا جانە ينفراقۇرىلىمدىق دامۋ مينيسترلىگىنىڭ ءباسپاسوز قىزمەتى حابارلادى.
بيىل قىسقى كەزەڭدە كۇتىپ ۇستاۋ جۇمىستارىمەن حالىقارالىق جانە رەسپۋبليكالىق جولداردىڭ 24,9 مىڭ شاقىرىمى قامتاماسىز ەتىلەدى دەپ جوسپارلانۋدا. جولداردىڭ 21,1 مىڭ شاقىرىمى «قازاقاۆتودور» كومپانياسىنىڭ بالانسىندا. ال 3,4 مىڭ شاقىرىم جول نىسانداردا قايتا جاڭارتۋ جۇمىستارىن جۇرگىزىپ جاتقان مەردىگەرلىك ۇيىمداردىڭ كۇتىمىنە الىناتىن بولادى. سونىمەن قاتار جولداردىڭ 422 شاقىرىمى كۇردەلى جوندەۋ جۇمىستارى ءجۇرىپ جاتقان اۋىسپالى نىساندارعا جاتادى.
قىسقى كەزەڭگە دايىندىق جۇمىستارى اعىمداعى جىلدىڭ مامىرىندا باستالعان بولاتىن. شىلدە جانە تامىز ايلارىنىڭ ارالىعىندا جول شارۋاشىلىعى وبەكتىلەرىنىڭ قىسقى كەزەڭدەگى جۇمىسقا ازىرلىگى تەكسەرىلدى.
بۇگىنگى تاڭدا وندىرىستىك بازالاردى, قازاندىقتاردى, جىلىنۋ پۋنكتەرى مەن قويمالاردى جوندەۋ جۇمىستارى اياقتالۋ ۇستىندە. مۇنىمەن قوسا, تەحنيكانى قىسقى كەزەڭگە دايىنداۋ جۇمىستارى جالعاسىپ جاتىر. قىسقى كەزەڭدە جۇمىس ىستەيتىن تەحنيكانىڭ جالپى سانى 1085 بىرلىكتى قۇراسا, ولاردىڭ 123 بىرلىگى جوندەلۋدە. تەحنيكا دايىندىعى 91%-دان اسادى.
جولداردى قىسقى كەزەڭگە دايىنداۋ شارالارى كەشەنىنىڭ ماڭىزدى بولىگى بولىپ پايدا بولاتىن كوكتايعاق سياقتى قۇبىلىستارعا جەدەل دەن قويۋ ءۇشىن قاجەتتى ماتەريالداردى دايىنداۋ سانالادى. تايعاققا قارسى ماتەريالدار دوڭدەرى, بۇرىلىستارى جانە ەڭىستەرى بار اسا قاۋىپتى جولدارعا شىعارىلادى. كاسىپورىننىڭ كۇشىمەن ەڭىستەر مەن رەزەرۆتەردى اعاشتار مەن بۇتالاردان, جول جيەكتەرىن شوپتەن تازارتۋ جۇمىستارى جۇرگىزىلدى. جولشىلار ۋاقىتشا «تايعاق جول», «جىلدامدىقتى شەكتەۋ» سياقتى بەلگىلەردى, سونداي-اق, قاردان قورعاۋ قالقاندارىن دايىندادى. وڭىرلەردىڭ كليماتتىق جاعدايلارىنا سايكەس سۋ وتكىزگىش قۇبىرلاردىڭ تەسىكتەرىن جابۋ جۇمىستارى جۇرگىزىلىپ جاتىر.