گلۋبوكوە اۋدانىندا رەگبي ۇيىرمەسى اشىلدى

گلۋبوكوە اۋدانىنىڭ پرەدگورنوە اۋىلىندا جاقىندا رەگبي ۇيىرمەسى جۇمىسىن باستاپتى. اۋدانعا اۋىل بالالارىن جاتتىقتىرۋ ءۇشىن وسكەمەننەن جاس مامان كەلىپتى. «بۇعان دەيىن بۇل اۋداندا رەگبي سپورتى بولماعان ەكەن. جۇمىسقا كىرىسكەنىمە ءبىر اپتا عانا بولدى. 12 قىز بەن 24 ۇلدى ىرىكتەپ, ءۇش كوماندا جاساقتادىم. بەس كۇن بويى توقتاۋسىز جاتتىعامىز, ەندى سەنبى كۇنى دايىندالۋ ءۇشىن زال سۇراپ وتىرمىز» دەيدى ءوزىن اليونا دەپ تانىستىرعان جاس جاتتىقتىرۋشى.

 نەگىزى ءوزى تارازدىڭ تۋماسى ەكەن. حالىقارالىق دەڭگەيدەگى سپورت شەبەرى دەگەن اتاعى بارىن جەتكىزگەن ول وسكەمەندەگى س.امانجولوۆ اتىنداعى شقمۋ-دى بىتىرگەنىن ايتتى.

كراسنويارسك اۋىلدىق وكرۋگىنىڭ اكىمى ولەگ ەگوروۆتىڭ ايتۋىنشا, جاس مامانعا وسكەمەندەگى بالالارعا ارنالعان وبلىستىق سپورتتىق مەكتەپ ارنايى شتات ءبولىپتى. «بالالار جاتتىعىپ جاتقان سپورتتىق الاڭ بيىل وبلىس اكىمى دانيال احمەتوۆتىڭ باستاماسىمەن بولىنگەن قاراجاتقا سالىندى. مۇنداي قاراجات ءتورتىنشى بيۋدجەت دەڭگەيىنە وتكەن اۋىلداردىڭ بارلىعىنا ءبولىندى. اۋىلداعى ءوزىن ءوزى باسقارۋ قاۋىمداستىعىمەن اقىلداسا كەلە وسىنداي الاڭ سالۋدى ءجون دەپ شەشتىك. بۇل جەردە جازدا رەگبي, قىستا حوككەي ويناۋعا بولادى. مەنىڭ ويىمشا, مۇنداي حوككەي قوراپشاسى وبلىستا از. اۋماعى 320 شارشى مەتردى قۇرايتىن الاڭ كانادالىق ستاندارتپەن سالىنعان» دەيدى ول.

شىعىس قازاقستان وبلىسى,

گلۋبوكوە اۋدانى,

پرەدگورنوە اۋىلى