ەل گازەتىنىڭ عاسىرلىق تويىنا وراي ءال-فارابي اتىنداعى قازاق ۇلتتىق ۋنيۆەرسيتەتىندە «ەگەمەن قازاقستانعا - 100 جىل» رەسپۋبليكالىق مەرەكەلىك شاراسى جالعاسۋدا. شارا شەڭبەرىندە ىرگەلى وقۋ وشاعىنىڭ رەكتورى عالىم مۇتانوۆ باسىلىمنىڭ الماتى بولىمشەسىندە ايشىقتى قىزمەت اتقارعان بىرقاتار ارداگەر جۋرناليستەرگە ۋنيۆەرسيتەتتىڭ «ەرەن ەڭبەگى ءۇشىن» مەدالىن تابىس ەتتى.
مۇنداي ايتۋلى قۇرمەتكە وقۋ ورنىنىڭ كەشەگى تۇلەكتەرى قازاقستاننىڭ قۇرمەتتى ءجۋرناليسى ماماديار جاقىپ, اقپارات سالاسىنىڭ ۇزدىكتەرى گۇلزەينەپ سادىرقىزى مەن تالعات ءسۇيىنباي يە بولدى.
ماراپات يەلەرى ۋنيۆەرسيتەت قابىرعاسىنان تاياۋدا عانا اشىلعان «ەگەمەن قازاقستان» گازەتىنىڭ زەرتحانالىق اۋديتورياسىندا تىلشىلىك تىرشىلىككە بەت العان بولاشاق جۋرناليستەرمەن قاۋىشتى. وندا قازاق جۋرناليستيكاسىنىڭ وتكەنى مەن بۇگىنى تۋراسىندا اڭگىمە ءوربىپ, مايتالمان ماماندىقتىڭ قىر-سىرى جونىندە ورامدى ويلار ايتىلدى. جۋرناليستيكا فاكۋلتەتىنىڭ دەكانى بەلگىلى عالىم-جۋرناليست ساعاتبەك مەدەۋبەك قوناقتارعا ءبىلىم وتاۋىنىڭ 85 جىلدىعى, فاۋلتەتتىڭ قىزىقتى ءومىرى تۋرالى باياندادى.
– ەل ءومىرىنىڭ ەلەۋلى ساتتەرىن تاسقا تاڭبالاعان «ەگەمەن قازاقستان» گازەتىنىڭ تاريحى تەرەڭدە جاتىر. باسىلىمنىڭ تاسىن ورگە سۇيرەگەن تالاي قابىرعالى قالامگەرلەردىڭ ءال-فارابي اتىنداعى قازاق ۇلتتىق ۋنيۆەرسيتەتىنەن, ونىڭ ىشىندە ءبىزدىڭ جۋرناليستيكا فاكۋلتەتىنەن قاناتتانعانىن ماقتانىشپەن ايتامىز. وقۋ وشاعى مەن باس باسىلىمنىڭ اراسىنداعى رۋحاني بايلانىس ارقاۋى ۇزىلمەگەن ءداستۇر ساباقتاستىعىنىڭ التىن دىڭگەگى دەپ ەسەپتەيمىز, – دەيدى ساعاتبەك مەدەۋبەك.
ءوز كەزەگىندە «ەگەمەندىكتەر» ۋنيۆەرسيتەت كىتاپحاناسىنىڭ قورىنا وتتى ماقالالارى مەن ءتولتۋما تۋىندىلارى توپتاستىرىلعان كىتاپتارىن سىيعا تارتتى. جۋرناليستيكا فاكۋلتەتىنىڭ ۇستازدارى ماماديار جاقىپتىڭ «ساعىنىش», گۇلزەينەپ سادىرقىزىنىڭ «ماحابباتىم - جۇرەگىمدە», تالعات ءسۇيىنبايدىڭ «100 تۇلعا - 100 پىكىر» جيناقتارى جاس تالىمگەرلەردى كاسىبي تەرەڭدىككە ماشىقتاندىراتىنىن ايتادى.
الماتى