قازاقستاندا جاستار ساياساتىن قارجىلاندىرۋ كولەمى العاش رەت ءجىو-ءنىڭ 0,5 پايىزىنا جەتتى. بۇل تۋرالى بۇگىن ماجىلىستەگى ۇكىمەت ساعاتىندا اقپارات جانە قوعامدىق دامۋ ءمينيسترى داۋرەن اباەۆ ايتتى دەپ حابارلادى قازاقپارات.
ونىڭ اتاپ وتۋىنشە, جاستارعا مەملەكەتتىك قولداۋ شارالارىن شارتتى تۇردە ەكىگە بولۋگە بولادى. ولار – ءداستۇرلى باعىتتار بويىنشا ىسكە اسىرىلاتىن جالپى شارالار جانە جاستار جىلىنا ورايلاستىرىلعان جاڭا باستامالاردى قامتيتىن ارنايى شارالار.
«جالپى شارالارمەن 2 ميلليوننان استام وقيتىن جانە جۇمىس ىستەيتىن جاستار قامتىلعان. وعان جوعارى ءبىلىم الۋ ءۇشىن گرانتتار, ستيپەنديالار, تەگىن جاتاقحانالار كىرەدى. ارنايى شارالارمەن 722 مىڭ ادام نەمەسە ەلدەگى ءاربىر بەسىنشى جاس قامتىلعان. وتكەن جىلمەن سالىستىرعاندا جاستار ساياساتىن قارجىلاندىرۋ كولەمى 40 ەسەگە ءوستى. بۇل كورسەتكىش العاش رەت ىشكى جالپى ءونىمنىڭ 0,5 پايىزىنا دەرلىك جەتتى» دەدى ول.
د.اباەۆتىڭ ايتۋىنشا, جاستار جىلى اياسىندا مەملەكەتتىك قولداۋدىڭ بارلىق شارالارىن جۇيەلەندىرۋ ءۇشىن ۇكىمەت جول كارتاسىن قابىلدادى. قۇجاتتا 89 تارماق بار. ولاردىڭ ارقايسىسى جاستار ءۇشىن ومىرلىك ماڭىزى بار تۇرعىن ۇيمەن قامتاماسىز ەتۋ, جۇمىسقا ورنالاستىرۋ, ءبىلىم بەرۋ, جاس وتباسىن قولداۋ جانە الەۋمەتتىك بەلسەندىلىكتى دامىتۋ سىندى ماسەلەلەردى قوزعايدى.
«بۇگىنگى كۇنى 13 پۋنكت تولىعىمەن اياقتالدى. بۇلار ناقتى ءىس-شارالاردى وتكىزۋدى كوزدەيدى. مىسالى, «زەرەن» جاستار جازعى لاگەرى. ول جاستار كوشباسشىلارىنا ارنالعان ترەنينگتەر, شەبەرلىك ساباقتار مەن سەمينارلار وتكىزۋگە باعىتتالعان. قالعان 76 پۋنكت ىسكە اسىرىلۋدا. مىسالى, «جاس كاسىپكەر» جوباسى 3 جىلعا ەسەپتەلگەن جانە تەك 2021 جىلى اياقتالادى» دەدى مينيستر.
بۇل رەتتە ول بىرنەشە جوبانىڭ ورىندالماۋ قاۋپى بار ەكەندىگىن دە جاسىرمادى.
«ونىڭ باستى سەبەپتەرى – ورتالىقتاعى جانە جەرگىلىكتى جەرلەردەگى مەملەكەتتىك ورگانداردىڭ كەلىسىلمەگەن ءىس-ارەكەتتەرى, جەكەلەگەن مينيسترلىكتەردى قايتا ۇيىمداستىرۋ نەمەسە جەتكىزۋشىلەردىڭ جەكەلەگەن كونكۋرستارعا قاتىسۋعا قىزىعۋشىلىعىنىڭ بولماۋى. مىسالى, 16-تارماق بويىنشا ەڭبەك مينيسترلىگىنىڭ جاس قازاقستاندىقتاردى كاسىپتىك باعدار بەرۋگە باعىتتالعان ء«وزىڭدى تاپ» جوباسىن ىسكە اسىرۋى كوزدەلگەن. ءبىرىنشى كونكۋرس وتپەدى دەپ تانىلدى. كونكۋرستىق راسىمدەر قايتا وتكىزىلەدى. ەندى ءبىر پۋنكت – «مادەنيەت مينيسترلىگىنىڭ قازاقستان جاس جازۋشىلارىنىڭ شىعارماشىلىعىن قولداۋ ءۇشىن ادەبيەت اكادەمياسىن اشۋ». الايدا, قازىرگى ۋاقىتتا بىرىڭعاي ۇستانىم, كوزقاراس, بىرىڭعاي تاسىلدەر ازىرلەنۋدە. جالپى, ءبىز مۇنداي جوبالار بويىنشا وڭتايلى شەشىمدەر ىزدەۋدەمىز» دەدى داۋرەن اباەۆ.